உன்னை அறிந்து கொள்!

ganeshawithmoonjoor

மகா வாக்கியங்களில் ஒன்று தத்வமசி. தத்வ என்பது பிரம்மன அல்லது matter. த்வம் என்பது நீ. அசி என்பது ஆகிறாய் are. அதன் எளிய பொருள் நீயே அதுவாகிறாய்.

நாம் வேறொன்றாக ஆவதற்கு முதலில் அதைப் பற்றி தெரிந்திருக்க வேண்டும். தெரியாததை அடைய முடியாது. புரியாதது கண்ணுக்குப் புலப்படாது.

“அது” என்பது தான் தெரியாத ஒன்று – X factor! அது என்பது பிரம்மன்/கடவுள்/தெரியாத ஒன்று. அந்த ஒன்றாக நாம் எப்படி ஆகிறோம்? அதைப் புரிந்து கொள்ள தெரிந்த ஒன்றை வைத்து ஆரம்பிப்போம். “நீ” அதாவது நான், என்னை முதலில் அறிந்து கொள்ளலாம். அது எளிது. ஏனென்றால் நகமும் சதையுமாக மூச்சுக் காற்றை சுவாசித்துக் கொண்டு உணர்வுகளோடும் உயிரோடும் நான் இருக்கிறேன். என்னைப் பற்றி ஆராய்வது எளிது. சைவ சித்தாந்தத்தின் பால பாடம் உன்னை அறிந்து கொள் என்பது தான். உன்னை அறிந்து கொண்டால் மட்டுமே இறைவனை அறிந்து கொள்ள முடியும்.

“உன்னை அறிந்தால் உன்னை அறிந்தால் உலகத்தில்  போராடலாம், உயர்ந்தாலும் தாழ்ந்தாலும் தலை வணங்காமல் நீ வாழலாம்” – ஒரே வரியில் உயரிய தத்துவத்தைச் சொல்லிவிட்டார் கவியரசர் கண்ணதாசன்!

எப்படி நம்மை அறிந்து கொள்வது? ஒரு பிண்டமாகத் தான் பிறக்கிறோம். பிறந்த சில மாதங்களுக்கு நமக்கு ஒன்றும் தெரியாது. பிறகு அம்மா, அப்பா, தாத்தா பாட்டி, அத்தை மாமா என்ற உறவுகளை அறிகிறோம். அப்பொழுதும் நாம் யார் என்று நமக்குத் தெரியாது. இன்னும் சிறிது காலம் போனால் நம் பொருள் எது என்று அறிந்து கொள்கிறோம். நம் விளையாட்டுப் பொருளை எடுத்தால் அடுத்தக் குழந்தையுடன் சண்டைக்குப் போகவோ அழவோ தெரிகிறது. பள்ளி செல்லும் பருவத்தில் நம் பெயர், இன்னாரின் பிள்ளை ஆகிய விஷயங்கள் தெரிய வருகிறது. அதன் பின் மெது மெதுவாக அகந்தை உருவாகிறது. நான் அடுத்தவனை விட வெளுப்பு, அவனை விட உயரம், அவனை விட பணக்காரன், அவனை விட அறிவாளி ஆகியவை நம் மூளையில் பதிகிறது. இப்படியே வளரும் நாம் பல வருட வாழ்க்கைக்குப் பிறகு ஆன்மிகத் தேடலின் துவக்கத்தில் நீ யார் சொல், உன்னை நீ முதலில் அறிந்து கொள் என்று யாரவது சொல்லும் போது திடீரென்று விழித்துக் கொள்கிறோம். A sudden awakening!

அர்ஜுனன் கீதையின் முதல் அத்தியாயத்தில் காண்டீபத்தைக் கீழேப் போட்டுவிட்டுக் கிருஷ்ணபரமாத்மவைப் பார்த்துக் கேட்கிறான். நான் எப்படி என் சகோதரர்களையும், உறவினர்களையும், ஆச்சார்யர்களையும் கொல்வேன். எனக்கு இந்த ராஜ்ஜியமே வேண்டாம். நான் போர் புரியப் போவதில்லை என்கிறான். அவனுக்கு அப்பொழுது ஏற்பட்டது ஒரு மயக்கம். அவன் தான் யார் என்றே அறியாமல் சொன்ன வார்த்தைகள் அவை. அதனால் கண்ணனின் முதல் வேலையே அவன் யார் என்று அவனுக்கு அறிவுறுத்துவது தான்.

krishna&arjuna

அவன் ஒரு வீரன், அரசகுமாரன். அவனுடைய தர்மம் போர் புரிந்து வெற்றிப் பெறுவது அல்லது போர்க்களத்தில் வீர மரணம் அடைவது மட்டுமே. போர் செய்வது என்று வந்த பிறகு எதிரில் இருப்பது மாமனோ மச்சானோ அவன் அதைப் பார்க்க முடியாது. செய்ய வேண்டியக் கடமையை செய்ய வேண்டும். இதே தான் நம் அனைவருக்கும். பெண்ணோ ஆணோ நம் அனைவருக்கும் ஒரு கடமை இருக்கிறது. அந்தக் கடமைகள் பலவகை. உறவினால் வருவது, நாம் இருக்கும் பதவியினால் வருவது அல்லது சூழ்நிலையினால் வருவது. எதுவாயினும் அதிலிருந்து தப்பிக்க முடியாது. கடமைகளை செவ்வனே செய்வதே நம்மை நாம் அறிந்து கொள்வதில் எடுக்கும் முதல் பயிற்சி.

இந்த ஆத்மா பல பிறவிகளை எடுக்கிறது. போன பிறவியில் எதுவாக இருந்தோம் என்று நமக்குத் தெரியாது. அடுத்தப் பிறவியில் எதுவாக இருப்போம் என்றும் தெரியாது. ஆனால் பிறவிகள் நமக்குக் கிடைக்கும் வாய்ப்புகள். நம்மை செம்மைப் படுத்திக் கொள்ள, நம் தவறுகளைத் திருத்திக் கொள்ள தரப்படும் வாய்ப்புகள்.

நம் கடமைகளைச் செய்யத் தவறி வாழும் வாழ்க்கை வீண். அதைத் தான் அர்ஜுனனுக்கு எடுத்துச் சொல்கிறார் கண்ணன். அவன் சண்டை போடாமல் திரும்பிப் போனால் அவனை கோழை என்று உலகம் எள்ளி நகையாடும். அவனை நம்பிய அவன் குடும்பத்தினரும் ஏமாற்றப் படுவார்கள். நாடிழந்து திரும்ப வனவாசம் செல்ல வேண்டும். அங்கே இரண்டு நாள் அவனால் உண்ணாமல் இருக்க முடியும், மூன்றாம் நாள் வேட்டைக்குச் செல்லத் தானே வேண்டும். அங்கே அவன் தடுக்கப் பட்டால் அவன் உணவுக்காகவாவது சண்டைப் போட்டாக வேண்டும் இல்லையா? அதை அப்போழுதே அங்கேயே கௌரவமாகப் செய்தால் அவன் சுய தர்மத்தைத் தான் செய்கிறான் என்று மெச்சப்படுவான். மேலும் போர்க்களத்தில் அவன் செய்வது கொலையும் அல்ல.

திரையில் கதாநாயகன் வில்லனைக் கொல்கிறான். அது வெறும் நிழற்படம் தான். உண்மையில் கதாநாயகனும் உயிருடன் இருக்கிறான், வில்லனும். அதே போல நம் ஆத்மாவிற்கு அழிவு கிடையாது அது அமரத் தன்மையை உடையது. இந்த ஆத்மா கத்தியாலும் வெட்டப்பட முடியாதது, நீராலும் மூழ்கடிக்கப்பட முடியாதது, நெருப்பாலும் அழிக்க முடியாததாக இருப்பதால் விமானத்தில் உள்ள Black Boxக்கு இணையாக உள்ளது. அதில் நம் பிறவிகளின் அனுபவப் பாடங்கள் வாசனைகளாக படர்ந்து அடுத்தடத்தப் பிறவிகளுக்கும் வாழ்க்கைப் பாடங்களைக் கொண்டு செல்கிறது.

அடுத்து அவன் கண்ணனின் உபதேசத்தால் புரிந்து கொண்டது அவன் வெறும் கருவி மட்டுமே என்பதை. சூத்திரதாரி வேறு யாரோ. இந்த உலகம் ஒரு நாடக மேடை நாமெல்லாம் நடிகர்கள். நமக்குக் கொடுத்தப் பாத்திரத்தைச் சரியாக செய்தால் அப்ளாஸ், சொதப்பினால் அழுகின முட்டையடி. இயக்குநர் இங்கே கடவுள்/பிரம்மன். அவன் சொல் படி வேலை செய்தால் நம் கடமை முடிந்தது.

தூக்குத் தண்டனை நிறைவேற்றும் அரசாங்க அதிகாரி கொலை குற்றம் செய்யவில்லை. கொடுக்கப் பட்டப் பணியை நிறைவேற்றுகிறார். இது தான் உண்மை என்று அறியும் அந்த நொடியில் நான் என்ற அகந்தை மறைந்து நாம் வெறும் ஒரு கடல் நீரில் இருக்கும் ஒரு துளி நீர், நமக்கென்று ஒரு தனித்தன்மைக் கிடையாது என்று புரிய வரும்.

நான் யார் என்று நினைக்கும் பொழுது சிலருக்கு நம் பெயர் நினைவுக்கு வரலாம், அல்லது நான் MD என்ற பதவி நினைவுக்கு வரலாம், அல்லது நான் தாய் என்று உறவு கண் முன் நிற்கலாம். ஆனால் நாம் இதில் எதுவுமே இல்லை. நாம் ஒரு ஆத்மா. இன்று சுரிதார் போட்டுக் கொண்டிருக்கும் அனுஷா நாளை அந்த உடையைத் துறந்து ஜீன்ஸில் நிற்கும் Andrew ஆக மாறலாம். ஆம், நம் பிறவிகள் மாறுவது பழைய உடையைக் களைந்துப் புதிய உடைக்குள் போவது போலத் தான். சுரிதாரின் மேல் அதித ஒட்டுதல் வைத்துக் கொண்டால் உடை மாற்றும் போது ரொம்ப சிரமமாக இருக்கும்.

நம் மனம் விழித்திருக்கும் பொழுதெல்லாம் அலை பாய்கிறது. ஓரிடத்திலும் நிலையாய் நிற்பது இல்லை. பழைய நினைவுகளும் நாளைய நிகழ்சிகள் பற்றியக் கற்பனைகாலும் திரைப்படம் போல மனத்திரையில் ஓடிக் கொண்டே இருக்கிறது. நம் வாழ்க்கை முழுவதும் இப்படியே இருந்து விட்டால் நான் யார் என்ற தேடல் இந்தத் திரைப்படத்திற்குள் மறைந்து விடும். அது தான் மாயை! சந்தர்ப்பம் கிடைக்கும் பொழுதெல்லாம் நாம் உள்நோக்கி தியானிக்க வேண்டும். அப்பொழுது தான் பனி மறைந்து சூரியன் ஒளிவிடுவது போல நம் ஆத்ம நிலை நம் கண்ணுக்குப் புலப்படும். நாம் வேறு இந்த உடல் வேறு என்று தெரியவரும். உடலின்  மீதும், உடலினால் வரும் உறவுகள் மீதும் பற்றுப் படிப்படியாகக் குறையும்.

meditating

கீதை மனிதனின் வாழ்வியல் தர்மத்தையும் சமூகக் கடமையும் சுட்டிக்காட்டி அவ்வுலக வாழ்க்கையை அடைவதற்கும் வழிகாட்டியாக அமைகிறது. ஆனால் வெறும் புத்தக அறிவு ஒரு முன்னேற்றத்துக்கும் உதவாது. அனுபவப் பாடமே அருமருந்து. அதனால் சுயமாக சிந்தித்து செயல் படுவதே நம்மை நாம் அறிவதற்கு முதல் படி.

நிலத்தை உழுதால் தான் பயிரிட முடியும். நாமும் செயல் பட செயல் படத்தான் தெளிவு பிறக்கும். மேலும் நம் ஆசைகள் நிறைவேறும் வரை நாம் பிறவிகள் எடுத்துக் கொண்டே இருப்போம். இதை வேறு மாதிரியாகவும் சொல்லலாம். தியானத்தின் மூலம் ஆசைகளை விட்டொழித்தால் பிறவா நிலையை நாம் அடைவோம்.

கீதையின் சாரத்தையே கண்ணதாசன் இன்னொரு பாடலில் சொல்கிறார். “என்னதான் நடக்கும் நடக்கட்டுமே, இருட்டினில் நீதி மறையட்டுமே. தன்னாலே வெளிவரும் தயங்காதே, ஒரு தலைவன் இருக்கிறான் மயங்காதே!” நாம் நம் கடமையைத் தவறாமல் செய்து வந்தால் அதற்கான பலன் கிடைக்கும். பலனை எதிர்ப்பார்த்து செய்வது ஏமாற்றத்தில் முடியும்.

இந்தப் பாடலின் மற்ற வரிகளும் அற்புதம். “பின்னாலே தெரிவது அடிச்சுவடு, முன்னாலே இருப்பது அவன் வீடு, நடுவினிலே நீ விளையாடு நல்லதை நினைத்தேப் போராடு!” – நாம் வந்த பாதை நம் அனுபவம். அந்த அனுபவம் தான் நமக்கு வேதமாக அமைகிறது. வேதம் என்பது வடமொழியில் உள்ள ரிக், யஜுர், சாம, அதர்வண வேதங்கள் ஆல்ல. நாம் நம் வாழ்வில் கற்றுக் கொண்ட பாடங்கள் தான் வேதம். அவையே நம் நாளைய வாழ்க்கைக்கும் வழிக்காட்டியாகிறது. நமக்கு வீடு பேற்றை அடையும் வழியையும் காட்டுகிறது. நேற்று நடந்ததில் தெரிந்துக் கொண்டதை நாளை பயன்படுத்துக்கிறோம். மேலும் இந்தப் பிறவியில் கற்றதை நாம் அடுத்தப் பிறவியில் பயன் படுத்துகிறோம்.

தொடர்ந்து வரும் வரிகள், “மனதுக்கு மட்டும் பயந்துவிடு, மானத்தை உடலில் கலந்துவிடு, இருக்கின்ற வரையில் வாழ்ந்து விடு, இரண்டினில் ஒன்று பார்த்துவிடு!” இதன் பொருள், நீ நீயாக இரு என்பதே! உனக்கே எது சரி என்று படுகிறதோ அதை செய். இது தான் நம் வாழ்வின் தாரக மந்திரமாக இருக்க வேண்டும். இப்பிறவியில் முடிந்த வரை மனதுக்கு சரி என்று பட்டதை செய்து பிறருக்கு எந்த விதத்திலும் தீமை புரியாமல் வாழ்வதே உயர்ந்த வாழ்வு. நல்லவனாகவும் இருக்க வேண்டும் ஆனால் அதே சமயத்தில் வல்லவனாகவும் இருத்தல் அவசியம். இவையெல்லாம் எளிமையான உண்மைகள். அந்தப் பாடலின் சுட்டி: http://www.youtube.com/watch?v=7i2AvTOZfCc

நம் உடல் பஞ்ச பூதங்களால் ஆனது. ஆனால் ஆத்மா அதற்கும் அப்பாற் பட்டது. ஏனென்றால் உடல் அழிந்துவிடும். ஆத்மா என்றும் அழியாதது. இந்த பிரபஞ்சத்தில் ஒரு அணுவாக வியாபித்துக் கொண்டே இருக்கும். ஆத்மா மனசாட்சியா என்றால், யோசித்துப் பார்த்தால் அதுவும் இல்லை என்ற தெளிவு பிறக்கும். உள்நோக்கி உள்நோக்கிப் பார்த்தால் முதலில் எங்கெங்கோ எண்ணம் போனாலும் தினம் இந்த மாதிரி சில நிமிட ஆராய்ச்சி முடிவில் நான் யார் என்பதை உணரவைக்கும். நம் தேடல் கடைசியில் தேடும் கடவுளே நாம் தான் என்று புரியவைக்கும். அன்பே சிவம் திரைப்படத்தில் கமலுக்கும் மாதவனுக்கும் வரும் உரையாடல் தான் நம் உண்மை நிலை. இன்னொரு ஆத்மாவுக்காகக் கண்ணீர் விடும் மாதவனைப் பார்த்துக் கமல் நீ தான் கடவுள் என்பார், அதே சமயம் தன்னையும் கடவுள் என்பார். நீயும் கடவுள் நானும் கடவுள். நாம் தேடும் கடவுள் நாமே தாம்.

sivam-and-aras

“X factor”ஐப் பற்றித் தெரிந்துக் கொள்ள ஆரம்பிக்கும் முயற்சியின் முடிவு அந்த “அது”வாகவே நாம் ஆகிவிடுவது தான். அது தான் இந்த வாழ்வின் சூட்ச்சமம். THE GOD you are searching for is you. You yourself are GOD. God is no where but in you. Tatva is matter, twam is you, asi is are ! You are the matter means you are the sole force of life on earth or in the universe!

You are THAT!
பகவத் கீதையின் 18 அத்தியாயங்களை ஆறு ஆறாகப் பிரித்தால் முதல் ஆறு தத் பற்றி, இரண்டாம் ஆறு த்வம் பற்றியும் கடைசி ஆறு அசி பற்றியும் சொல்கிறது. இந்த ஒரு வரிக்கான விளக்கத்தை பகவான் 18 அத்தியாயங்களில் சொல்லியிருக்கிறார். உன்னை அறிந்து கொள்வது அதனினும் எளிய வழி!

வணக்கம் சென்னை – திரை விமர்சனம்

vanakkam-chennai-poster

கிருத்திகா உதயநிதி எழுத்து இயக்கத்தில், கணவர் உதயநிதி ஸ்டாலின் தயாரிப்பில் வணக்கம் சென்னை! முதல் படத்திற்கு ஏற்ற நல்ல தலைப்பை வைத்துள்ளார் கிருத்திகா. ஆனால் திரும்பி நாமும் பதில் வணக்கம் வைக்கணும், அப்படி வெச்சா தான் அவர் தொடர்ந்து படம் எடுக்க முடியும். வடிவேலு பொட்டுக் கடலையை சாப்பிடுகிறா மாதிரி தான் நாம் அரைகுறையா பதில் வணக்கம் வைக்க முடியும், அந்த அளவிலே தான் உள்ளது படம்.

முதலில் புது முகம் படம் எடுக்கிறார் என்பது முதல் சிலக் காத்சிகளிலேஎத் தெரிந்துவிடுகிறது. (சூடு பிடிக்கவில்லை என்று சொல்ல வருகிறேன்) பிறகு சில நல்ல சீன்கள், அப்புறம் தொய்வு, பிறகு சிறிது பார்க்கும்படியான காட்சிகள். இப்படி மாற்றி மாற்றி வந்துக் கொண்டே இருக்கிறது. தமிழர்களுக்குப் பொறுமை பற்றி என்ன, தனிப் பாடமா எடுக்கவேண்டும்? அது தான் நம் இரத்தத்திலேயே ஊறியிருக்கிறதே! அதை நம்பிப் படமும் தயாரித்து விடுகிறார்கள்.

இந்தப் படத்தில் நன்றாக உள்ளது என்று பாராட்டப்பட வேண்டும் என்றால் அது இசை மட்டுமே. பாடல்களும் பின்னணி இசையும் நன்றாக உள்ளது. இசை அனிருத், படம் முடிந்ததும் ஒரு பாடலுக்குத் தனி நடனம் ஆடுகிறார். அது கொஞ்சம் காமெடியாகத் தான் உள்ளது. ஒளிப்பதிவு, எடிட்டிங் எல்லாம் சுமார் ரகம்.

சின்ன பட்ஜெட்டில் தயாரித்துவிட்டார் தயாரிப்பாளர். எல்லாக் கதையும் ஒரு வீட்டுக்குள்ளேயே, அதுவும் செட் என்று பட்டவர்த்தனமாகத் தெரிகிறது.வெளிநாட்டுக்கு ஹீரோ ஹீரோயினியை எல்லாம் டூயட் பாட அழைத்துச் செல்லவில்லை. கிருத்திகாவும் நல்ல மனைவி. கணவனுக்கு ரொம்ப செலவு வைக்காமல் ஏர்போர்ட்டை மட்டுமேக் காட்டி உண்மையிலேயே பில்ம் காட்டிவிடுகிறார்.

ஊர்வசி, நாசர், நிழல்கள் ரவி போன்ற பெரிய நடிகர்களை துணை  நடிகர்கள் அளவுக்குப் பயன்படுத்தியிருப்பது சோகமே! ரேணுகா, மனோபாலா சின்ன பாத்திரமானாலும் பழுதில்லாமல் செய்திருக்கிறார்கள். மிர்ச்சி சிவா ஹீரோ, நன்றாக செய்திருக்கிறார். என்ன, நடனம் தான் சுட்டுப் போட்டாலும் வராது போலிருக்கிறது. ப்ரியா ஆனந்த் கதாநாயகி. அவரும் நன்றாகச் செய்திருக்கிறார். கதை எழுதியவருக்குத் தான் பாவம் கதாநாயகிப் பாத்திரத்தின் குணச்சித்திரமே என்ன என்று தெரியவில்லை. அதனால் குழம்பி நடிக்கும் ப்ரியா ஆனந்தை அதற்குக் குறை சொல்லக் கூடாது.

இந்தப் படத்தில் ராகுல் ரவீந்திரன் நடிக்கிறார். அவர் தான் பாடகி சினமயியின் fiance. கார்த்திக் குமாருக்கு replacement ஆக இனி ஒரு ரவுண்டு வருவார் என்று எதிர்ப்பார்க்கப் படுகிறது. வெளிநாட்டு மாப்பிள்ளை, தனக்குப் பார்த்தப் பெண்ணைக் கதாநாயகனுக்கு விட்டுக் கொடுக்கும் பாத்திரம். நடிப்பில் இன்னும் மெருகேற வேண்டும்.

பல படங்களுக்கு ஆணிவேராக (அல்லது ஆணியாக) இருக்கும் சந்தானம் தான் படத்தைக் கொஞ்சம்  தூக்கி நிறுத்திகிறார். அவருக்கேற்ற டகால்டி பாத்திரம். முழுப் படமும் காமெடி தான், சிவாவும் சந்தானமும் நல்லக் கூட்டணி. டாஸ்மாக் காட்சிகளும் பத்தாதற்கு ஐந்து நட்சத்திர ஹோட்டலில் குடிக்கும் காட்சிகளும் இந்தப் படத்திலும் தப்பாமல் உள்ளன.

பெண் இயக்குனர், ஆதலால் இரட்டை அர்த்த வசனம், விரசமானக் காட்சிகள் இல்லை. படம் clean entertainer. இன்னும் கொஞ்சம் கதையில் மெனக்கெட்டிருந்தால் நல்ல படமாக அமைந்திருக்கும்.

மிஷ்கினுடன் ஒரு சந்திப்பு

mishkin3

திரு SKP கருணா அவர்கள் ஏற்பாடு செய்திருந்த Dialogue என்ற சிறப்பு நிகழ்ச்சியில் பங்கு பெரும் வாய்ப்பு எனக்கும் என் கணவருக்கும் கிட்டியது. இடம்: அண்ணா சாலையில் உள்ள புக் பாயிண்ட். நேரம் ஞாயிறு (6.10. 2013) மாலை 6 மணி. ஒரிங்கிணைப்பாளர்கள் பவா செல்லத்துரை, SKP கருணா. மிகக் குறுகிய காலத்தில் ஏற்பாடு செய்யப்பட்டு நல்ல ஆதரவுடன் நடைபெற்ற நிகழ்ச்சி. இதை சிறப்பாக நடத்திய அனைவருக்கும் வந்து கலந்து கொண்டவர்கள் சார்பாக நன்றி கூறிக் கொள்கிறேன்.

ஓநாயும் ஆட்டுக்குட்டியும் மிஷ்கினின் புதிய படம். பல விதங்களில் சிறப்பு வாய்ந்த படமாக, உலகத் தரத்தில் உள்ள படமாக, பாராட்ட வேண்டிய ஒரு படமாக வந்துள்ளது. இசைஞானி இளையராஜாவின் பெயர் முன்னணி இசை என்ற பெயருடன் முதன் முதலில் டைட்டிலில் இடம் பெற்றிருக்கிறது. இளையராஜாவையும் வைத்துக் கொண்டு ஒரு பாடல் கூட படத்தில் வைக்காமல் துணிச்சலாகப் படம் எடுத்திருப்பது இன்னொரு சிறப்பாம்சம். படத்தில் அச்சுப் பிச்சு காமெடி, குத்துப் பாட்டு ஹீரோயிச சண்டைகள், கதாநாயகி, வெளி நாட்டில் டூயட் பாடல், எதுவுமே இல்லாமல் வந்துள்ள ஒரு படம் இது. கதை சொல்லும் விதம் அலாதியாக இருந்தது. இந்தப் படத்தை ட்விட்டரிலும் பேஸ் புக்கிலும் பலரும் பாராட்டுவதைப் பார்த்து கருணா அவர்கள் இந்த நிகழ்ச்சிக்கு உடனடியாக ஏற்பாடு செய்தார்கள். இது மாதிரி பல கலந்துரையாடல்களைப் பல வருடங்களாக டயலாக் என்ற அமைப்பின் மூலம் இவர் திருவண்ணாமலையில் செய்து வந்திருக்கிறார் என்று இந்த நிகழ்ச்சியின் போது எங்களுக்குத் தெரியவந்தது. ஆனால் சென்னையில் இதுவே முதல் முறை. மேலும் பத்திரிகை அடிக்காமல், இணையத்தின் மூலமே அழைப்பு அனுப்பி மிகக் குறுகியக் காலத்தில் ஏற்பாடு செய்யப்பட்டும் அரங்கம் நிரம்பி வழிந்தது அவரின் ஒருங்கிணைப்புச் சாதனைக்குக் கிடைத்த வெகுமதி.

ரொம்ப அருமையாக கேக்கும், தேநீரும், காப்பியும், நிகழ்ச்சிக்கு முன்னாடி வழங்கப்பட்டது. அரங்கம் குளிர்விக்கப் பட்ட ஒன்று. நாற்காலிகளும் மேடையும் மிகவும் சிறப்பாக அமைந்திருந்தன. உட்கார இடமில்லாமல் 50க்கும் மேற்பட்டோர் நின்றுக் கொண்டு நிகழ்ச்சியைப் ரசித்தனர். ட்விட்டர் நண்பர்கள் எனக்குத் தெரிந்த வரை, @ivedhalam @thirumarant @jill_online @Nattu_G @amas32 @n_shekar @LathaMagan @ammuthalib @yathirigan @iKaruppiah @luckykrishna @ChittizeN @get2karthik @kabuliwala @sanakannan வந்திருந்தனர். விட்டுப் போன ட்வீட்டர்கள் பெயர்கள் சொன்னீர்களானால் இந்தப் பதிவில் சேர்த்து விடுவேன்.

mishkin1

பவா செல்லத்துரை அவர்கள் நிகழ்ச்சியைத் தொகுத்து வழங்கினார். பத்து நிமிட எழுச்சிப் பாடல்களுடன் நிகழ்ச்சித் தொடங்கியது. பின் கருணா, மிஷ்கின், ஓவியர் மருது, எழுத்தாளர், CBI ஆபிசரகா இந்தப் படத்தில் வரும் ஷாஜி, சிறு பெண் சைத்தன்யா, விலை மாதுவாக நடித்த ஏஞ்சல் க்லேடி, மருத்துவ மாணவனாக நடித்த ஸ்ரீ மேடைக்கு அழைக்கப் பட்டனர். மிஷ்கின் வரும் பொழுது எழுந்து நின்று கைத்தட்டி அனைவரும் மகிழ்ச்சியையையும் பாராட்டுதல்களையும் அவரிடம் பகிர்ந்து கொண்டனர்.

இந்த நிகழ்ச்சி ஏற்பாடாகிறது என்று தெரிந்த உடனே எனக்கும் என் கணவருக்கும் மிஷ்கினுக்கு இந்த கலந்துரையாடலில் ஏதாவது ஒரு சின்ன பரிசு கொடுக்க வேண்டும் என்று தோன்றியது. ஒரு கலைஞனுக்குப் பணமோ பதவியோ பெரிசில்லை. அவனைப் பாராட்டிப் புகழும் ஒரு சொல்லுக்கே அவன் ஆசைப் படுகிறான். அதனால் தான் சிறு விழாவும் அவனுக்குப் பெரும் அங்கீகாரமாக விளங்குகிறது. பலதும் யோசித்து, சட்டென்று இந்த எண்ணம் என் மனதில் வந்தது. அவர் இளையராஜாவின் இசைத் தொகுப்பை CDக்களாக இலவசமாக (1000 CD) அளித்தார். அதில் அவர் ராஜாவுடன் இருக்கும் ஒரு புகைப்படம் பேஸ் புக்கில் இருப்பதைப் பார்த்து அதை போஸ்டராகப் பெரிய சைசில் பிரிண்ட் செய்தோம். அதன் கீழ் ஓநாயும் ஆட்டுக்குட்டியும் என்ற படத்தின் தலைப்பையும் போட்டு, உலகத் தரம் வாய்ந்த படங்களைத் தருவதற்கு எங்கள் பாராட்டுகள் என்ற வாசகத்தையும் எழுதி அதன் கீழே கையழுத்து போட இடமும் விட்டிருந்தோம். அரங்கத்தில் வந்திருந்த ட்வீட்டர்களிடமும் மற்றவர்களிடமும் கை எழுத்துக்களை வாங்கி பின் கையோடு கொண்டு சென்றிருந்த பிரேமில் போட்டு அவரிடம் கொடுக்கக் காத்திருந்தோம்.

postermishkin

முதலில் கருணா அனைவரையும் வரவேற்றுப் பேசினார், எப்படி நிகழ்ச்சியை ஒருங்கிணைத்தோம் என்று சுருக்கமாக  சொன்னார். அவருக்கும் மிஷ்கின்னுக்கும் நெருக்கமான் நட்பு பல வருடங்களாக இருந்திருப்பது அவரது பேச்சிலிருந்து தெரிந்தது.

mishkinkaruna

வந்திருந்தவர்களில் இருந்து இணையப் பதிவாளர்கள் பலரை பவா செல்லத்துரை வரிசையாகப் பேச அழைத்தார். அவருக்குத் துணையாக அவர் துணைவியார் எழுத்தாளர்/ மொழிபெயர்ப்பாளர் ஷைலஜா உதவியாக இருந்தார். நிறைய பேர் தங்களுக்குப் படத்தில் பிடித்தது, அல்லது கண்ட குறைகள் இவற்றை தெளிவாகப் பேசினார்கள்.

இந்தியா டுடே நிருபர் கவின் மலர் மிஷ்கினை நிறைய முறை பேட்டி எடுத்தவர் என்ற முறையிலும் அவர் சமீபத்தில் எடுத்த பேட்டி இன்று பத்திரிகையில் வருகிறது என்பதாலும் அவரும் பேச அழைக்கப்பட்டார். அவர் ரொம்ப அற்புதமாகப் பேசினார். அவர் பேச்சின் நடுவே திருநங்கைப் பாத்திரம் வெகு சிலரால் மட்டுமே திரைப் படங்களில் நல்ல முறையில் காண்பிக்கப் படுகிறது என்று சொன்னார். திரைப்படம் முடிந்ததும் நடித்தவர்கள் பெயர்கள் வரும் பொழுது ஏஞ்சல் க்லேடியின் பெயருக்கு முன் தேவதை என்று எழுதப்பட்டிருந்ததைப் பார்த்து அவர் வண்டியில் வீடு போய் சேரும் வரை அவர் கண்களில் இருந்து கண்ணீர் வந்துக் கொண்டே இருந்ததைப் பகிரும் பொழுது அவர் உணர்ச்சிகளைக் கட்டுப்படுத்த முடியாமல் அழத் தொடங்கி விட்டார். பார்ப்பவர் பலரின் மனத்தையும் அது வெகுவாகப் பாதித்தது.

ட்ராட்ஸ்கி மருது அவர்களின் அருமையான அனுபவ பகிர்வு அடுத்து வந்தது. எப்படி திரைப்படம் என்பது ஒரு visual media, அதை சரியாகக் கையாளத் தெரிந்தவர்கள் வெகு சிலரே, அதில் மிஷ்கின் ஒருவர் என்று சிறப்பாக உரையாற்றினார். நீண்ட உரை, ஆனால் மிகவும் கருத்து செறிவானது.

அவருக்கு அடுத்து என் கணவர் பேசினார். அவரும் படத்தின் நிறைகளையும், அதில் நடித்தவர்களின் திறமையை வெளிக் கொண்டுவந்த மிஷ்கின்னையும் பாராட்டினார். நல்ல படங்கள் எடுக்கும் போது அவை கமர்ஷியலாக வெற்றிப் பெற்றால் தான் இன்னும் நிறைய படங்கள் அது போல தர முடியும் என்றும் கூறனார். பிறகு நானும் மேடைக்குச் சென்று அந்த பிரேமில் போடப்பட்ட வாழ்த்துப் போஸ்டரை அவருக்கு வந்திருந்தவர்கள் சார்பாகப் பரிசளித்தோம். அதைப் பெற்றுக் கொள்ளும் போது என் காலையும் என் கணவர் காலையும் தொட்டு வணங்கி நெகிழ்த்தி விட்டார். அவரை அன்புடன் அனைத்துக் கொண்டு, அருகில் இருந்த சைத்தன்யா, ஏஞ்சல் க்லேடி, ஸ்ரீ  இவர்களை அரவணைத்துக் கொண்டு என் பாராட்டுதலையும் அன்பையும் தெரிவித்துக் கொண்டேன்.

BV5lfurCYAEzpZB

ஸ்ரீ பேசினார், சின்னக் குழந்தை சைத்தன்யா அவ்வளவு அழகாகப் பேசியது. எப்படி தன்னை படப்பிடிப்புத் தளத்தில் அனைவரும் அன்புடன் நடத்தினர் என்று அந்த சிறியவள் பெரியவள் போல சொன்னாள். ஏஞ்சல் க்லேடி பேசியது மிகவும் அருமையான் ஒரு பகிர்வு. தன்னை எப்படி மிஷ்கின் தன் குழுவில் ஒருவராகப் பிணைத்துக் கொண்டு எந்த வேறுபாடும் காட்டாமல் ஒரு பெண்ணை நடத்துவது போல நடத்தினார் என்று கூறினார். எப்பொழுது அவர் வந்து அமரும் இடத்தில் எந்த சலசலப்பும் இல்லாமல் இருந்தால் மட்டுமே அவர்களை நாம் ஒருவராக ஏற்றுக் கொள்கிறோம் என்பதை மிஷ்கினிடம் தான் கண்டேன் என எடுத்துச் சொன்னார்.

தங்க மீன்கள் ராம் மிஷ்கின் பேசுவதற்கு முன் பேசினார். எப்படி இணைய தளத்தில் சொல்லப் படும் கருத்து வேகமாகப் பரவி படங்களின் வெற்றியை நிர்ணயிக்கிறது என்றும் மிஷ்கின்னுடன் உள்ள தன் நட்பைப் பற்றியும் பொதுவாக இன்றைய சூழலில் எப்படி நல்ல படங்கள் விலை போகாமல் இருக்கும் துன்பத்தையும் சொன்னார். ரொம்ப நல்ல உரை.

mishkinram

கடைசியல் மிஷ்கின் மைக்கைப் பிடித்தார். எல்லோரையும் ஒரு பிடி பிடித்தார். ஒரு படம் எடுத்துப் பாருங்கய்யா அதன் வலி என்னன்னு உங்களுக்குத் தெரியும் என்று ஆரம்பித்துத் தன ஆதங்கத்தை எல்லாம் கொட்டித் தீர்த்தார். விமர்சனம் செய்யுங்கள் ஆனால் விமரிசனங்களால் படத்தைக் கொல்லாதீர்கள், எங்களுக்கும் கொஞ்சம் புத்தி இருக்கு என்று நம்புங்கள் என்றார். “நீங்களே இவ்வளவு லாஜிக் பாக்கும்போது…எடுத்த எனக்கு தோன்றியிருக்காதா? எனக்கும் கொஞ்சம் அறிவு இருக்கு என்றார் கோபமாக. மேலும் பிடிக்கவில்லையென்றால் தாமதமாக விமரிசனம் செய்யுங்கள், படத்தின் வியாபாரம் உங்கள் ஒரு வரி விமர்சனத்தினால் பாதிக்கப்படுகிறது. இரவு பகல் உழைத்துப் படம் எடுக்கிறோம், நிறைய ஆராய்ச்சி செய்கிறோம். 108 க்கு போன் செய்திருக்கலாமே என்பது எல்லா விமர்சகர்களும் வைக்கும் குற்றச்சாட்டு. அது எனக்குத் தொன்றியிருக்காதா? என் assistant directors சொல்லியிருக்க மாட்டார்களா? குண்டடிப்பட்டு கிடக்கும் அவன் நிலையை அந்த மருத்துவ மாணவன் கணித்து ஆம்புலன்ஸ் வரும் வரை தாங்க மாட்டான் என்பதை உணர்ந்தே அவன் செயல் படுகிறான் என்று விளக்கினார். ஸ்ப்லினாக்டமி பற்றி 3 மாதம் ஆய்வு செய்தும் 30 மருத்துவர்களைக் கலந்தாலோசித்தும், அந்தப் பகுதியை ஓர் மருத்துவரை வைத்தே இயக்கியதையும் சொன்னார். இந்த மாதிரியான படங்களுக்கு ஆதரவளியுங்கள். ஒரு ஓட்டை படத்தில் இருக்கும் லாஜிக் குறைபாடுகளைக் கண்டுக்காமல் அந்த படத்தை அமோக வெற்றிப் படமாக ஓட செய்கிறீர்கள், அதே என் போன்றும், ராம் போன்றும், பாலா போன்றும் எடுக்கும் படத்தில் உள்ள சிறு தவறுகளை பூதக் கண்ணாடி மூலம் பெரிது படுத்துகிறீர்கள் என்று குறைப் பட்டுக் கொண்டார். தங்கமீன்களில், ராம் எவிட்டா மிஸ் வீட்டுக்குச் செல்லும் காட்சிக்கு நிகரான இன்னொன்றை நூறு வருடமானாலும் யாராலும் எடுக்கமுடியாது என்று கூறினார்.

படம் துவக்கத்துல முதுகுல சிலுவையை சுமந்தவன்… முடிவுல நெஞ்சுல சுமக்கிறான்…இத எத்தன பேரு கவனிச்சீங்க என்று கேட்டார். பாட்டில்லாமல் புரடியூசரிடம் கதை சொல்லிப்பாருங்கள்..செருப்பால் அடிப்பார்கள். பாட்டு இல்லாம் ஒரு படம் எடுத்ததாலே இன்னும் நிறைய இயக்குனர்/தயாரிப்பாளர்களுக்கு இந்த செயல் ஒரு முன்னுதரணமாக இருக்கும், அதை நீங்கள் பாராட்ட வேண்டும் என்று சொன்னார். அந்த சமயத்தில் ராஜாவைப் பற்றிப் பேசும் போது வந்த உரையாடலை சொல்லும் பொழுது அப்பா என்று ராஜாவை அழைப்பார் என்று தெரிந்துக் கொள்ள முடிந்தது. ராஜாவே சொன்னாராம், இப்படி ரிஸ்க்  எடுக்காதே, ரெண்டு பாட்டாவது வை என்றாராம். பின் இவர் பிடிவாதத்தைப் பார்த்து எப்படியோ போ என்று சொல்லிவிட்டாராம் 🙂

ஒரு குழந்தையாகப் படத்தைப் பார்க்கச் செல்லுங்கள், ஒரு சைண்டிஸ்டாகப் போகாதீர்கள் என்றார். ”சினிமா என்பது possible vs probable… possibleஆ என்பதை தான் நான் கவனத்தில் கொள்கிறேன். Probable என்றாலே போதும்…ஆபரேஷன் பண்ணவன் உடனே நடப்பது possible இல்ல ஆனா probable. இதை ஒரு டாக்டரிடம் கேட்டு உறுதி செய்துகொண்டபின் தான் அந்தமாதிரி எடுத்தேன. இது ஒரு பூ..இதை மிதிச்சிடாதீங்க என்றார். அவர் நந்தலாவின் தோல்வியினால் மிகவும் மனம் நொந்து இருப்பது ரொம்பத் தெளிவாகத் தெரிந்தது.

 முக்கியமாக அவர் ஒரு விஷயத்தை முன்னிறுத்தினார். திருநங்கை என்று தனியாகச் சொல்லாதீர்கள். அவர்களும் பெண்கள்தான். பெண்கள் என்றே அழையுங்கள் என்றார். பெண்களை விடவும் மென்மையான இதயம் கொண்டவர்கள் அவர்கள் என்றார்.
mishkinmishkin
இந்த நிகழ்ச்சியில் கலந்து கொண்டு பேசியவர்கள் அனைவரும் அவரைப் பாராட்டித்தான் பேசினர். இருந்தும் அவர் கோபம் முந்தைய தோல்விகளினாலும், முந்தைய மனக் காயங்களினாலும் ஏற்பட்டது என்றே தெரிந்தது. நந்தலாலா ஒரு ஜப்பானிய படத்தின் காப்பி என்று பத்திரிகைகள் அவரை சாடின என்றார், ஆனால்  அந்தப் படத்தைப் பார்த்தப் பொழுது மன நலக் காப்பகத்தில் இருந்து இறந்த தன் சகோதரன் தான் தன் நினைவிற்கு வந்து அந்தப் படத்தை எடுத்ததாகச் சொன்னார். இன்றும் தன் தாய் அவனை நினைத்து அழுவதை நினைவுக் கூர்ந்தார்.
இந்த உரைக்குப் பின் நிகழ்ச்சி நிறைவுக்கு வந்தது. அதன் பின்னர் ஓநாயும் ஆட்டுக்குட்டியும் இசை CD விற்பனை நடை பெற்றது. அது இலவசமாக அளிக்கப்பட்டாலும் டொனேஷனாக ஒரு தொண்டு நிறுவனத்திற்கு நம்மால் முடிந்த அளவு கொடுக்கலாம் என்று முன்பே அறிவிக்கப் பட்டிருந்தது. ஒரு லட்சம் ரூபாய் அதன் மூலம் அந்தத் தொண்டு நிறுவனத்திற்குக் கிடைத்துள்ளது.
பின்னர் கருணா அங்குக் கூடியிருந்தவர்களை மிஷ்கினுடன் தனியாக உரையாட விருப்பம் உள்ளவர்கள் அருகில் வந்து பேசலாம் என்று அழைத்து அறிமுகப் படுத்தி வந்திருந்தவர்களை கௌரவப் படுத்தினார். நிறைய பேர் இந்த வாய்ப்பைப் பயன் படுத்தி அவருடன் உரையாடினார்கள். நிறைய பேர் புகைப்படங்களும் எடுத்துக் கொண்டனர் 🙂
ரொம்ப அருமையான ஒரு மாலைப் பொழுது. ஒரு கலைஞனின் ஒரு படைப்பாளியின் உணர்வுகளைப் புரிந்துக் கொள்ள எனக்குக் கிடைத்த ஒரு நாள்ல வாய்ப்பாக இதை நான் கருதுகிறேன். நன்றி கருணா 🙂
mishkinsushim
இங்கே அனைத்துப் புகைப்படங்களும் பார்க்க பாலா மாரியப்பனின் picasa link https://picasaweb.google.com/105873717816469091810/MyshkinMeet … நன்றி பாலா 🙂 @chittizeN