அனேகன் – திரை விமர்சனம்

ஏகன் அநேகன் இறைவனடி வாழ்க என்று சிவபுராணத்தில் வரும். ஒரு தனுஷ் அனேகனாக வரும் படம் இது. கதைப் பஞ்சம் தமிழ் சினிமா உலகில் தலை விரித்தாடுவதால் அநேகன் தனுஷுக்கு பல பாத்திரங்களில் வரும் வாய்ப்பு இருந்தும் நச்சுனு எந்த பாத்திரத்திலும் பதியமுடியவில்லை. இன்னும் வலுவான பாத்திரப் படைப்பு கிடைத்திருந்தால் சும்மா தூள் கிளப்பியிருப்பார். VIP பார்த்துவிட்டு ஆசையோடு போகிறவர்களுக்குக் கொஞ்சம் let down தான் இந்தப் படம். எனிவே லைட் எண்டர்டெயின்மென்ட் வகையில் இப்படம் சேர்த்தி.

ரொம்ப ஈசியா ஸ்கோர் செய்கிறார் தனுஷ். ஆனா கொஞ்சம் யாரடி நீ மோகினி தனுஷ் சாயல் ஆங்காங்கே வருகிறது. சில இடங்களில் அவர் மேனரிசம் தலைவரை நினைவுபடுத்துகிறது, அது may be எனக்கு மட்டுமா என்று தெரியவில்லை. நடனத்தில் தனுஷுக்குத் தனி ஸ்டைல்!

ஓம் பிரகாஷ் ஒளிப்பதிவு ரொம்ப அருமை. பர்மா/மியன்மார் ஊரில் எடுத்தவை கண்ணுக்கு விருந்து. இந்த ஏரியாவில் நாம் ரொம்ப முன்னேறிவிட்டோம் என்று நினைக்கிறேன். இப்போ வரும் எல்லா படங்களிலும் ஒளிப்பதிவு பிரமாதமாக உள்ளது.

ஹீரோயின் அமைரா தஸ்தூர் இன்னொரு ஜெனிலியா டைப்ஸ். அழகா இருக்கார். நடிப்பும் ஒகே. நடிகர் கார்த்திக் சர்ப்ரைஸ் ரி என்ட்ரி. நல்லா செஞ்சிருக்கார். கடைசியில் டயலாக் பேசிக் கழுத்தறுத்து விடுகிறார். ஆனால் அது முழுக்க முழுக்க கே.வி.ஆனந்த் fault. கார்த்திக் மாதிரியே தனுஷ் பேசுமிடம் அமர்க்களம்!

ஹேரிஸ் ஜெயராஜ் இசையில் டங்காமாரி ஆல்ரெடி ஹிட். மற்றப் பாடல்கள் சுமார் வகை. பின்னணி இசை ஒகே.

அயன் தான் அவர் எடுத்ததில் எனக்கு மிகவும் பிடித்தப் படம். அடுத்து கோ. அது கூட முடிவில் இன்னும் க்ரிஸ்பா முடித்திருக்கலாம். அந்தப் படங்களில் ஒரு போதை கடத்தல் பற்றியோ ஜர்னலிசம் பற்றியோ நாம் தெரிந்து கொள்ளக் கூடிய அளவில் புதிய, தெரியாத விஷயங்கள் இருக்கும். இதிலும் Gaming industryயில் வீடியோ கேம்ஸ் உருவாக்கும் கம்பெனியில் நடக்கும் தில்லுமுல்லுகளை பற்றி சொல்ல வருகிறார், ஆனால் அநேகக் கதைகள் படத்தில் இருப்பதால் அது முழுமை பெறவில்லை.

இரு முறை தோற்று மூன்றாம் முறை வெற்றிப் பெரும் கதாப்பாத்திரம் நிச்சயம் விஜய்க்கு செட் ஆகியிருக்காது. தனுஷ் ரசிகர்களும் இந்தப் படத்தில் இன்னும் கொஞ்சம் எதிர்பார்த்திருப்பார்கள் என்று தோன்றுகிறது. ஆனால் நல்ல வேளைக்கு ஆனந்த் படத்தை ரொம்ப ஹைப் பண்ணவில்லை. அதானால் போகிறவர்களுக்கு ஏமாற்றமும் கம்மியாக இருக்கும்.

மொத்தத்தில் நல்லதொரு என்டேர்டயின்மென்ட் படம்.