சைவம் – திரை விமர்சனம்

 

 

 

 

 

saivam

சைவம் திரைப்படத்தைத் தாங்கி நிற்கும் நான்கு தூண்கள் சாரா அர்ஜுன், நாசர், நிரவ் ஷா, G.V.பிரகாஷ் குமார். ரொம்ப லைட்டான கதை. இயக்குநர் விஜய், செட்டியார் ஆனதால் அவர் சமூகத்துக் கதையை எளிதாகக் கையாண்டிருக்கிறார். செட்டிநாட்டு வீடும் பாத்திரத் தேர்வுகளும் authentic ஆக இருப்பத்து படத்தின் பலம்.

சிறுமி சாரா மனத்தைக் கொள்ளைக் கொள்கிறாள். நாசருக்கு இந்த மாதிரி பாத்திரம் அல்வா சாப்பிடுவது மாதிரி. அனாயாசமாக செய்து இருக்கிறார். நிறைய கதாப் பத்திரங்கள் வருவது முதலில் நம்மைக் கொஞ்சம் தடுமாற வைக்கிறது. இவ்வளவு நல்ல இயக்குநர் விஜய் திரைக்கதையை இன்னும் கொஞ்சம் சுவாரசியமாகத் தந்திருக்கலாம். படம் இன்னும் நல்ல உயரத்துக்குப் போயிருக்கும். குழந்தைக்கு சேவல் மேல் உள்ள பாசத்தை வைத்து ஒரு feel good movie. சின்ன சின்ன சம்பவங்களின் மூலம் கதாப்பாத்திரங்களின் தன்மையை வெளிக் கொண்டு வரும்போது விஜய் மிளிர்கிறார்.

gv பிரகாஷின் இசை நன்றாக உள்ளது, முக்கியமாக பின்னணி இசை நல்ல பலம். உத்திரா உன்னிகிருஷ்ணன் பாடிய அழகே அழகு இனிமை. இந்தப் படத்தில் நிரவ் ஷா சம்பளம் வாங்காமல் cinematography செய்திருக்கிறார். அவரின் பங்களிப்பு படத்தின் தயாரிப்புத் தரத்தை உயர்த்துகிறது. Editing ஆன்டனி, படம் நன்றாகத் தொகுக்கப் பட்டிருக்கிறது.

நாசர் மகன் இந்தப் படத்தில் அறிமுகமாகிறார். முதல் படத்துக்கு நன்றாக செய்திருக்கிறார். இன்னாரின் மகன் என்றாலே இன்னும் கூடுதல் எதிர்ப்பார்ப்பு வந்துவிடுகிறது.

முடிவு என் மனத்துக்குப் பிடித்தமான ஒரு முடிவு, அதனாலேயே அரங்கை விட்டு வரும்போது மகிழ்ச்சியோடு வெளிவர முடிந்தது. மேலும் இது இயக்குநர் விஜயின் வாழ்க்கையில் நடந்த சம்பவம் என்றறியும் பொழுது இன்னும் மகிழ்ச்சி 🙂

டைட்டிலில் நிறைய பேருக்கு நன்றி சொல்கிறார் இயக்குநர். அமலா பாலுக்கும் நன்றி என்று ஒரு டைட்டில் மின்னி மறைகிறது. எதற்கு என்று தெரியவில்லை. may be இவரைத் திருமணம் புரிந்ததற்காக இருக்கலாம்.

நல்ல படம். தனி காமெடி track இல்லை. அதுவே பெரிய நிம்மதி. ஹீரோயிச சண்டை காட்சிகளும் கிடையாது. அதை விட பெரிய நிம்மதி. குடும்பத்தோடு சென்று பார்க்கலாம். வேற்று மொழி படத்தின் காபியாக இருக்கவும் வாய்ப்பில்லை என்றே தோன்றுகிறது. ஆனால் படம் ரொம்ப சுவாரசியமாக இல்லாதது ஒரு குறை தான்.

saivam_movie_poster_stills_images_photos_04

Advertisements

மரகதவல்லி alias Maggie

maggie

என் அம்மாவின் வாழ்க்கை வண்ணமயமானது. வளரும் பருவத்தில் எல்லாமே பளிச் வண்ணங்கள். என் அம்மாவின் அப்பா திரு. சக்கரவர்த்தி ஐயங்கார் செஷன்ஸ் கோர்ட் நீதிபதியாக இருந்தார். அதனால் இரண்டு வருடங்களுக்கு ஒரு முறை மாற்றலாகும் வேலை. என் அம்மாவிற்கு முன் நான்கு ஆண் பிள்ளைகள் பிறந்திருந்தார்கள். ஒரு பெண் குழந்தை இறந்தே பிறந்ததால் என் அம்மா பிறந்த போது என் பாட்டியின் தகப்பானருக்குப் பெரும் மகிழ்ச்சி, வறுத்த பயிர் முளைத்தது போல பெண் பிறந்திருக்கிறாள் என்று அவருக்கு மரகதவல்லி என்று பெயர் சூட்டினார்.

நடு ரோவில் என் அம்மாவின் தாய் தந்தை, இடது ஓரத்தில் தாய் மாமன். கீழ் வரிசையில் நாலு சகோதரர்கள், மேல் வரிசையில் டவாலியின் கையில் என் அம்மா.

நடு ரோவில் என் அம்மாவின் தாய் தந்தை, இடது ஓரத்தில் தாய் மாமன். கீழ் வரிசையில் நாலு சகோதரர்கள், மேல் வரிசையில் டவாலியின் கையில் என் அம்மா.

என் அம்மா பிறந்தது தாய் மாமன் வீட்டில், அரியலூரில். ஆனால் அந்த சமயம் என் அம்மாவின் அப்பா இருந்த ஊர் ஸ்ரீவைகுண்டம். அங்கு தான் அவர் மழலைப் பருவம் கழிந்தது. அரசாங்க வேலையில் சம்பளம் நிறைய இல்லாவிட்டாலும் அரசாங்க குவார்டர்ஸ், வேலையாட்கள் என்கிற வசதிகள் நிறைய உண்டு. அதுவும் நான்கு ஆண் குழந்தைகளுக்குப் பின் ஒரு பெண் என்பதால் எல்லாராலும் சீராட்டப் பட்டார் என்றே சொல்ல வேண்டும். அண்ணன்கள் எல்லாருமே அந்தக் கால சூழலுக்கேற்ப மரம் ஏறுதல், விளையாட்டு என்பது சண்டையில் முடிதல் என்பது போல் இருந்ததால் என் அம்மாவும் ஒரு Tomboy தான். எதற்கும் அஞ்சமாட்டார்.

இன்னும் சொல்லப் போனால் இவர் ஒரு மருத்துவர் ஆகியிருந்தால் மிகவும் நல்ல பெயர் பெற்றிருப்பார். அண்ணன்களுக்கு அடிபட்டாலும் முதல் உதவி செய்வது இவராகத் தான் இருக்கும். யாரும் வீட்டில் இல்லாத பொழுது இவர் அண்ணன் ஒருவருக்கு முதுகு முழுக்கத் தேள் பல இடங்களில் கொட்டிவிட்டது. சிறுமியாக இருந்தாலும் உடனே கொட்டிய இடத்தில் எல்லாம் சுண்ணாம்பைத் தடவி முதலுதவி செய்திருக்கிறார். இவருக்கு முன் பிறந்த அண்ணனுக்கு சிறு வயதில் போலியோ நோய் தாக்கியதால் வலது கை செயலிழந்து விட்டது. அது இன்று வரை என் அம்மாவுக்குப் பெரிய குறை. அவர் உலகப் புகழ் பெற்ற பொருளாதார நிபுணராக இன்று வலம் வந்தாலும் அவரின் உடற்குறை அவரை இன்றும் மனதளவில் வேதனைக் கொள்ள வைக்கும். பள்ளிக்குப் பேருந்தில் பயணம் செல்லும்போது முதலில் அண்ணனை பத்திரமாக வண்டியில் ஏற்றிவிட்டு அதன்பின் தான் இவர் ஏறுவாராம்.அதனால் ரொம்ப நாள் வரை அந்தப் பேருந்தின் ஓட்டுநர் இவரை தமக்கை என்றும் அவர் அண்ணனை தம்பி என்றும் நினைத்திருந்தாராம்.

ஸ்ரீவைகுண்டத்திற்குப் பிறகு என் தாத்தாவிற்கு பழனிக்குப் போஸ்டிங். எங்கள் தத்தா பாட்டி ஸ்ரீ வைஷ்ணவர்களாக இருந்தாலும் பலமுறை பழனி மலையை வலம் வந்தவர்கள். என் அம்மாவும் ஒரு வேலையாள் இடுப்பில் உட்கார்ந்தவாறு பழனி மலையை அவர்களுடன் வலம் வந்திருக்கிறார். அதன் புண்ணியப் பலனாகத் தான் எனக்கும் முருகன் அருள் கிடைத்திருக்கிறது என்று நினைக்கிறேன். முருகனே என் இஷ்ட தெய்வம்.

பழனிக்குப் பின் சாத்தூர், கோவில்பட்டி, திருநெல்வேலி, செங்கல்பட்டு, கடலூர், தூத்துக்குடி என் பல ஊர்களுக்கு என் பாட்டனாருக்கு transfer ஆனதால் சில சமயம் ஒரே வகுப்பைக் கூட இரண்டு வெவ்வேறு பள்ளிகளில் படித்திருக்கிறாராம். நடுவில் இரண்டு வருடம் அரியலூரில் தாய் மாமா வீட்டில் இருந்தும் படித்திருக்கிறார். அங்கும் மாமாவிற்கு ஐந்து ஆண் பிள்ளைகள் ஒரு பெண். அந்தப் பெண்ணே பின்னாளில் என் அம்மாவின் இரண்டாவது அண்ணனின் மனைவியாக வந்தார்.

அம்மாவிற்குப் படிப்பில் ரொம்ப ஆர்வம் கிடையாது ஆனால் அவர் எந்த விளையாட்டுப் போட்டியில் சேர்ந்தாலும் முதல் பரிசைத் தட்டிக் கொண்டு வந்துவிடுவார். நன்றாகப் பாடுவார். வீட்டில் பாட்டுப் பயிற்சி தரப்பட்டது. அதனால் பாட்டுப் போட்டிகளிலும், அண்ணன்கள் trainingல் பேச்சுப் போட்டிகளிலும் எப்பவும் அம்மாவிற்கு முதல் பரிசு தான். பின்னாளில் பாட்டுப் பயிற்சியைத் தொடர்ந்திருக்கலாம். சந்தர்ப்பம் சரியாக அமையவில்லை என்று நினைக்கிறேன்.

என் தாத்தா எந்தெந்த ஊரில் வேலை பார்த்தாலும் அதன் சுற்றுப்புறத்தில் இருக்கும் இடங்களுக்கு எல்லாம் கோடை விடுமுறைகளில் இவர்களை அழைத்துச் சென்றதால் என் அம்மா தென் இந்தியாவில் அநேக ஊர்களையும், கோவில்களையும், அருவிகளையும், நதிகளையும் பார்த்து இருக்கிறார். இயற்கையிலேயே இவருக்கு சரித்திரத்திலும் பூகோளத்திலும் மிகுந்த ஆர்வம். எந்த இடம் சென்றாலும் அவ்விடத்தின் கதையைப் பற்றித் தெரிந்து கொள்வதில் தான் அதிக ஆர்வம் காட்டுவார். இன்றும் கோவில்களுக்குச் சென்றாலும் சிற்பங்களையும் அந்தக் கோவிலைக் கட்டிய அரசரைப் பற்றியும் தெரிந்து கொள்ளவே மிகுந்த ஆர்வமாக இருப்பார்.

ஒரு முறை மகாத்மா காந்தியின் சொற்பொழிவைக் கேட்கவும் அவரை கண்ணால் கண்டு மகிழவும் இவரின் அம்மாவும் ஒரு அண்ணனும் மதுரைக்குச் சென்ற போது இவர் சிறுமியாக இருந்ததால் இவரை அழைத்துப் போகாதது இவருக்கு மிகுந்த வருத்தம். காந்தியைப் பார்க்க முடிந்த ஒரு அரிய வாய்ப்பை அவர் தவற விட்டதை நினைத்து அளவில்லா வருத்தமே. காந்திஜி சுடப்பட்டு இறந்த செய்தி வானொலியில் ஒலிபரப்பப்பட்டு இவர் காதில் விழுந்த பொழுது இவர் ஒரு கோவிலில் இருந்திருக்கிறார். விடாமல் கோவிலை வலம் வந்து இவர் கேட்ட செய்தி பொய்யாக இருக்க வேண்டுமே என்று இறைவனைப் பிரார்த்தித்து அழுதிருக்கிறார். இளம் வயதிலேயே அவருக்கு நிறைய தேசிய உணர்வு உண்டு. இராமன் ஆண்டால் என்ன இராவணன் ஆண்டால் என்று இருக்க மாட்டார். அரசியலில் நடப்பதைக் கூர்ந்து கவனிப்பார்.

பிராணிகளிடமும் நிறைய அன்பு! கால் ஒடிந்த பறவையோ, தாயில்லா பூனைக்குட்டியோ இவரின் பராமரிப்பில் நன்றாகிவிடும். இவர் இண்டர்மீடியட் இரு வருட படிப்பினை ஒரு வருடம் திருச்சியிலும், ஒரு வருடம் பாளையங்கோட்டையிலும் படித்து முடித்தார். பின்பு பட்டப் படிப்புக்கு இவரின் அண்ணன்களின் பிடிவாதத்தால் மெட்ராஸ் Queen Mary’s கல்லூரியில் சேர்ந்து இரண்டு வருட பட்டப் படிப்பை ஒரே ஊரில் படித்து சாதனை படைத்தார். படிப்பை விட எப்பவும் போல என் அம்மா மற்ற செயல்பாடுகளில் முன்னின்று, பல குழுக்களின் செயலாளராக பங்காற்றி Queen Mary’s கல்லூரி பிரபலமாக இருந்தார் 🙂

maggiegrad

என் அம்மா என் அப்பாவை திருமணம் புரிந்த பிறகு அவரின் கவலையற்ற வாழ்க்கை ஒரு முடிவுக்கு வந்து பொறுப்புள்ள தலைவியாக அவரை மாற்றியது. என் அப்பா மிகவும் எளிமையானக் குடும்பத்தில் மூத்த மகனாப் பிறந்து குடும்ப சுமையைத் தாங்கும் அவசியம் இருந்ததால்  என் அம்மா அவருக்கு உற்றத் துணையாக மாறி தோள் கொடுத்தார். என் தாத்தாவிற்கு என் அப்பாவை மருமகனாக்கிக் கொள்ள முக்கியக் காரணம் அவரின் நேர்மையும், கடின உழைப்பும், அன்பான அணுகுமுறையும் தான். இல்லாவிட்டால் ஒரே பெண்ணை இவ்வளவு பெரிய குடும்பத்தின் மூத்த மருமகளாகக் கொடுத்திருப்பாரா என்பது சந்தேகம்.

திருமண புகைப்படம்

திருமண புகைப்படம்

 

தாஜ் மகாலில்

தாஜ் மகாலில்

மேல் படத்தில் நான் என் அம்மாவுடன், கீழ் படத்தில் என் தம்பி.

மேல் படத்தில் நான் என் அம்மாவுடன், கீழ் படத்தில் என் தம்பி.

என் நான்கு அத்தைகளுக்கும் என் அம்மாவும் அப்பாவும் தான் திருமணம் செய்து வைத்தனர். ஒரு சித்தப்பா என் பெற்றோரின் திருமணத்திற்குப் பின் பிறந்தவர். சித்தாப்பாக்களைப் படிக்க வைத்து அவர்களுக்கும் திருமணம் நடத்தி எல்லா உறவுகளையும் என் அம்மா அரவணைத்துக் கொண்டாடினார். என் தந்தை வழி தாத்தா ரொம்ப சிம்பிள்டன். எளிமையானவர் ஆனால் சாமர்த்தியம் கிடையாது. என் பாட்டி முடிந்த வரை தன் சாமர்த்தியத்தில் குடும்பத்தை நடத்தினார். ஆனாலும் அவருக்கும் எல்லா சுமையையும் என் அப்பா மீது சுமத்தி விட்டது மனதுக்கு வேதனையை அளித்தது. என் பாட்டி கேன்சர் வந்து 63 வயதிலேயே இறந்து விட்டார். என் அப்பா அவருக்கு 13 வயதில் பிறந்தவர். தாயின் மேல் மிகுந்த பாசம் உண்டு. என் தாத்தா அதற்கு பின் பல வருடங்கள் நல்ல முறையில் வாழ்ந்து தனது 93வது வயதில் தான் இயற்கை எய்தினார்.

என் தந்தை முதலில் பெரிய நிறுவனத்தில் வேலை செய்து வந்தார். அவர் நல்ல நிலைக்கு வர ரொம்பக் கஷ்டப்பட்டதால் பலருக்கும் வேலை வாய்ப்புக் கொடுக்க வேண்டும் என்ற எண்ணம் இளம் வயது முதலே அவருக்கு இருந்தது. அதனால் அவர் ஆட்டோமொபைல் ஸ்பேர் பார்ட்ஸ் செய்யும் சிறு தொழிற்சாலையை ஆரம்பித்தார். மிகவும் நல்ல முறையில் நடந்த அந்த தொழிற்சாலை, ஒரு பார்ட்னர் ஏமாற்றியதால் பெரும் நஷ்டம் ஏற்பட்டது. அவர் தனியாகவும் இன்னொரு நிறுவனத்தையும் ஆரம்பித்திருந்தார். அதில் பால் பேரிங்க்ஸ் செய்ய ரிசர்ச் அண்ட் டெவலப்மெண்டிற்கு நிறைய முதலீடு செய்ததால் அதிலும் பல பணப் பிரச்சினைகளை சந்திக்க நேர்ந்தது.

என் அம்மா தான் ஆபிஸ் நிர்வாகத்தை முதலில் இருந்து கவனித்து வந்தார். அவர் திருமணத்திற்குப் பிறகு என் தந்தையின் உந்துதலின் பேரில் B.Ed படிப்பையும் முடித்திருந்தார். ஆனால் ஆசிரியர் வேலைக்குச் சென்றதில்லை. மிகச் சிறந்த நிர்வாகி. என் தந்தை மிகப் பெரிய  பொறியாளர் ஆயினும் அதிர்ஷ்டம் இல்லை. பால் பேரிங்க்ஸ் அது வரை ஜப்பானில் இருந்தும் ஜெர்மனியில் இருந்தும் தான் இம்போர்ட் செய்யப்பட்டது. முதன் முதலில் ஒரு ஸ்மால் ஸ்கேல் இண்டஸ்ட்ரியில் இன்டிஜீனஸ் மெஷீன்களுடன் உள்நாட்டு டெக்னாலஜியுடன் பால் பேரிங்க்சை தயாரித்த முதல் இந்தியர் என் தந்தை. ஆனால் ப்ரொடக்ஷன் காஸ்ட் அதிகம். வெளிநாட்டுப் பொருளின் குறைந்த விலையோடு  போட்டிப் போட முடியவில்லை.

எத்தனையோ பணப் பிரச்சினைகளையும், வங்கிக் கடன், தனியார் கடன் இவற்றை சமாளித்து என்னையும் என் தம்பியையும் நல்ல முறையில் வளர்த்ததில் என் தாயின் பங்கு மிகப் பெரியது. அவர் தைரிய லட்சுமி. எதற்கும் கலங்காமல், அடுத்து என்ன செய்வது என்று யோசித்து செயல் புரிந்தார்.

இதன் பின் தான் உண்மையான சோதனைக் காலம் ஆரம்பித்தது. என் தந்தைக்கு பார்கின்சன்ஸ் டிசீஸ் வந்துள்ளது தெரிய வந்தது. முதலில் அவரது வலது கை ஒத்துழைக்காமல் இருந்தது. அந்த சமயம் நான் திருமணம் முடிந்து அமெரிக்கா சென்று விட்டேன். பார்கின்சன்ஸ் டிசீசுக்கு இன்று வரை நோய் தீர்க்கும் மருந்து கண்டுபிக்கப் படவில்லை. அது கொஞ்சம் கொஞ்சமாக ஒருவரின் அவயங்களை செயலிழக்கச் செய்யும். அந்த நோய் இந்தியாவில் பொதுவாக யாருக்கும் வருவதும் குறைவு. அதனால் நோய் பற்றிய ஞானமும் குறைவு. ஆனால் என் அப்பா மிக மிக பாசிடிவ் பெர்சன். எத்தனையோ கஷ்டங்களைப் பார்த்தவர், இதைக் கண்டும் அசரவில்லை.  பார்கின்சன்ஸ் நோயுடன் இருபது வருடம் போராட்ட வாழ்வு வாழ்ந்தார். நான் அவரைப் பற்றி தனியாக ஒரு புத்தகம் எழுதியுள்ளேன். படிப்படியாக அவர் தன் நிலையை உயர்த்திக் கொண்டு மனிதன் தெய்வ நிலையை, வாழும் போதே அடைய முடியும் என்னும் பாடத்தை எங்களுக்கு உணர்த்திச் சென்றார்.

இத்தனை நாள் வியாபாரத்தில் என் அப்பாவிற்கு வலது கையாக இருந்த என் அம்மா உண்மையில் உமையொரு பாகனாக மாறினாள். எத்தனையோ வருடங்கள் அம்மா தான் முழுக்க முழுக்கப் பார்த்துக் கொள்ளும் நிலையில் என் தந்தை இருந்தார். உணவு ஊட்டுவதில் இருந்து குளிப்பாட்டி விடுவது வரை எல்லாமே என் தாய் தான். உதவிக்கு ஆள் இருந்தும் பலப் பல விஷயங்கள் என் அம்மா ஒருவரால் தான் என் தந்தைக்கு சரியாகச் செய்ய முடியும். அதை இன்முகத்துடன் செய்தார் என் தாய். காந்தாரி திருதிராஷ்டிரனுக்குப் பார்வை இல்லை என்று தானும் தன கண்ணைக் கட்டிக் கொண்டாள், ஆனால் என் தாய் ஒரு படி மேல். என் தந்தைக்குக் கண்ணாகவே இருந்தாள்.

என் தந்தைக்கு என் தாய் மேல் மிகுந்த காதல், அன்பு, பாசம். பெரிய இடத்துப் பெண் தன்னை விருப்பத்துடன் திருமணம் செய்து கொண்டது அவருக்கு மிகப் பெரிய பெருமை. அவர்களின் திருமணத்தில் K.B.சுந்தராம்பாள் கச்சேரியும், கொத்தமங்கலம் சுப்புவின் கச்சேரியும் நடைபெற்றது. தெரு அடைத்துப் பந்தல் போட்டு பாண்டிச்சேரியில் என் பெற்றோர் திருமணம் கோலாகலமாக நடந்தது. அதனால் என் தந்தை என் அம்மாவை மனத்தில் ராணியைப் போல தான் வைத்திருந்தார். மரகதம் என்ற என் அம்மாவின் பெயரை திருமணத்திற்குப் பின் அவர் மேகி என்று தான் சுருக்கி ஸ்டைலிஷ் ஆக அழைப்பார். அதனால் இன்றும் எங்கள் வீட்டுக் குழந்தைகள் என் அம்மாவை மேகி பாட்டி என்று தான் அழைக்கின்றனர் 🙂

என் அம்மாவிற்கு நிறைய படிக்கப் பிடிக்கும், உலக விஷயங்கள் அனைத்திலும் ரொம்ப ஈடுபாடு, எந்த டாபிக் பற்றியும் அறிவுசார்ந்து பேச முடியும். அன்பே நிறைந்த என் அம்மாவிற்கு உடல் ஆரோக்கியத்தையும் நீண்ட மகிழ்ச்சியான வாழ்க்கையையும் தர எல்லாம் வல்ல இறைவனையும் என் தந்தையையும் வேண்டிக் கேட்டுக் கொள்கிறேன்.

அமெரிக்காவில்

அமெரிக்காவில்

சிங்கப்பூரில்

சிங்கப்பூரில்

 

 

 

என் தந்தையின் 80வது பிறந்த நாளின் போது.

என் தந்தையின் 80வது பிறந்த நாளின் போது.

 

என் வலைதளத்தில் இது என் நூறாவது இடுகை. இதை என் அம்மாவிற்கு சமர்ப்பிக்கிறேன் 🙂

 

மன்னு புகழ் கோசலை தன்… இராகவன் தாலாட்டு.

kulasekara perumals aradhanai murthy

குலசேகர ஆழ்வார் ஆராதனை மூர்த்தி

சில நாட்களாக குலசேகர ஆழ்வார் அருளிய இராகவனைத் தாலாட்டும் பாடல்களைத் திரும்பத் திரும்பப் படிக்க மனம் ஏங்கியது. அந்தப் பாடல்களில் தெரிந்த அபரீதமான அன்பு என்னை மெய் மறக்க செய்தது. Love என்று சிம்பிளாக ஆங்கிலத்தில் சொல்லப்படும் அன்பு பல வகைப் படும். காதலன் காதலியிடம் காட்டுவது, கணவன் மனைவியிடம் காட்டுவது, பெற்றோர் மக்களிடம், மக்கள் பெற்றோரிடம், நண்பர்களுக்கிடையே, இப்படி எத்தனையோ விதமான அன்புகள். அன்பின் ஆழத்தைப் பொருத்தும் நம் பொருளாதார நிலையை பொருத்தும் நாம் அன்பை வெளிப்படுத்தும் விதங்களும் மாறுபடும்.

அதில் மிகவும் எளிமையானதும் தூய்மையானதும் ஒரு குழந்தையிடம் நாம் காட்டும் அன்பே ஆகும். குழந்தைக்கு நம்மிடம் இருந்து எந்த எதிர்ப்பார்ப்பும் இல்லை. நமக்கும் குழந்தையிடம் இருந்து பிரதி பலனாக எதையும் பெற முடியாது. தன்னலமற்ற மகிழ்ச்சியின் வெளிப்பாடே குழந்தைகளிடம் நாம் காட்டும் அன்பு.

குலசேகர ஆழ்வாரோ பெருமாளிடம், முக்கியமாக இராமனிடம் அதிகமான பக்தி வைத்திருந்தவர். இராம கதையைக் கேட்கும் பொழுதே அது என்றோ நடந்தது என்பாதை கூட உணராமல் யுத்தக் காண்டத்தின் போது இராவணனுக்கு எதிராக போர் தொடுக்க தன் படையுடன் கிளம்பி கடலில் இறங்கி விட்டார். அந்த அளவு இராம பக்தி. அப்படிப்பட்டவர் தாயாகி இராமனை தாலாட்டிப் பாடும் பாடல்களின் சுவையை சொல்லவும் வேண்டுமோ?

kulasekara azhvar

குலசேகர ஆழ்வார்

மன்னுபுகழ் கோசலை தன் மணிவயிறு வாய்த்தவனே!
தென்னிலங்கை கோன் முடிகள் சிந்துவித்தாய்! செம்பொன் சேர்
கன்னி நன் மா மதில் புடை சூழ் கணபுரத்தென் கருமணியே!
என்னுடைய இன்னமுதே! இராகவனே! தாலேலோ!

இந்தப் பாடலைப் படித்தாலே போதும், பொருள் புரிந்துவிடும். அவ்வளவு எளிமையான சொற்கள். புகழ் மிக்க கௌசல்யாவின் மணி வயிற்றில் உதித்தவனே, இராவணனின் முடியைத் தரையில் சாய்த்தவனே, அழகிய மதிள்கள் சூழ்ந்திருக்கும் திருக்கண்ணபுரத்தில் வாழும் என் கரிய மாணிக்கமே, என் இனிய அமுதே, இராகவனே, தாலேலோ! இப்படி அருமையாகத் தாலாட்டுப் பாடுகிறார் குலசேகர ஆழ்வார்.
புண்டரிக மலர் அதன் மேல் புவனியெல்லாம் படைத்தவனே!
திண் திறலாள் தாடகை தன் உரம் உருவச் சிலை வளைத்தாய்!
கண்டவர் தம் மனம் வழங்கும் கணபுரத்தென் கருமணியே!
எண் திசையும் ஆளுடையாய்! இராகவனே! தாலேலோ!
தாமரை மலர் மேல் பிரம்மன் உருவில் இருந்து இந்த உலகத்தைப் படைத்தவனே, மிகுந்த வலிமை கொண்ட தாடகையின் வலிமை எல்லாம் அழியும் படி வில்லை வளைத்தவனே, பார்த்தவர்கள் எல்லாரும் மனம் மயங்கும் பேரழகைக் கொண்டவனே, திருக்கண்ணபுரத்தில் வாழும் என் கண்மணியே, இராகவனே தாலேலோ.
கொங்கு மலி கருங்குழலாள் கோசலை தன் குலமதலாய்!
தங்கு பெரும் புகழ்ச் சனகன் திருமருகா! தாசரதீ!
கங்கையிலும் தீர்த்த மலி கணபுரத்தென் கருமணியே!
எங்கள் குலத்தின்னமுதே! இராகவனே! தாலேலோ
பரிமளம் நிறைந்த கருங்கூந்தலையுடைய கோசலையின் குலத்தில் உதித்தவனே, பெரும் புகழ் கொண்ட சனகனின் மருமகனே, தசரதனின் புதல்வனே, கங்கையை விட சிறந்த தீர்த்தங்களை உடைய திருக்கண்ணபுரத்தில் வசிக்கும் என் கண்மணியே, இராகவா, தாலேலோ. இந்தப் பாடலில் எனக்கு ரொம்பப் பிடித்தது இராமனை தாசரதீ என்று குலசேகர ஆழ்வார் அழைப்பதே. கோசலையின் குலத்தில் உதித்த தாசரதீ. குலசேகர ஆழ்வாரும் அரசன், தன்னைப் போன்று அரச குலத்தில் உதித்த தசரதன் மைந்தன் என்ற பெருமையாக சொல்கிறாரோ என்று தோன்றுகிறது.
smiling rama
தாமரை மேல் அயன் அவனைப் படைத்தவனே! தசரதன் தன்
மாமதலாய்! மைதிலி தன் மணவாளா! வண்டினங்கள்
காமரங்கள் இசை பாடும் கணபுரத்தென் கருமணியே!
ஏமருவும் சிலை வலவா! இராகவனே! தாலேலோ!
தாமரை மேல் பிரமனைப் படைத்தவனே, தசரதனின் பெருமை மிக்க குழந்தையே, மிதிலை இளவரசியின் மணவாளனே! வண்டு கூட்டங்கள் பூக்களில் மது உண்டு இசை பாடும் திருக்கண்ணபுரத்தில் வாழும் என் கருமணியே, வலக்கையில் மிகப் பெரிய வில்லினை ஏந்தியவா, இராகவனே, தாலேலோ! இந்தப் பாடலில் உள்ள கவி நயம் மனத்தை உருக்குகிறது. இராகவனை போற்றி போற்றி பாடுகின்ற இப்பாடலைக் கேட்டு நம் உள்ளம் கொள்ளைப் போவது திண்ணம்.
பாராளும் படர் செல்வம் பரத நம்பிக்கே அருளி
ஆரா அன்பு இளையவனோடு அருங்கானம் அடைந்தவனே!
சீராளும் வரை மார்பா! திருக்கண்ணபுரத்தரசே!
தாராளும் நீண்முடி என் தாசரதீ! தாலேலோ!
நாட்டை ஆளும் உரிமையையும், அதோடு அடர்ந்த செல்வத்தையும் பரதனுக்கு வழங்கி, தீராத அன்பை உடைய தம்பி இலக்குவனோடு அருமையானக் காட்டை அடைந்தவனே, அழகான மலைப் போன்ற மார்பை உடையவனே, திருக்கண்ணபுரத்தஅரசே, மாலையை அணிந்த நீண்ட முடியைக் கொண்ட என் தாசரதீயே தாலேலோ. இதை எழுதும்போதே என் கண்களில் நீர் சுரக்கின்றது. என்ன ஒரு description! கொடைத் தன்மையும், அழகும், அன்பும் நிறைந்த என் இராகவா தாலேலோ என்கிறார் குலசேகராழ்வார்.
சுற்றம் எல்லாம் பின் தொடரத் தொல் கானம் அடைந்தவனே!
அற்றவர்கட்கு அருமருந்தே! அயோத்தி நகர்க்கு அதிபதியே!
கற்றவர்கள் தாம் வாழும் கணபுரத்தென் கருமணியே!
சிற்றவை தன் சொல்கொண்ட சீராமா! தாலேலோ!
உற்றார் உறவினர் எல்லாரும் பின் தொடர, பழமையானக் காட்டை அடைந்தவனே, வேறு கதி இல்லாதவர்களுக்கு அரு மருந்து போன்றவனே, அயோத்தி நகருக்கு அரசனே, கற்றவர்கள் வாழும் திருக்கண்ணபுரத்தில் வசிக்கும் என் கண்ணின் மணியே, சித்தியின் சொல்லை சிரமேற்கொண்ட சீராமா தாலேலோ.
Bhadrachalam1
ஆலின் இலைப் பாலகனாய் அன்றுலகம் உண்டவனே!
வாலியை கொன்று அரசு இளைய வானரத்துக்கு அளித்தவனே!
காலின் மணி கரையலைக்கும் கணபுரத்தென் கருமணியே!
ஆலிநகர்க்கதிபதியே! அயோத்திமனே! தாலேலோ!
ஆலிலையின் மேல் சின்னக் கண்ணனாய் இருந்து பின்பு பிரளயக் காலத்தில் உலகம் அனைத்தையும் உண்டவனே, வாலியைக் கொன்று கிஷ்கிந்தையை சுக்ரீவனுக்குக் கொடுத்தவனே, காலின் மணி நதியின் கரையின் மேல் அலை அடிக்கும் படி செய்யும் திருக்கண்ணபுரத்தில் வாழும் என் கண்ணின் மணியே, ஆலி நகரின் அதிபதியே, அயோத்தி மன்னனே, தாலேலோ!
மலையதனால் அணை கட்டி மதிளிலங்கை அழித்தவனே!
அலைகடலைக் கடைந்து அமரர்க்கு அமுதருளிச் செய்தவனே!
கலை வலவர் தாம் வாழும் கணபுரத்தென் கருமணியே!
சிலை வலவா! சேவகனே! சீராமா! தாலேலோ!
பாறைகளினால் அணைக்கட்டி இலங்கையை அழித்தவனே, கூர்மாவதாரத்தில் அலைகடலைக் கடைந்து தேவர்களுக்கு அமிர்தத்தை அளித்தவனே, கலையில் வல்லவர்கள் வாழும் திருக்கண்ணபுரத்தில் வாழும் கண்மணியே, வலக்கையில் வில் வைத்திருப்பவனே, சேவகனே, சீராமா, தாலேலோ.
தளை அவிழும் நறுங்குஞ்சித் தயரதன் தன் குலமதலாய்!
வளையவொரு சிலையதனால் மதிளிலங்கை அழித்தவனே!
களை கழுநீர் மருங்கு அலரும் கணபுரத்தென் கருமணியே!
இளையவர்கட்கு அருளுடையாய்! இராகவனே! தாலேலோ!
சுருள் முடியை உடைய தயரதன் குலத்தில் உதித்தக் குழந்தையே, வளைந்த வில்லை வைத்து பெரிய மதிள் சுவரை உடைய இலங்கையை வென்றவனே, கழுநீர் பூக்கள் எங்கும் மலரும் திருக்கண்ணபுரத்தில் வாழும் என் கண்மணியே, பக்தர்களுக்கு அருள் புரிபவனே, இராகவனே, தாலேலோ.
ramasita1
தேவரையும் அசுரரையும் திசைகளையும் படைத்தவனே!
யாவரும் வந்தடி வணங்க அரங்க நகர் துயின்றவனே!
காவிரி நல் நதி பாயும் கணபுரத்தென் கருமணியே!
ஏவரி செஞ்சிலை வலவா! இராகவனே! தாலேலோ!
தேவரையும், அசுரர்களையும், திசைகளையும் படைத்தவனே, எல்லோரும் வந்து உன் திருவடி வணங்க அரங்கத்தில் துயில்கின்றவனே, காவிரி நதி பாயும் திருக்கண்ணபுரத்தில் வாழும் மாணிக்கமே, நெடிய, சிறந்த வில்லை வலக்கையில் உடையவனே, இராகவனே, தாலேலோ.
கன்னி நன் மா மதிள் புடை சூழ் கணபுரத்தென் காகுத்தன்
தன்னடிமேல் தாலேலோ என்றுரைத்த தமிழ்மாலை
கொல் நவிலும் வேல் வலவன் குடைக்குலசேகரன் சொன்ன
பன்னிய நூல் பத்தும் வல்லார் பாங்காய பத்தர்களே!
எதிரிகளால் வெல்ல முடியாத பெரிய மதிள்கள் சூழ்ந்த திருக்கண்ணபுரத்தில் வாழும் என் காகுத்தன் திருவடி மேல் தாலேலோ என்று சொன்ன தமிழ்மாலையை, பகைவரைக் கொல்லத் துடிக்கும் வேலை வலக்கையில் ஏந்திய வெண்கொற்றக் குடையைக் கொண்ட குலசேகர மன்னன் சொன்ன இந்த வேதத்துக்கு ஒப்பான பத்து பாடல்களிலும் வல்லவர்கள் இறைவனுடன் என்றும் நட்பு கொண்ட பக்தர்கள் ஆவார்கள்!
kodanda raman
இந்தப் பாசுரங்களைக் கேட்டு மகிழ்ந்துறங்கும் இராகவன் தான் எப்பேர்ப்பட்டவன். இந்த மாதிரி ஒரு பக்தனை அடைந்த இராகவனின் பெருமையை நம்மால் சொல்லவும் முடியுமோ?
பாம்பே ஜெயஸ்ரீ பாடிய பாடலின் மூலம் தான் இந்தப் பாடல்களைப் படிக்க ஆவல் கொண்டேன். அதன் சுட்டி இங்கே.
நிச்சயம் மெய்மறந்து கேட்பீர்கள்.
                      ஆழ்வார் திருவடிகளே சரணம்.
திருக்கண்ணபுரம்

திருக்கண்ணபுரம்

Thanks to this blog post which  I referred to http://kannansongs.blogspot.in/2007/09/68.html

நீங்களும் ஆகலாம் அப்பாடக்கர் Unleash the Appatucker in you – புத்தக மதிப்பீடு

vibrantsubbu

இமய மலையில் ஐஸ் வித்துவிடுவார் இந்தப் புத்தகத்தை எழுதியுள்ள வைப்ரன்ட் சுப்பு! எனக்கும் ஸெல்ப் help புத்தகங்களுக்கும் வெகு தூரம். என்னையே புத்தகத்தைக் கையில் எடுத்தப் பின் கடைசி பக்கம் முடித்தப் பின் தான் கீழே வைக்கும்படி செய்த அவரின் வைப்ரன்ட் எழுத்தாற்றலும் செறிவான கருத்துக் கோவையும் பாராட்டுக்குரியது.

தலைப்பே very catchy! இராமயணத்தில் ரிஷ்யஸ்ரிஞர் என்று ஒரு முனிவர். அவரின் தமிழ் பெயர் கலைக் கோட்டு முனி. கலை என்றால் மான், கோடு என்றால் கொம்பு. அந்த முனிவரின் நெற்றியில் ஒரு சிறு கொம்புப் போல இருக்கும். அவர் மகா பெரிய அறிஞர். நாம் பேச்சு வழக்கில் பலமுறை அவன் தலையில் என்ன கொம்பா முளைத்திருக்கிறது என்று கேட்போம், அதாவது அவன் என்ன எல்லாம் தெரிந்த ஞானியா என்ற பொருளில். அதுவே இப்போ பேசும்போது அவன் என்ன பெரிய அப்பாடக்கரா என்று கேட்கும் வழக்கம் வந்துள்ளது. இரண்டு சொற்றொடருக்குமமே எப்படி அந்த சொல்வழக்கு வந்தது என்று நம்மில் பலபேருக்குத் தெரியாது ஆனால் கேட்பவருக்கு நாம் என்ன சொல்கிறோம் என்று கண்டிப்பாகப் புரிந்து விடும்.

அது மாதிரி அப்பாடக்கர் என்ற சொல்லும் பழக்கத்தில் வருவதற்கு ஒரு அழகிய காரணம் உள்ளதை இந்தப் புத்தகத்தின் ஆரம்பத்திலேயே தெரிந்துகொள்ளலாம். சென்னையில் வசிப்பவர்களுக்கு இந்த சொல் வெகு பிரபலம். ஆனால் மற்றவர்களுக்கு நடிகர் சந்தானம் சினிமாவில் பயன்படுத்தியதால் தெரிய வந்திருக்கும். அந்த வகையில் இதை பிரபலப் படுத்திய சந்தானத்துக்கு பதிப்பகத்தார் ஒரு புத்தகத்தை இலவசமாக அனுப்பிவைக்கலாம் 🙂

எவரையும் கவரும் எளிமையான எழுத்து இந்தப் புத்தகத்தின் முதல் ப்ளஸ் பாயின்ட். இரண்டாவது, சின்ன சின்ன real life உதாரணகள் மூலம் சொல்ல வந்தக் கருத்தை சுவாரசியமாக சொல்லியுள்ளார் ஆசிரியர் சுப்பு. The book has a very analytical approach. அதனால் படிப்பவர்களை சிந்திக்க வைத்து அவர் சொல்ல வந்ததை மனத்தில் ஏற்றுக் கொள்ள வைக்கிறது. There is no preaching. இப்படி செய் அப்படி செய் என்றால் படிப்பவர்கள் நீ என்ன பெரிய அப்பாடக்கரா? எனக்கு சொல்ல வந்துட்டான்னு புத்தகத்தை மூடி வைத்துவிட்டுப் போய்விடுவார்கள். அந்த மாதிரி தொனி இல்லாமல் ஆழ்ந்த கருத்துக்களையும், நாம் வாழ்க்கையில் முன்னேற எப்படி நம்மை மாற்றிக் கொள்ளவேண்டும் என்பதையும் சாதாரணமாக சொல்லி எடுத்துக் கொள்வதா வேண்டாமா என்பதை படிப்பவர் முடிவுக்கு விட்டு விடுகிறார். இது நல்ல உக்தி.

இந்தப் புத்தகம் பள்ளி கல்லூரி மாணவர்களுக்கு மிகவும் பயனுள்ளதாக இருக்கும். அந்த வயதுள்ளோருக்கு இந்தப் புத்தகம் அதிக தாக்கத்தை ஏற்படுத்தும். ஆனால் இதை யார் வேண்டுமானாலும் படித்துப் பயன் பெறலாம். அவர் இன்று பிரபலமாக இருக்கும் பலரின் ஆரம்ப வாழ்க்கையை சொல்லி அவர்களின் முன்னேற்றத்தை விவரிக்கும்போது நம்மாலும் முயன்றால் இந்த நிலையை அடையலாம் என்கிற எண்ணம் சட்டென்று மனத்திற்குள் வந்து அமருகிறது.

உழைப்புக்குக் குறுக்கு வழி கிடையாது என்பதையும் மாற்றி சிந்திக்கும்போது வெற்றி எளிதாகிறது என்பதையும் புரிந்துகொள்கிறோம். இலக்கு என்ன என்பதை முதலில் நிர்ணயித்துக் கொண்டால் வழி எளிதாகிறது. இல்லையென்றால் நாம் செக்கு மாட்டைப் போல ஒரே இடத்தில் உழன்று கொண்டிருப்போம், எந்த முன்னேற்றமும் இல்லாமல்.

இந்தப் புத்தகத்தில் எனக்குப் பிடித்த ஒரு கருத்து, “நீங்கள் எங்கே பிறந்தீர்கள்; யாருக்குப் பிறந்தீர்கள்; எந்த நிலையில் பிறந்தீர்கள் என்பதைப் பொறுத்து உங்கள் சாதனையும் வெற்றியும் அமைவதில்லை. ஆகவே அடுத்தவர்களைக் குறைசொல்வதை நிறுத்துங்கள்.”

இந்தப் புத்தகத்தின் பதிப்பகத்தார் “முன்னேர் பதிப்பகம்”. தரமான ஒரு புத்தகத்தை வெளியிட்டதற்கு ஒரு பாராட்டு பொக்கே 🙂 நாலு வரி நோட் பாகம் 1,2,3 க்குப் பிறகு இந்தப் புத்தகத்தை வெளியிடுகிறார்கள் என்று நினைக்கிறேன். நல்ல விற்பனை ஆகி மேலும் நல்ல புத்தகங்களை வெளியிட வாழ்த்துகள்.

ஆசிரியர் வைப்ரன்ட் சுப்புவின் பெயர் காரணம் இந்தப் புத்தகத்தைப் படிக்க ஆரம்பித்தவுடன் புரிந்துகொண்டேன் 🙂 அவருக்கும் என் மனமார்ந்த பாராட்டுகள்.

முன்னேர் பதிப்பகம் +91 (0)9900160925

munnerpub@gmail.com

author email: vibrantsubbu@gmail.com

விலை: Rs.75

bouquet

மஞ்சப் பை – திரை விமர்சனம்

 

 

 

Manaja-Pai-Movie-Wallpaper-005

ராஜ் கிரணுக்கு அவார்ட் வாங்கிக் கொடுக்கப் போகும் படம் இது. அற்புதமான நடிப்பு, விமலுக்குத் தாத்தாவாகவே வாழ்ந்திருக்கிறார். துளி பாசாங்கு இல்லை. துளி ஓவர் அக்டிங் இல்லை. நான் அவரை நேரில் சந்திக்கும் வாய்ப்பு கிடைத்தால் பாராட்டி மகிழ்வேன்.

நல்ல திரைக் கதை. கிராமத்தில் இருக்கும் ஒருவர் முதல் முறை நகரத்துக்கு வந்து ஒரு அடுக்கு மாடி குடியிருப்பில் கிராமத்து வாழ்க்கை வாழ்க்கையைத் தொடர்ந்து வாழ்கிறார். விமலுக்கும் ராஜ் கிரணுக்கும் இருக்கும் பாசப் பினைப்புக்கானக் காரணம் முன்கதை சுருக்கமாக கனகச்சிதம். பல படங்களில் அஸ்திவாரம் வீக்காகவும் பில்டிங் ஸ்டிராங்காகவும் கட்டி நாம் பார்க்கும் இரண்டரை மணி நேரத்திலேயே கட்டிடம் சரிந்து விழுந்து விடுகிறது.

ரொம்ப நாளைக்குப் பிறகு ஒரு கனமான கதை. துணுக்குத் தோரணங்களும் நகைச்சுவை என்ற பெயரில் மொக்கை ஜோக்குகளும் இல்லாமல் அதே சமயம் தாத்தாவின் செயல்களிலேயே ஒரு நகைச்சுவையை இழையோட வைத்துக் கதையை தந்திருக்கிறார் இயக்கி/எழுத்து வடிவும் கொடுத்திருக்கும் N.ராகவன்.

இப்பொழுது வரும் பலத் திரைப்படங்களில் முதல் பாதி நன்றாக் இருந்தும் பின் பாதி காலை வாரி விட்டுவிடுகிறது. உண்மையிலேயே இடைவெளிக்குப் பிறகு பக் பக்கென்று பயந்து கொண்டிருந்தேன். இரண்டாவது பாதியில் சொதப்பிவிடுவார்களோ என்று. சொதப்பவில்லை. பின் பாதியும் நன்றே. ஆனால் பின் பாதி மனத்தை நெகிழவைக்கிறது. அரங்கை விட்டு வெளிவரும்போது ஒருவர் நான் எதுக்குமே அழமாட்டேன், இந்தப் படத்தில் அழுதுவிட்டேன் என்று நண்பரிடம் சொல்லிக் கொண்டு வந்ததைக் கேட்டேன்.

படத்தின் முடிவு நமக்கு வருத்தத்தைத் தந்தாலும் அது சரியான முடிவு. இதைத் தவிர இரண்டு வேறு மாதிரி முடித்திருக்கலாம். ஒன்று happy ending. எல்லாரும் மகிழ்ச்சியாக வீட்டுக்குச் செல்லலாம். இன்னொன்று எப்பொழுதும் சினிமாவில் வைக்கப் படும் ஒரு சோக முடிவு. இவ்விரண்டு முடிவுகளும் அல்லாமல் யதார்த்தமான மூன்றாவதாக ஒரு முடிவைக் கொடுத்த இயக்குநருக்கு ஒரு பெரிய பாராட்டு.

விமல் லட்சுமி மேனன் ஜோடி பொருத்தம் நன்றாக உள்ளது. முத்தக் காட்சி ஒன்னும் கிக்காக இல்லை. சாதா தான். fy fy fy பாடல் மாதிரி இதிலும் ஒரு பாடல். ஆனால் தரத்தில் அந்தப் பாடலுக்குக் கிட்டக் கூட வரவில்லை இதில் உள்ள பாடல். காமிரா இயக்கம் கண்ணைக் கவருகிறது. அதுவும் சென்னை மெரீனா பீச் வரும் காட்சிகளில் காமிராமேன் மாசானியின் கைவண்ணம் அழகு. தேவாவின் Editingம் நேர்த்தி.

இசை ரகுநந்தன். பாடல்கள் சுமார் ரகம். பின்னணி இசை நன்று.

திருப்பதி பிரதர்ஸ் காலரை தூக்கி விட்டுக் கொள்ளலாம், நல்ல ஒரு படத்தைத் தயாரித்துக் கொடுத்ததற்கு! எப்பொழுதுமே கதை இருந்தால் படம் வெற்றி பெரும். இதில் கதை உள்ளது, வெற்றிபெறுமா என்பது மக்கள் கையில் உள்ளது.

manjapai1

உன் சமையல் அறையில் – திரை விமர்சனம்

 

Un Samayal Arayil Movie First Look Posters (3)

பிரகாஷ் ராஜ் இயக்கத்தில் சினேகா-பிரகாஷ் ராஜ் இணைந்து நடித்துள்ளப் படம் உன் சமையல் அறையில். ஒரு முதிர் கன்னிகைக்கும் ஒரு முதிர் காளைக்கும் வரும் காதல் தான் கதை. பிரகாஷ் ராஜும் சினேகாவும் அனாயாசமாக நடித்திருக்கிறார்கள். நாயகி டப்பிங் ஆர்டிஸ்ட், நாயகன் தொல்பொருள் ஆராய்ச்சியாளர், முக்கியமாக ஒரு foodie 🙂 இதெல்லாம் கதைக்கு ஒரு சுவாரசியத்தைக் கொடுக்கிறது. அவர்கள் முதலில் தொடர்புகொள்ளும் சூழலும், பின் காதல் அரும்புவதும் அழகாக உருவாக்கப்பட்டிருக்கிறது. காதலுக்கு வரும் வில்லங்கமும் வித்தியாசமான கோணத்தில் உருவாகிறது. அதற்குப்பின் முடிவை நோக்கி நகரும் கதை ஆமை வேகத்தில் செல்வதும் வயது வந்து காதலிப்பவர்களுக்குத் தேவையான முதிர்ச்சி காதலனுக்கும் காதலிக்கும் இல்லாததும் படத்தின் சறுக்கல்கள்.

படத்தில் ஆதிவாசிகள் பற்றிய ஒரு பகுதி கதைக்கு சிறிதும் ஒட்டாமல் உட்கார்ந்திருக்கிறது. அதை கதையில் கொண்டு வருவதன் மூலம் என்ன சொல்ல வருகிறார் பிரகாஷ்ராஜ் என்று புரியவில்லை. அது பிரகாஷ் ராஜின் கதாப் பாத்திரத்தையும் வலுவிழக்கச் செய்கிறது.

கதை எந்த நகரத்தில் நடக்கிறது என்பதையும் மையமாக நம் ஊகத்துக்கே விட்டிருக்கிறார் இயக்குநர். நடப்பது சென்னையில் இல்லை என்று சென்னைவாசிகளுக்கு நன்றாகத் தெரிந்து விடும். ஹைதிராபாத்தில் படமாக்கப் பட்டிருக்கிறது என்று நினைக்கிறேன். பிரசாத் லேப் என்று அவர்கள் காட்டுவது கூட பிரசாத் லேப் அல்ல, மியுசியமும் நம்ம எழும்பூர் மியுசியம் அல்ல. அது ஒரு மாதிரி நெருடுகிறது.

புது முகம் தேஜஸ் நன்றாக நடித்துள்ளார். அவருக்கு ஜோடியான சம்யுக்தாவும் நன்றாகச் செய்துள்ளார். ஊர்வசி, தம்பி ராமையா, மேலும் இவர் படங்களில் எப்பொழுதும் வரும் ஐஸ்வர்யா, இளங்கோ குமாரவேல் இப்படத்தின் மற்ற நடிகர்கள். வசனங்கள் ஆங்காங்கே பளிச்சிடுகின்றன.

படத்தின் முடிவு எப்படி இருக்கும் என்று யோசிக்க இது பெரிய கம்ப சூத்திரம் அல்ல. நாம் எதிர்ப்பார்க்கும் முடிவு தான். அதனால் திரைக்கதையில் விறுவிறுப்பை ஏற்படுத்தியோ அல்லது ரோமான்சை இன்னும் அழகுற சொல்லியோ படத்தைக் காப்பாற்றி இருக்கலாம். ஜவ்வு மாதிரி இழுத்துவிட்டார்கள். இதே மாதிரி கதை அம்சம் உள்ள இந்திப் படம் சீனி கம்மில் இருந்த சுவாரசியம் இந்தப் படத்தில் காணவில்லை.

என்னை பொறுத்தவரை இன்னுமொரு எரிச்சல், ஒரு பெண்ணுக்கு 3௦ வயது தாண்டியும் திருமணம் ஆகாமல் இருப்பது ஒரு பெரிய குறையாக பாத்திரங்கள் உணர்த்துவது சமூகத்துக்கு தவறான செய்தியைத் இருபத்தியோராம் நூற்றாண்டில் தருகிறது.

இசை, இசைஞானி இளையராஜா. படத்தின் பலம் அவர் இசை. பாடல்கள் அனைத்தும் ஹிட் ஆகி மனத்தில் ஒரு எதிர்ப்பார்ப்பை ஏற்படுத்தி இருந்தன. ஆனால் அந்த அளவு படத்தில் அழகாகப் படமாக்கப் படவில்லை என்பது என் கருத்து. கைலாஷ் கேர் பாடியுள்ள “இந்த பொறப்பு தான்” படத்தில் இரு முறை வருகிறது. ரொம்ப நல்ல பாடல், தெலுங்கில் அவர் பாடியது ரொம்பப் பிடித்தது. ஆனால் தமிழில் உச்சரிப்பு ரொம்ப மோசம்.

உன் சமையல் அறையில் – உப்பும் இல்லாமல் சர்க்கரையும் இல்லாமல் ஒரு bland உணவு!

unsamayalaraiyil