இராமானுஜர் பகுதி-2

udayavar

உண்மை பக்தனுக்கு சாதியையும் இல்லை மதமும் இல்லை

ஒரு சமயம் இராமானுஜரின் குருவான பெரிய நம்பிகள் பிராமணர் அல்லாத ஒருவருக்கு ஈமக் கடன்களைச் செய்தார். அதனால் அவ்வூரில் இருந்த பிராமணர்களும் அவரது உறவினர்களும் அவரை வெறுத்து ஒதுக்கினர். இதைக் கேட்ட இராமானுஜர் அவர் இல்லம் சென்றார். அங்கு பெரிய நம்பிகளின் மகள் அத்துழாய் தன் மாமனார் வீட்டில் இருந்து வந்து அவருக்குப் பணிவிடை செய்து கொண்டிருந்தாள். இராமானுஜரின் வருத்தத்தைக் கண்ட பெரிய நம்பி “சாத்திரத்தில் கூறியபடி பிராமணன் ஒருவன், பிராமணன் அல்லாதவனுக்கு ஈமக் கடன்கள் செய்வது என்பது பொருத்தமற்ற செயல் தான். அதனை அற நூல்கள் ஏற்றுக் கொள்ளாது. ஆனால் அறம் என்பது என்ன என்று தெரியுமா? சான்றோர்கள் உலகியலில் எவ்வாறு நடை முறைக்கு ஏற்ப ஒழுகினார்களோ அதுவேதான் அறம் எனப்படும். பறவை குலத்தில் பிறந்த ஜடாயுவுக்கு இராமன் இறுதிச் சடங்கினைச் செய்தான். ஷத்ரிய குலத்தில் பிறந்த தருமர் நான்காம் வருணத்தில் பிறந்த விதுரரைப் போற்றி வழிபட்டார். உண்மை பக்தனுக்கு சாதி ஏது? மதம் ஏது? என்னால் தீயில் இடப்பட்டவன் என்னை விட பக்தியில் பல மடங்கு சிறந்தவன். அவனுக்கு இறுதிக் கடன் செய்து, நான் பெரிய பேற்றினை பெற்றுள்ளேன்” என்றார். பெரிய நம்பிகளின் பதிலைக் கேட்டு இராமானுஜர் மகிழ்ச்சியும் மன நிறைவும் பெற்றார். அவர் அருளிய ஞான உரையில் மகிழ்ந்து அவரை விழுந்து விழுந்து வணங்கினார். ஒரு நாள் இவரின் இன்னொரு குருவான திருக்கோட்டியூர் நம்பி வெகு நேரம் கதவை மூடிக் கொண்டு அறைக்குள் இருந்தபடி ஜபித்துக் கொண்டிருந்தார். அவர் வெளியே வந்ததும் இராமானுஜர் அவரிடம், “நீங்கள் ஜெபிக்கும் மந்திரம் என்ன? யாரை தியானிக்கிறீர்கள்?” என்று கேட்டார். அதற்கு அவர் “நான் என் குருவான ஆளவந்தாரின் திருப் பாதங்களையே நினைத்துத் தியானிக்கிறேன். அவரது திருப் பெயரே நான் ஓதும் மந்திரம்” என்று கூறினார். அது முதல் இவரும் தன் குருநாதரான பெரிய நம்பிகளையே தெய்வமாக வழிபடலானார். அப்படிப்பட்ட இராமானுஜர் எப்படி எங்கே அவதரித்தார் என்று இனி பார்ப்போம்.

அவதாரம்

ஆசூரி கேசவ சோமயாஜுலு என்பவருக்கும் காந்திமதி அம்மையாருக்கும் திருவல்லிக்கேணியில் புத்திரக் காமேஷ்டி யாகம் செய்து பின் இறை அருளால் பிறந்தவர் இராமானுஜர். இந்த யாகத்தைச் செய்யச் சொன்னவர் திருக்கச்சி நம்பிகள் என்னும் ஒருவர். அவர் பூவிருந்தவல்லியில் இருந்து தினம் நடந்தே காஞ்சி சென்று காஞ்சி வரதராஜப் பெருமாளுக்கு சேவை செய்து விட்டு வருவார். வழியில் ஸ்ரீ பெரும்புதூரில் சோமயாஜுலு வீட்டில் சிறிது நேரம் ஓய்வெடுத்துக் கொண்டு செல்வார். பிள்ளை இல்லாக் குறையை சோமயாஜுலு இவரிடம் ஒரு முறை வெளிப்படுத்தினார். திருக்கச்சி நம்பிகள் மிகவும் எளியவர். பண்டிதர் அல்லர். அவர் வரதராஜப் பெருமாளுக்கு விசிறி வீசி கைங்கர்யம் செய்து வந்தார். ஆனால் வரதன் அவரிடம் நேரில் பேசும் அருளைப் பெற்றவர். சோமயாஜூலுவின் குறையை பகவானிடம் இவர் கூறினார். அதற்குப் பெருமாள் அவரை அல்லிக்கேணி போய் புத்திரக் காமேஷ்டி யாகம் செய்யச் சொன்னார். தானே ஆதிசேஷன் அம்சமாகப் பிறப்பேன் என்றும் அருளினார். அவ்வாறே சித்திரை மாதம் திருவாதிரை நட்சத்திரத்தில் திருவவதாரம் நிகழ்ந்தது. கி.பி.4.4.1017 உலகில் வாழும் மக்களை உய்விக்க ஸ்ரீ இராமானுஜர் அவதரித்தார். அவர் வாழ்ந்தது 1017–1137 BC என்று சரித்திர ஆராய்ச்சியாளர்கள் சொல்லுகின்றனர். அவர் பூமியில் வாழ்ந்த காலம் சுமார் 120 ஆண்டுகள். காந்திமதி அம்மையாரின் சகோதரர் திருமலையில் வாழ்ந்து, திருவேங்கடவனுக்குத் தொண்டு புரிந்து வந்தார். அவர் பெயர் பெரிய திருமலை நம்பி. அக்காலத்தில் திருவரங்கத்தில் சிறப்புற்று விளங்கிய வைணவப் பெரியார் ஆளவந்தாரின் அருமைச் சீடர் இந்தப் பெரிய திருமலை நம்பி. (ஆளவந்தாரின் இன்னொரு பெயர் யாமுனாச்சாரியார் ஆகும். நாதமுனிகள் என்னும் பெரும் வைணவப் பண்டிதரின் பேரன் ஆவார் இவர்.) திருமலை நம்பி தான் குழந்தைக்கு ஆதிசேஷன்/இளையாழ்வார் என்னும் பொருளில் ஸ்ரீ இராமானுஜர் என்று பெயர் வைத்தார். அவருடைய இன்னொரு சகோதரிக்கும் சிறிது காலம் கழித்து ஒரு மகன் பிறந்தான், அவனுக்கு கோவிந்தன் என்று அவரே திருநாமம் சூட்டினார். இராமானுஜர் அனைத்துக் கல்விக் கேள்விகளிலும் சிறந்து விளங்கினார். வடமொழி, தென்மொழி பாடல்கள் எதுவாயினும் ஒரு முறை கேட்டாலே அவருக்கு மனத்தில் பதிந்துவிடும். சான்றோர்களிடம் பழகுவதையே மிகவும் விரும்பினார். வயது ஏற ஏற ஞானமும் பெருகியது. அந்தந்த வயதில் நடக்க வேண்டியவை அவருக்கு நடந்தன. பூணூல் கல்யாணம், விவாகம் ஆகியவை நிகழ்ந்தன. அதன் பின் இராமானுஜரின் தந்தை நோய்வாய்ப்பட்டு இறைவனடி சேர, அவர் குடும்பத்துடன் காஞ்சிக்குக் குடிப் புகுந்தார்.

யாதவ பிரகாசர்

அங்கு அவர் யாதவ பிரகாசர் என்பவரிடம் வேதம் கற்க ஆரம்பித்தார். அவர் மிகவும் சிறந்த படிப்பாளி. திருப்புட்குழியில் வாழ்ந்து வந்தார். ராமானுஜர் காஞ்சியில் இருந்து பக்கத்து ஊரானத் திருப்புட்குழிக்குச் சென்று பாடம் பயின்று வந்தார். தன் அண்ணன், யாதவ பிரகாசரிடம் பாடம் பயில்வதைக் கேள்விப்பட்டு அவர் சித்தி மகனான கோவிந்தனும் அங்கேயே பயில வந்தார். யாதவர் அத்வைத சித்தாந்தத்தை போதித்து வந்தார். ஆனால் அவர் கூறும் கருத்துகள் விபரீதமாக இருந்தன. பொருந்தாதப் பொருளைக் கூறும் போதெல்லாம் இராமானுஜர் அதைத் திருத்திக் கூறுவார். பல முறை திருத்த முயன்ற இராமானுஜர் மேல் கோபம் கொண்ட அவர், ஒரு சூழ்ச்சி செய்தார். காசிக்கு அவர் சீடர்களுடன் யாத்திரைக் கிளம்பினார். காசியில் கங்கையில் குளிக்கும்போது இராமானுஜரை தண்ணியில் மூழ்கடித்து விடுவதே அவர் திட்டம். அது தெரியாமல் இராமானுஜரும் கோவிந்தரும் மற்ற பிள்ளைகளுடன் கிளம்பினர். விந்தய மலையை சமீபிக்கும் பொழுது கோவிந்தருக்கு இந்த சூழ்ச்சித் தெரிய வந்தது. உடனே தன் தமையனிடம் வந்து விஷயத்தைச் சொல்லி தப்பித்துப் போகும்படிக் கூறிவிட்டு அவர் அந்தக் குழுவில் போய் கலந்து விட்டார். யாதவர் இராமானுஜரைக் காணாமல் அங்கும் இங்கும் ஆளை அனுப்பித் தேடினார். எங்கே அவர் திட்டமிட்டது நடக்காமல் போய்விடுமோ என்று அவருக்கு ரொம்பக் கவலையாகி விட்டது. எங்கு தேடியும் கிடைக்காததால் வன விலங்கு ஏதாவது அவரை சாகடித்து இருக்கும் என்று நினைத்துப் பயணத்தை நிறுத்தாமல் தொடர்ந்தார் யாதவர். திக்குத் தெரியாத காட்டில் கண் போன போக்கில் இராமானுஜர் நடந்து, களைத்து, மாலை இருட்டத் துவங்கிய நேரத்தில் மிகவும் கவலைக் கொள்ள ஆரம்பித்தார். அப்பொழுது ஒரு வேடனும் வேடுவத்தியும் அவர் முன் தோன்றி ஏதாவது உதவி தேவையா என்று கேட்டனர். அவர்கள் காஞ்சிக்குப் போவதாகச் சொல்லவும் நிம்மதி அடைந்த இராமானுஜர் அவர்களுடன் நடக்கத் தொடங்கினார். இரவு முழுதும் பயணித்தனர். நடுவில் ஒரு முறை வேடனின் மனைவி தாகத்துக்குத் தண்ணீர் கேட்டார். அனால் வேடனோ உடனே நீர் தேடிப் போகாமல் காலையில் இனிய நீர் கிடைக்கும் பொறுத்துக் கொள் என்றார். விடிகாலையில் கிணறு ஒன்றைக் கண்டனர். அங்கிருந்து நீர் இறைத்து வேடுவன் மனைவிக்குக் கொடுத்தார் இராமானுஜர். நீர் அருந்திய பின் நொடி நேரத்தில் வந்த இருவரும் மறைந்து விட்டனர். சுற்றுமுற்றும் பார்த்ததில் ஓர் இரவு பயணத்திலேயே காஞ்சி வந்தடைந்தது அவருக்குத் தெரிந்தது. உதவ வந்தவர்கள் பெருமாளும் தாயாரும் தான் என்று அவருக்குப் புரிந்தது. அந்த சாலைக் கிணற்றில் இருந்து தினம் அவர் வரதராஜப் பெருமாளின் திருமஞ்சனத்துக்குத் தண்ணீர் இறைத்து எடுத்து செல்வதையே தன் சேவையாக அன்றிலிருந்து கொண்டார். சில காலத்திற்குள் காசிக்கு யாத்திரை சென்ற யாதவ பிரகாசர் திரும்பக் காஞ்சி வந்தடைந்தார். அங்கு இராமானுஜர் உயிரோடு இருப்பதைக் கண்டு அதிர்ச்சியுற்றார். ஆனால் அவரைத் திரும்ப தன் குழாமில் சேர்த்துக் கொண்டார். வைணவ உலகின் பிரதான குருவாக இருந்த ஆளவந்தார் திருவரங்கத்தில் இருந்து அச்சமயம் காஞ்சி வந்திருந்தார். அவரின் சீடரான திருக்கச்சி நம்பிகளுடன் வரதராஜப் பெருமாள் கோவிலுக்குச் சென்று திரும்பி வரும்போது அவர் இராமானுஜரை எதிரில் கண்டார். அவரின் திருமேனி அழகையும் ஞான ஒளி வீசும் கண்களையும் கண்டு வைணவ தர்மத்தை நிலை நிறுத்தத் தகுந்த முதல்வர் இவரே என்று அருளாசி வழங்கினார். ஆனால் அத்வைத வேதாந்தியான யாதவ பிராகசருடன் அவர் இருப்பதைக் கண்டு அவரிடம் பேச அது தகுந்த சமயம் இல்லை என்று நினைத்து திருவரங்கம் திரும்பினார். அதே நாட்களில் காஞ்சியை ஆண்ட மன்னனின் மகளை பேய் (மன நோய்) ஒன்று பிடித்து ஆட்டிக் கொண்டிருந்தது. எந்த மந்திர தந்திரத்துக்கும் அது பணியவில்லை. அரசனோ மிகுந்த மன வேதனையுடன் யாரை அழைத்து அந்தப் பேயை ஓட்டுவது என்று யோசித்துக் கொண்டிருந்தான். பிறர் சொல்லக் கேட்டு யாதவரை அரண்மனைக்கு அழைத்தான். ஆனால் யாதவரின் பேச்சுக்கு அடிபணியாத பேய் இராமானுஜர் சொல் பேச்சுக் கேட்டு ஓடிவிட்டது. அரசனுக்கும் அவர் மகளுக்கும் அளவில்லா மகிழ்ச்சி ஆனால் யாதவருக்கோ அதுப் பெருத்த அவமானம் ஆகிவிட்டது. இதன் முதற் பகுதியை இங்கே படிக்கலாம். இப்பகுதி ஜூன் மாத “நமது திண்ணை” இணைய இதழில் வெளியாகியது. அதன் சுட்டி இங்கே: Download செய்ய- online ல் படிக்க

Advertisements

28 Comments (+add yours?)

  1. Kannabiran Ravi Shankar (KRS)
    Jun 14, 2015 @ 15:57:02

    இராமானுசர் = தந்தை பெரியார் + திருமுருக வாரியார், இரண்டு பேரும் ஒன்று கலந்தா எப்படி இருக்குமோ..
    செயல் ஆற்றல் + பேச்சு ஆற்றல்; அப்படியொரு மனிதர், இன்றைய அறிவியல் உலகில் அல்ல, 1000 ஆண்டுக்கு முன்னமேயே!

    பொதுவா, சமூக நலம்/தமிழ் நலம் சார்ந்த கருத்துக்களை இயம்பும் போது கூட,
    பிறருக்கு வலிக்காத மாதிரி, பூசி மெழுகி நயந்து சொல்லணும்-ன்னு எதிர்பார்ப்பு; அதன் வீர்யமே போய்விடும்..

    ஆனால், இராமானுசர் சொன்ன சொல்:
    அடியார்களைக் குலம் விசாரிப்பவன் எவனோ
    = அவன், பெற்ற தாயை, யோனி விசாரித்தவன் ஆகின்றான்!

    பெரியார் கூட, “தாய்மை” என்று வரும் போது சற்று அடக்கி வாசிப்பாரே அன்றி, இப்படியொரு “தீச்சொல்” சொன்னதில்லை:)
    அதுவும் சனாதனக் கோட்டையான ஸ்ரீரங்கம் ஆலயத்துக்குள்ளேயே, இப்படிப் பேச, பெரும் “அறத் துணிவு” வேண்டும்!

    இப்படியொரு நயந்து பேசாமை;
    சுயப் பிடித்தமான பக்திக்காக, சாஸ்திரமே எதிர்த்தாலும், சமூக நலத்தில் சமரசம் செய்து கொள்ளாமை..
    இப்படி வாழ்ந்து காட்டியவர்= இராமானுசர்!

    அதனால் தான்..
    *இந்தியாவில் தோன்றிய, சங்கரர் முதலான எத்தனையோ ஆசார்யர்கள், ஆன்மீக அருளாளர்களை மதிக்காவிட்டாலும்..
    *பழுத்த நாத்திகர்ளான பெரியார்/ பாரதிதாசன், வியந்து போற்றிய
    இரண்டே இரண்டு ஆத்திகர்கள் = “இராமானுசர் & வள்ளலார்”

    நல்ல ஆத்திகம்= இறைவனின் புகழ் பாடுதல், என்பதே தவறான சொல்!
    பெற்ற தாயை, துதி பாடுகிறோமா? இல்லையே!
    எவ்வுயிர்க்கும் தாயான இறைவன், “துதி பாடுதல்” என்பதையா விரும்புவான்?

    வெறுமனே பாடல்களும் நூல்களுமே எழுதி, அவ்வளவில் நின்றுவிட்டனர் பல அருளாளர்கள்..
    அதைக் கடந்து, சமூக நலம்-தமிழ் நலத்துக்குள் வந்தவர்கள்= இராமானுசர் & வள்ளலார்;
    அதனால் தான் இந்த நாத்திகப் போற்றி:)

    இராமானுசர் = மிக மிக வித்தியாசமான, “உண்மை” ஆத்திகர்!
    நம்மில் பலரும் = போலி ஆத்திகர்கள்..

    Reply

    • Kannabiran Ravi Shankar (KRS)
      Jun 14, 2015 @ 16:12:43

      அம்மா,
      இவரின் வாழ்வியல்-வரலாற்றை, தொடர் பதிவுகளாக எழுதி வருகிறீர்கள் போல?
      கடந்த சில மாதங்களாக, எத்தியோப்பியச் சிறார் மீட்பு முகாமில் இருந்ததால், இணையம் என்பதே இல்லாமல், குறுவாழ்வாகப் போய்விட்டது; இன்று தான், இதற்கு முந்தைய பதிவும் கண்டேன்;

      இந்தத் தொடர், நலமுடன் வெளி வர வாழ்த்துக்கள்!
      இதனால், ஆன்ம-நலம், சுனை ஊற்றாய்ச் சுரக்கவும் வாழ்த்துக்கள்!

      இராமானுசர் வரலாற்றில்..
      ஆங்காங்கே, “வரலாறாய்” இல்லாது, சில “கதை”களும் சேர்ந்து விட்டன; Eg: பேய்ப் பிடித்தல் etc..
      அந்தந்தப் பதிவுகளில், எவர் மனமும் கோணாது, மெய் வரலாற்றுக் குறிப்பையும், சுருக்கமாகச் சொல்கின்றேன்; அனுமதி தாருங்கள்!

      தங்களின் இந்த நன்முயற்சிக்கு நன்றி!

      Reply

      • Anonymous
        Jun 15, 2015 @ 03:12:24

        நல்வரவு முருகா! நலமா? ஆசிரியரை இழந்த மாணவன் போல தவிச்சிட்டோம்…

  2. amas32
    Jun 14, 2015 @ 16:30:53

    நிச்சயமாக, உங்களுக்கு இல்லாத உரிமையா? உங்கள் கருத்துக்களைப் பகிருங்கள். மிக்க நன்றி 🙂

    எத்தியோப்பியா சென்று அரிய சேவை செய்ததற்கு மனமுவந்த பாராட்டுகள்.

    Reply

  3. Kannabiran Ravi Shankar (KRS)
    Jun 14, 2015 @ 16:48:58

    தமிழில் மட்டுமல்லாது, தெலுங்கு மொழியிலும்.. இராமானுசன் பலவாறு போற்றப் படுகிறார்!

    ஆந்திர மக்களின், அதுவும் ஒடுக்கப்பட்ட தெலுங்கு மக்களின் இராமானுச அன்பு, இன்னிக்கும் அலாதியானது!
    ஒவ்வொரு மார்கழியிலும், ஆந்திராவில், “இராமானுச கூடங்கள்/ ராமானுஜ கூடாலு”, கண்ணெதிரே காணலாம்!

    சங்கீத மும்மூர்த்தியான தியாகராஜருக்கும் முந்தைய காலத்தவரான.. அன்னமாச்சார்யர்..
    அவர், இராமானுசன் மேல் ஒரு தனிக் கீர்த்தனையே செய்துள்ளார்!

    இதோ!

    “கதுலன்னி கிலமைன கலியுக மந்துனு” என்று துவங்கும் தெலுங்கு கீர்த்தனையில்…

    மலசி ராமானுஜுலு
    மாடலாடே தெய்வமு..
    ஈதடே ராமானுஜூலு
    இகபர தெய்வமு..

    நயமை ஸ்ரீவேங்கடேசே (அன்னமய்யா)
    நாக மெக்க வாகி தன்னு
    தய சூசி, தய சூசி
    ராமானுஜ தெய்வமு…

    என்று சுந்தரத் தெலுங்கிலும் கொண்டாடப்படும், இராமானுசன் திருவடிகளே தஞ்சம்!

    Reply

  4. Kannabiran Ravi Shankar (KRS)
    Jun 14, 2015 @ 16:52:54

    தனக்குப் புகழ் சேர்த்துக் கொள்ளாது,
    தன் சீடர்களில், தன்னை விட இளையோர்க்கும் புகழ் சேர்த்த பிரான்…

    தனக்குத் தரப்பட்ட சிறப்புப் பெயர்களைத் தான் வைத்துக் கொள்ளாது,
    உடனே தன் சீடர்களுக்குக் கொடுக்கும் குணம்…
    (யக்ஞமூர்த்திக்கு = அருளாளப் பெருமாள் எம்பெருமானார்..
    எம்பெருமானார் என்ற பட்டத்தையும் கொடுத்து விட்ட உள்ளம் தான் என்னே!)

    *கூரத்தாழ்வார்
    *அருளாளப் பெருமாள் எம்பெருமானார்
    *அமுதனார்
    போன்ற மூத்தவர்களையும்

    *முதலியாண்டான்
    *பிள்ளை உறங்கா வில்லி
    *எம்பார்
    *அனந்தாழ்வான்
    *வடுக நம்பி
    *கிடாம்பி ஆச்சான்
    *தொண்டனூர் நம்பி
    போன்று இளையவர்களையும்…

    பல்வேறு சாதிகளில்
    பல்வேறு மதங்களில்
    பல்வேறு கோட்பாடுகளில்
    = பல தரப்பினரையும், தன் பால் ஒருங்கே அரவணைத்த…

    இராமானுசன் திருவடிகளே தஞ்சம்!

    Reply

  5. Kannabiran Ravi Shankar (KRS)
    Jun 14, 2015 @ 16:54:56

    பெண்களை ஆலய நிர்வாகத்தில் ஈடுபடுத்தி,
    சமூகமே அறியும் வண்ணம்,
    பெண்களுக்குப் பல சமயப் பொறுப்புக்கள் கொடுத்து..

    *அத்துழாய்,
    *ஆண்டாள்,
    *பொன்னாச்சி,
    *தேவகி,
    *அம்மங்கி,
    *பருத்திக் கொல்லை அம்மாள்,
    *திருநறையூர் அம்மாள்,
    *எதிராச வல்லி…
    என்று எத்தனை எத்தனை பெண்கள், அவர் அரங்கத்து குழாமில்!

    பெண் குலம் தழைக்க வந்த பெரும்பூதூர் மாமுனிகள்
    இராமானுசன் திருவடிகளே தஞ்சம்!

    Reply

  6. Kannabiran Ravi Shankar (KRS)
    Jun 14, 2015 @ 16:57:32

    இஸ்லாம் பெண்ணுக்கு, கோயில் கருவறையில் சிலை!

    அதுவும், நம்மாழ்வார் இருப்பதாகக் கருதப்படும், இறைவன் காலடியில், “துலக்கப் பொண்ணு” பிரதிஷ்டை…

    கனவிலும் நினைத்துப் பார்க்க முடியுமா, அதுவும் ஆயிரம் ஆண்டுக்கு முன்பு?
    அறிவியல் யுகமான இன்றைக்கு எழுதினாலே, பலருக்குப் பிடிக்க மாட்டேங்கிறது! ஆயிரம் ஆண்டுக்கு முன்பு?

    அரங்கனுக்கு லுங்கி கட்டி,
    ரொட்டி நைவேத்தியம் செய்வித்தாரே!
    எந்த சாஸ்திரத்தில் உள்ளது?
    எந்த ஆகமத்தில் உள்ளது?

    துலக்கா நாச்சியாரைக் கொண்டாடிய
    எங்கள் சமரச சன்மார்க்க வள்ளல்
    இராமானுசன் திருவடிகளே தஞ்சம்!

    Reply

  7. Kannabiran Ravi Shankar (KRS)
    Jun 14, 2015 @ 17:03:20

    மேலக்கோட்டையில் தலித் ஆலயப் பிரவேசம்…

    இன்றைக்குப் பெரிய விஷயமில்லை!
    ஆனால் 1000 ஆண்டுக்கு முன்னால்?

    இன்றைக்கும்…
    கண்டதேவி ஊரில், தலித்துக்கள் தேர் இழுக்க முடியாமல், ஆயிரம் நாடகம் நடத்தப்படுகிறது!
    அரசே ஒன்று செய்யும் முடியாத நிலைமை!

    ஆனால் ஆயிரம் ஆண்டுக்கும் முன்னால்..
    காந்தியடிகள் “அரிசனம்” என்ற வார்த்தையை உருவாக்கும் முன்னால்…
    தந்தை பெரியார், வைக்கம் போராட்டம் செய்யும் முன்னால்…

    **மேலக்கோட்டையில் அனைவரையும், “திருக்குலத்தார்” என்று உள்ளே நுழைத்துக் காட்டிய வள்ளல்…

    **பிராமணர் அல்லாதாருக்கும், பயிற்சி குடுத்து, “ஆலய அர்ச்சகர்” ஆக்கிக் காட்டிய வள்ளல்…
    (“கருப்புப் பார்ப்பான்” என்று, இன்றும் சிலர் அவர்களை இகழ்வது வேதனை)

    சாதி இல்லா இறைமையை= சாதித்துக் காட்டிய..
    இராமானுசன் திருவடிகளே தஞ்சம்!

    Reply

  8. Kannabiran Ravi Shankar (KRS)
    Jun 14, 2015 @ 17:06:09

    திருக்கச்சி நம்பிகளின் “நாலாம் வருணம்” என்னும் சாதி பார்க்காது,
    அவரை வீட்டுக்குள் உணவருந்தி வைத்து,

    தன்னை அவர் சீடனாக ஏற்றுக் கொள்ளத் தயங்கினாலும்,
    அவர் உண்டதைத் தானும் உண்டு, சீடத் தன்மையாச்சும் ஏற்றிக் கொள்வோம் என்று எண்ணி…

    அதனால் தன் ஆச்சாரம் மிக்க மனைவியால், குடும்பத்தில் குழப்பம்/ அவளால் சுடுசொல் ஏற்பட்டு…

    **எம்பெருமானின் “நாலாம் வர்ண” அடியவருக்காக,
    **குடும்ப வாழ்க்கையே தொலைத்து விட்டு நின்ற…
    இராமானுசன் உள்ளத்தை என்னவென்று சொல்லுவது?

    இராமானுசன் உள்ளமே தஞ்சம்!

    Reply

  9. Kannabiran Ravi Shankar (KRS)
    Jun 14, 2015 @ 17:09:45

    எங்கோ வயல் வேலை செய்யும் ஒரு விவசாயி…

    யாத்திரை போகும் போது, சாலையில், திருப்பதிக்கு எந்த வழிப்பா?-என்று கேட்டதற்கு..
    அவனும் வழி சொன்னதுக்கு…

    மோட்சத்துக்கு வழி காட்டி நிற்கிறான் வேங்கடவன்!
    அந்த வழிகாட்டிக்கே=வழிகாட்டிய விவசாயி இவன்…என்று

    ஒரு வேளாளனைக் கீழே வீழ்ந்து வணங்கிய பிராமணன்…
    (பல மேல்சாதிச் சீடர்கள் தயங்கினாலும்)
    நம் இராமானுசன் திருவடிகளே தஞ்சம்!

    Reply

  10. Kannabiran Ravi Shankar (KRS)
    Jun 14, 2015 @ 17:14:44

    எப்போதோ.. தோழி ஆண்டாள் பாடிய பாட்டு
    “நூறு தடா அக்கார அடிசில்
    வாய் நேர்ந்து பராவி வைத்தேன்”

    அந்த வேண்டுதல் பாட்டோடு முடிஞ்சி போயிருக்கும்!

    கோதை “பொய்” சொல்லி விட்டாள்!
    சும்மானா வேண்டிக் கொண்டாள்! வேண்டுதலை நிறைவேற்றலை என்ற பேர் வராது… அந்த வேண்டுதலைக் காத்துக் கொடுத்தார்!

    அவருக்கு 400 வருஷத்துக்கு முந்தைய பாட்டு அது…

    ஆண்டாளின் வேண்டுதலை நிறைவேற்ற வேண்டும் என்ற யோசனை யாருக்காச்சும் தோன்றிற்றா?

    வெறும் பாட்டாக மட்டும் பார்க்காது…
    கவிதையைச் சுவாசிக்கும் உள்ளம்…

    எங்கள் இராமானுசன் திருவடிகளே தஞ்சம்!

    Reply

  11. Kannabiran Ravi Shankar (KRS)
    Jun 14, 2015 @ 17:21:59

    மாற்றுக் கருத்துக்காக = நட்பையே “உடைக்கும்” நாம் எங்கே?

    ஹொய்சாள அரசன், சமணத்தில் இருந்து வைணவம் மாறினாலும்..
    அவன் மனைவி மாறாமல், சமணத்திலேயே இருந்தாள்

    “அவளை அப்படியே இருக்கவிடு, நெருக்காதே” என்று சொன்ன இராமானுசர் எங்கே?’

    சமயப் போரில் வாதிட்டுத் தோற்றவர்களை எல்லாம்…
    அரசியல் பலத்தால், கழுவில் ஏற்றிய காலம்…

    ஆனால் வாதில் தோற்றவர்களையும், தன் மடங்களில் வைத்து அரவணைத்து,
    அப்படி விரும்பாதவர்களை, அவர்கள் போக்கில் விட்டு்விட்ட…பண்புக்குத் தலை வணங்காமல் வேறு என்ன செய்வது?

    இராமானுசன் திருவடிகளே தஞ்சம்!

    Reply

  12. Kannabiran Ravi Shankar (KRS)
    Jun 14, 2015 @ 17:25:44

    மத வெறியால், சோழன் வெருட்ட… ஊரை விட்டே ஓடினாலும்…

    சமய வெறிக்கு மக்கள் இரையாகி மாளக் கூடாது என்பதை மனதில் வைத்து…

    தில்லையிலிருந்து தூக்கி வீசிய பெருமாள் சிலையை,
    சோழன் செத்த பின், மீண்டும் அங்கேயே தான் வைப்பேன் என்று அடம் பிடிக்காது…அரசியல் செய்யாது…

    வேறொரு இடத்தில் வைத்துக் கொள்ளலாம்..
    கீழ்த் திருப்பதியில் வைத்துக் கொள்ளலாம்!
    இன்னொரு மதப் பூசல் வேண்டாம் என்று சொல்லும் உள்ளம், இன்றைக்கு “ராம ஜென்ம பூமியருக்கு” வருமா???

    “சமயத்தை” விட, “சமூகத்தை”க் கணக்கில் கொண்ட
    இராமானுசன் திருவடிகளே தஞ்சம்!

    Reply

  13. Kannabiran Ravi Shankar (KRS)
    Jun 14, 2015 @ 17:30:55

    ஆகமம் ஆகமம் என்று சிலர் அலறுவார்கள்;

    ஆனால்..
    குழந்தைகள் ஆடும் “சொப்பு” விளையாட்டுப் பெருமாளை…

    ஊரறிய கீழே விழுந்து கும்பிட்ட
    அந்த மெல்லிய உள்ளம் வேறு யாருக்கு வரும்?

    ஆகமம் ஏது, சொப்பு விளையாட்டுப் பெருமாளுக்கு?
    இந்த உள்ளம்..
    *வேதத்துக்கு பாஷ்யமும் எழுத வல்ல வேதாந்த உள்ளம்!
    *அதே சமயம், தமிழ்-அன்பினால் கரைந்து வாழும் ஆழ்வார் உள்ளம்!

    இரு உள்ளங்களும் ஒருங்கே பெற்ற உடையவர்..
    இராமானுசன் திருவடிகளே தஞ்சம்!

    Reply

  14. Kannabiran Ravi Shankar (KRS)
    Jun 14, 2015 @ 17:40:55

    இன்றைக்கு, தமிழ் அர்ச்சனைக்கு அரசே ஆணை போட்டாலும் நடப்பதில்லை!
    தில்லை தீட்சிதர்கள் முன், நீதிக்கான மன்றமே மண்டியிட்டு விடும்!

    ஆனால்
    *தமிழ் வேதம் முன் ஓதிச் செல்ல…
    *பெருமாள், தமிழைப் பின் தொடர…
    *வடமொழி வேதங்கள் பின்னே தான் ஓதிச் செல்லும் நிலை..

    1000 ஆண்டுகளுக்கு முன்பே நடத்திக் காட்டியது,
    எந்த அரசின் சட்டம்?
    பாகவத கைங்கர்யம் என்னும் அடியார் தொண்டே அந்தச் சட்டம்!

    அடியவர்களுக்கே கொஞ்சம் கொஞ்சமாய்ப் புரிய வைத்து…
    அவர்களே தமிழ்ப் பாசுரங்களை,
    ஆலயங்களில் விருப்பத் தெரிவாக விழைந்து கேட்க வைத்த சட்டம்!

    ஆலயப் புறப்பாடுகளில்..
    *தமிழ் இறைவனுக்கும் முன்னால்!
    *இறைவன், ஈரத் தமிழைப் பின் தொடர..
    *சம்ஸ்கிருத வேதம்-ல்லாம் இறைவனுக்குப் பின்னால் வந்தால் போதுமானது..

    முருகப் பழமான அருணகிரிநாதரே, இந்த ஆலயத் தமிழ்க் காட்சியில் உள்ளம் பறி கொடுத்து..
    “பைந்தமிழ் முன் செல்ல
    பைந்தமிழின் பின்னே செல், பச்சைப் பசுங் கொண்டலே”
    – என்று பெருமாள் புறப்பாட்டைப் பாடுகிறார் என்றால்.. இந்த ஆலயப் புரட்சி!

    நம் இராமானுசன் தமிழ் நெஞ்சமே தஞ்சம்!

    Reply

  15. Kannabiran Ravi Shankar (KRS)
    Jun 14, 2015 @ 17:46:54

    எதற்கெடுத்தாலும், சாஸ்திரத்தை நீட்டிப் பேசும், பண்டிதர்களின் கெடுபிடிகளை மீறி…

    அந்தச் சாஸ்திரத்தில் அவர்களுக்கே தெரியாத விஷயங்களைச் சொல்லி…

    “வார்த்தை அளவில்” சாஸ்திரம் பார்க்காமல்
    “வாழ்க்கை அளவில்” சாத்திரம் பார்த்து நடந்த பான்மை!

    திருவரங்கம் கோயிலையே…
    ** “பிராமண அர்ச்சகர்கள் மட்டும்” என்ற “வைகானச ஆகமத்தில்” இருந்து மாற்றி…
    ** கட்டுப்பாடுகள் அதிகம் இல்லாத “பாஞ்சராத்ர ஆகமம்”-த்துக்கு…மாற்றிக் காட்டிய…

    சாஸ்திரம் மீறாது, சாஸ்திரம் மாற்றிய…
    அனைவர்க்கும் அன்பன்,
    எங்கள் இராமானுசன் திருவடிகளே தஞ்சம்!

    Reply

  16. Kannabiran Ravi Shankar (KRS)
    Jun 14, 2015 @ 17:50:47

    “கருத்து அளவில்” உரையாடி வாதம் செய்தாலும், அதைச்
    “சொந்த அளவில்” எடுத்துக் கொள்ளும் இன்றைய நவீன அறிவியல் காலத்திலேயே…

    ஆனால்…
    தன் ஆசிரியர்களிடத்தேயே வாதம் – கருத்து அளவில்!
    கருத்தைக் கருத்தாக மட்டும் வைத்து!

    “அறியாக் காலத்தே அடிமைக் கண்
    அறியா மா மாயத்து அடியேனை
    அன்பு செய்வித்து வைத்தாயால்…”

    என்று பாடல் வரிகளை ஒழுங்காகப் பொருத்தி…இப்படித் தான் நம்மாழ்வார் பாடினார்…
    என்று ஆசிரியருக்கே எதிராகச் சொல்லி…:)

    உன் விளக்கம், ஆசார்ய விளக்கத்துக்கு மாறானது என்று பேச்சு வந்தாலும்…அதைப் பொருட்படுத்தாது…
    பின்னாளில் அப்படிச் சொன்னவரையும் “உணர வைத்த” பெருந்தன்மை, அதே சமயம் “கருத்தில் நேர்மை”!

    இந்த உள்ளம் யாருக்கு வரும்?
    நம் இராமானுசன் திருவடிகளே தஞ்சம்!

    Reply

  17. Kannabiran Ravi Shankar (KRS)
    Jun 14, 2015 @ 17:57:51

    திருமலை திருப்பதியில் = எம்பெருமான் திருவேங்கடமுடையான்;
    அவன் தமிழ்-முல்லைத் தெய்வமான மாயோன் திருமாலே என்று..

    புறநானூறு
    கலித்தொகை
    சிலப்பதிகாரம்
    …என்று சங்க இலக்கியங்கள் வாயிலாகத் தரவு காட்டி

    வீண் கும்மிகளை அன்றே ஒழித்துக் கட்டிய பான்மை…

    அப்பனுக்குச் சங்காழி அளித்த அண்ணல்= இராமானுசன் திருவடிகளே தஞ்சம்!

    அதே சமயம்,

    திருக்கண்ணங்குடியில் “விபூதி பூசிக் கொள்ளும் பெருமாள்” என்று தெரிந்து…
    சமய மடாதிபதி என்னும் அதிகாரத்தால் அதை மாற்றாது…

    அப்படியே இன்று வரை.. விபூதி பூசிக் கொள்வதை நடக்க விட்டு,
    ஆலய வைணவ அர்ச்சகர்களையும்,
    அந்த மூன்றரை நாழிகைக்கு,
    அவ்வண்ணமே திருநீறு பூசிக் கொண்டு வழிபாடு செய்க என வகுத்த…

    பேதங்களைக் கடந்த பேதை உள்ளம்
    இராமானுசன் உள்ளமே நம் தஞ்சம்!

    Reply

  18. Kannabiran Ravi Shankar (KRS)
    Jun 14, 2015 @ 18:04:41

    அனைத்துச் சாதி அர்ச்சகத் திட்டம், இன்று அரசே போட்டாலும் முடியவில்லை….!
    நீதி மன்றத்தில் மறைந்து வி்டுகிறது:(

    ஆனால் அன்றைக்கே,
    விருப்பம் உடையோர்க்கெல்லாம், பஞ்ச சம்ஸ்காரம் என்னும் ஐ-ஒழுகு செய்வித்து…முறையாகப் பயிற்சி தந்து…
    ஒடுக்கப் பட்டோரையும்= கோயில் அர்ச்சகர் ஆக்கிக் காட்டிய திறம்…

    இன்றும்…
    *திருக்கோயிலூர்
    *திருவாலி
    *திருநகரி
    *திருமணங்கொல்லை
    …போன்ற ஆலயங்களில் எல்லாம் அந்தக் “கருப்பு அர்ச்சகர்களை” பரவலாகக் காணலாம்!

    அவர்கள் பெருமாளுக்கு அபிஷேகம் செய்து வைக்கும் காட்சியெல்லாம்.. இன்று youtube-இல்காணக் கிடைக்கிறது!

    இப்படி,
    “ஆசை” உடையோர்க்கு எல்லாம், பேசி “வரம்பு” அறுத்தார்
    இராமானுசன் திருவுள்ளமே நம் தஞ்சம்!

    Reply

  19. Kannabiran Ravi Shankar (KRS)
    Jun 14, 2015 @ 18:09:52

    இவ்வளவும் செய்து காட்ட, அந்த உள்ளம் கொடுத்த விலை…கொஞ்ச நஞ்சமல்ல!

    * குடும்ப வாழ்க்கை போனது!

    * சைவ / ஸ்மார்த்த குடும்பத்தில் பிறந்ததால்… ஸ்ரீரங்கத்தில் முதலில் அவ்வளவாக ஏற்றுக் கொள்ளவில்லை!

    * பின்பு ஒரு வழியாக ஏற்றுக் கொண்டாலும்…கோயில் சீர்திருத்தத்தால் அந்தணர் பகையைச் சம்பாதித்து கொண்டது

    * பிட்சை உணவில், அந்தணர்களே விஷம் வைத்துக் கலக்கும் அளவுக்குப் போனது…

    இப்படி இத்தனையும் பார்த்த உள்ளம்,
    இராமானுசன் திருவடிகளே தஞ்சம்!

    இன்றைக்கும் மடாதிபதிகள் பல்லக்கில் செல்கிறார்கள்! பட்டினப் பிரவேசமாம்!
    ஆனால் கால்நடையாகவே அலைந்து அலைந்து பணியாற்றிய கால்கள்!

    * சோழன் துரத்தத் துரத்த ஓடிய கால்கள்!
    * மேலக்கோட்டை செல்வப் பிள்ளையின் சிலையைப் பெற, வடநாடு ஓடிய கால்கள்
    * திருப்பதியில் பெருமாளா? சிவனா? என் முருகனா? என்று வம்பு வந்த போது, வயதான காலத்திலும், அங்கு ஓடிய கால்கள்

    * தி்ருக்கோட்டியூருக்கு 18 முறை நடையாய் நடந்த கால்கள்…
    * அதைக் கோபுரத்தின் மேலேறி
    ஊருக்கே மந்திரத்தை வெட்ட வெளிச்சம் ஆக்கிய கால்கள்!

    சொகுசான மடாதிபதியாய் இருக்காது…
    அலைந்து அலைந்தே திரிந்த அந்தத் “திருவடிகள்”
    இராமானுசன் திருவடிகளே தஞ்சம்!

    Reply

  20. Kannabiran Ravi Shankar (KRS)
    Jun 14, 2015 @ 18:33:12

    தமிழ் “பிறப்பால்” வருவது அன்று! “உணர்வால்” வருவது!

    பிறப்பால், பிராமணராகப் பிறந்தாலும்..
    வெளி வேடம் இன்றி..
    உள்ளத்தால்…, தமிழ்க் காதல் + இறைக் காதல் + சமூகக் காதல்
    = அதுவே இராமானுசர்!

    நான் உள்ளத்தில் வைத்துப் போற்றும்..
    *இராமானுசர்
    *மணவாள மாமுனிகள்
    *பரிதி மால் கலைஞர் (எ) சூரிய நாராயண சாஸ்திரிகள்
    .. இப்படிப்பட்ட அந்தண மரபில் வந்தவர்களே!
    நெறி கொண்டவர்கள்! வெறி கொண்டவர்கள் அல்லர்!

    முருகன்= என் தனிப்பட்ட காதல் மட்டுமே;
    அதுவும் உள்ளுக்குள் மட்டுமே; இப்போ தான், சில துயர்களால், வெளித் தெரிந்து விட்டது
    ஆனால், பெரியார்/ இராமானுசர் போன்றவர்கள்.. = முருகனை விடவும் மனத்துள் உயர்ந்தவர்கள்….
    சமூக நலத்தால், தமிழால்! என் தனிப்பட்ட காதலால் அல்ல!

    இராமானுசரைப் பற்றிப் பேசினாலே, வைணவன் ஆகி விட மாட்டேன்-ன்னு எனக்கும் தெரியும், பெருமாளுக்கும் தெரியும்:)
    அந்தக் களவாணிப் பய முருகனுக்கும் தெரியும்:))

    சமய உலகில், இராமானுசர் போலொரு மனசு= மிக மிகக் குறைவு:(
    * அவர் = “உண்மை” ஆத்திகர்
    * நாம் = போலி ஆத்திகர்கள்..
    கொஞ்சம் கொஞ்சமாய்.. மனத்தை மாற்றிக் கொள்வோம்;
    மன மாற்றமே= “சமை”யம்!

    இராமானுச திவ்ய ஆக்ஞா
    வர்த்ததாம், அபி வர்த்ததாம்!

    இராமானுசர் உள்ளக் கிடக்கை
    செழிக்கவே! செழிக்கவே!

    Reply

  21. psankar
    Jun 15, 2015 @ 14:48:15

    நீங்கள் கோபித்துக் கொள்ள மாட்டீர்கள் என்ற நம்பிக்கையில் ஒன்று சொல்கிறேன். உங்களின் பதிவை விட kryes பின்னூட்டங்களை மிகவும் இரசித்தேன்; உங்கள் எழுத்து சோடை போகவில்லை, ஆனால் நான் மாதவிப்பந்தல் இரசிகன் என்பதே அதற்குக் காரணம்.

    > கல்விக் கேள்விகளிலும்
    > குடிப் புகுந்தார்
    > ஊரானத் திருப்புட்குழிக்குச்
    > அனைத்துக் கல்விக் கேள்விகளிலும்
    > யாத்திரைக் கிளம்பினார்
    > ஒன்றைக் கண்டனர்
    > சொல் பேச்சுக் கேட்டு
    > அதுப் பெருத்த அவமானம்

    மேலுள்ள எவ்விடத்திலும் வல்லினம் மிக வேண்டாம்.

    > உண்மை பக்தனுக்கு சாதியையும் இல்லை

    “சாதியும்” போதும்.

    வேறு சில எழுத்துப் பிழைகளும், வாக்கியப் பிழைகளும் கூட இருந்தன. அடுத்த முறை, இலவசம், சொக்கர் யாரிடமேனும் ஒரு முறை காண்பிக்கலாம் (அவர்களுக்கு நேரம் இருப்பின்).

    உங்கள் பதிவுகளை நிறைய பேர் படிக்கிறார்கள். இதில் உள்ள பிழைகள் பலரையும் சேர்ந்து, அவர்களையும் தவறு செய்யத் தூண்டும் என்பதால் நீங்கள் இதில் கொஞ்சம் கவனமாக இருத்தல் தமிழுக்கு நலம்.

    Reply

  22. amas32
    Jun 15, 2015 @ 14:49:36

    நன்றி, சரி செய்து விடுகிறேன்.

    Reply

  23. UKG (@chinnapiyan)
    Jun 16, 2015 @ 19:11:53

    எளிமையான உங்கள் பதிவு அருமை அருமை.
    என் போன்ற சராசரி பக்திமானுக்கு இது போதும்.

    பின்னூட்டங்களும் அருமை.

    இருந்தாலும், தாங்கள் தொடர் முழுவதையும் எழுதி முடித்தபிறகு KRS கருத்து + விளக்கம் சொல்லியிருந்தால் இன்னும் கூட சிறப்பாக இருந்திருக்கும் என்பது என் எண்ணம்.

    எதையும் மறுத்து சொல்ல இயலாதவாறு, வியாக்கினத்தில் வில்லாதி வில்லனாக இருக்கிறார் KRS. அவருக்கு நான் என்றென்றும் தலைவணங்குவேன்.

    இப்போது மணி நள்ளிரவு 00.35 இப்பொழுதும் நான் உற்சாகமாக இருக்கிறேனென்றால் அது உங்களின் இந்த பதிவால்தான்.

    வாழ்த்துகள் பாராட்டுகள் 🙂

    Reply

  24. உமா க்ருஷ் (@umakrishh)
    Jun 17, 2015 @ 10:27:23

    முருகா ஆ ஆ ஆ…அவங்க பல பதிவு போட வேண்டிய இடத்தில் இப்படி ஒரே பதிவுலயே அம்புட்டையும் ஒப்பிச்சுட்டீங்களே…. மிக மிக ரசித்தேன்.. :))

    Reply

  25. Trackback: இராமானுஜர் பகுதி -3 | amas32
  26. Trackback: இராமானுஜர் பகுதி -6 நிறைவு பகுதி! | amas32

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: