இராமானுஜர் பகுதி -3

இராமானுஜர்

ஆளவந்தார்

காஞ்சியில் இருந்து திரும்பித் திருவரங்கம் சென்ற ஆளவந்தார் இராமானுஜர் நினைவாகவே இருந்தார். தனக்குப் பிறகு வைணவ தத்துவங்களை நிலை நிறுத்த யாருமில்லையே என்ற கவலை அவரை வாட்டியது. இராமானுஜரே அதற்குத் தகுதியானவர் என்று ஒரு நாள் மனத்தில் பொறி தட்டியது. ஆனால் இராமானுஜரோ யாதவ பிரகாசருடன் இருக்கிறாரே என்று இவர் நினைக்கும் நேரத்தில் அவர்கள் இருவரும் பிரியும் தருணமும் வந்தது.

மறுபடியும் ஒரு முறை யாதவர் சொன்ன வேதாந்த விளக்கத்தை இராமானுஜர் திருத்த, கோபம் கொண்ட யாதவர் இனி அவரின் சீடராக இருக்க வேண்டாம் என்று அவரை அனுப்பி விட்டார். இதனால் மனம் வருந்தினாலும் வீட்டில் இருந்தபடி வேதங்களையும் மற்ற சாஸ்திரங்களையும் பயின்று வந்தார் இராமானுஜர்.

பின் திருக்கச்சி நம்பிகளிடம் மாணாக்கராகச் சேர விருப்பம் தெரிவித்தார் இராமானுஜர். திருக்கச்சி நம்பிகளோ, “நீயோ பிராமணன், கல்வியில் சிறந்த மாமேதை, நானோ படிப்பறிவு இல்லாததால் தான் பெருமாளுக்குத் தொண்டு மட்டும் செய்து வருகிறேன், வைசியக் குலத்தில் பிறந்தவன், நான் எப்படி உனக்கு குருவாக முடியும்” என்று கேட்டார்.

ஆனால் இராமானுஜரோ, “தாங்களே உண்மையானக் கல்விமான். ஆண்டவன் ஒருவனே மெய்பொருள். படிப்பின் பயன் இறைவனை அறிவதே ஆகும். அந்த நிலையை நீங்கள் அடைந்து விட்டீர்கள், அதனால் நீங்களே எனக்குக் குருவாகத் தகுந்தவர், என்னை ஏற்றுக் கொள்ளுங்கள்” என்று பணிவுடன் கூறி அவரை விழுந்து வணங்கினார்.

திருக்கச்சி நம்பிகள் இராமானுஜரின் மொழிகளைக் கேட்டு மெய் சிலிர்த்துப் போனார். இதே சமயத்தில் திருவரங்கத்தில் ஆளவந்தாரின் உடல் நலம் குன்ற ஆரம்பித்தது. அவர் உடனே இராமானுஜரை அழைத்து வரச் சொல்லிக் காஞ்சிக்கு பெரிய நம்பியை அனுப்பினார்.

பெரிய நம்பி காஞ்சி வந்து சேர நான்கு நாட்கள் ஆயின, பின் இராமானுஜரிடம் வந்த விவரம் சொல்லி அவரை அழைத்துச் செல்ல இன்னுமொரு நான்கு நாட்கள் ஆயின. திருமடத்திற்குப் போய் சேர்ந்த போது ஆளவந்தார் தன் பூத உடலை விட்டிருந்தார். இராமானுஜரும் பெரிய நம்பியும் பெரும் துக்கத்தில் ஆழ்ந்தனர். பூத உடலை வணங்க அருகில் சென்றபோது ஆளவந்தாரின் மூன்று விரல்கள் மடங்கியிருப்பதை இராமானுஜர் கவனித்தார்.

இராமானுஜர், “இப்பெருமானின் மூன்று விரல்கள் எப்பொழுதுமே மடங்கி இருக்குமா” என்று கேட்டார். அதற்கு அவரின் சீடர்கள் “இது புதிதாக உள்ளது, இதற்கு முன் அவர் விரல்கள் மடங்கி இருக்கவில்லை” என்றனர்.

இப்பதிலைக் கேட்டு இராமானுஜர் பாடத் தொடங்கினார், அதன் சாராம்சம்:

‘நான் வைணவ சமயத்தில் நிலைத்து நிற்பேன். அஞ்ஞான இருளில் மயங்கிக் கிடப்போருக்கு தமிழ் வேதத்தைக் கற்பித்து ஸ்ரீமன் நாராயணனின் திருவடிக் கமலங்களில் அடைக்கலம் புகுமாறும் செய்து அவர்களை உய்விப்பேன்’

இப்பாடலை பாடியதும் ஆளவந்தாரின் ஒரு விரல் நிமிர்ந்தது.

‘உலக நன்மைக்காக எல்லா பொருள்களையும் சுருங்கச் சொல்லி விளங்க வைத்து, அனைத்து நன்மைகளையும் உண்மைகளையும் வெளிப்படுத்தும் தத்துவார்த்ததை விளக்கவல்ல தெளிவுரையை செய்யக் கடவேன்’ என்று பொருள் பட இன்னொரு பாடல் பாடினர்.

இப்பாடலைப் பாடியதும் அவரின் இரண்டாவது விரலும் நிமிர்ந்தது.

‘உயிர், இறைவன், உலகம் ஆகிய இம்மூன்றின் தன்மை பற்றி உலகம் உய்யும் வகையில் முனிவர்களில் சிறந்தவரான பராசரர் ஸ்ரீ விஷ்ணு புராணம் இயற்றியுள்ளார். அவர் செய்த அரிய செயலுக்கு நன்றி கூறும் வகையில் ஒரு வைணவப் பெரியவருக்கு அம்முனிவரின் திருநாமத்தை வைப்பேன்’ என்று பொருள் படப் பாட,

ஆளவந்தாரின் மூன்றாம் விரலும் நிமிர்ந்தது.

ஆளவந்தாரின் திருக்கை விரல்கள் மூன்றும் நிமிர்ந்ததால் அவர் இடத்துக்கு வரத் தகுதியானவர் இராமானுஜரே என்று அங்கு கூடியிருந்தவர்கள் முடிவு செயதனர். ஆனால் இராமானுஜருக்கு அங்கு தங்க விருப்பம் இல்லை. ஆளவந்தாரின் திரு உரையை கேட்க இனி முடியாததால் அங்கு இருந்து என்ன பயன் என்று எண்ணி காஞ்சிக்கேத் திரும்பி விட்டார்.

திருக்கச்சி நம்பியிடம் ஆறுதல் பெறுதல்

திரும்பி வந்து திருக்கச்சி நம்பிகளிடம் மட்டுமே எல்லா விவரங்களையும் கூறினார். மனைவியுடன் சரியாகப் பேசாமல் இருக்க ஆரம்பித்தார். தனிமையையே விரும்பினார். ஆளவந்தார் மறைவுக்கு ஆறு மாதக் காலம் முன்பாக அவர் தன் தாயையும் இழந்ததனால் அவர் மனைவி தஞ்சம்மாளுக்கு மாமியார் துணையும் இல்லாமல் கணவரும் முகம் கொடுத்தும் பேசாததால் மிகுந்த மன வேதனை அடைந்தார்.

இராமானுஜரின் தனிமைப் போக்கைக் கண்டு திருக்கச்சி நம்பிகளும் அவருக்கு அறிவுரைகள் வழங்கினார். மன வருத்தத்திற்கும் சஞ்சலத்திற்கும் இடம் கொடுக்க வேண்டாம் என்று கூறினார். இராமானுஜருக்கு அவரை வீட்டிற்கு அழைத்து அமுது படைத்து அவர் உண்ட எச்சிலை சாப்பிட்டால் மன நிம்மதி கிடைக்கும் என்று எண்ணி அவரை உணவு உண்ண அழைத்தார். மனைவியும் உணவு சமைத்து வைத்திருந்தார்.

இவரை அழைக்க அவர் மடத்துக்குப் போன சமயத்தில் வேறு வழியாக திருக்கச்சி நம்பிகள் இராமானுஜர் இல்லம் வந்தடைந்தார். அவருக்கு வேறு சில வேலைகள் இருந்ததினால் விரைவில் உணவு உண்டு செல்ல வேண்டும் என்று கூறினார். இராமானுஜர் மனைவி தஞ்சம்மாள் அவர் வளர்ந்தக் குடும்ப ஆசார வழக்கப்படி அவரை வீட்டின் உள்ளே அழைக்காமல் ரேழியிலேயே இலை போட்டு உணவு பரிமாறி, அவர் உண்ட பிறகு எச்சிலெடுத்து சாணி போட்டு மெழுகி அவரும் குளித்து விட்டு வந்துவிட்டார்.

மடத்தில் இருந்து திரும்பிய இராமானுஜர் மனைவி செய்த காரியத்தை அறிந்து மிகுந்த கோபமும் வருத்தமும் கொண்டார். தான் குருவாக மதித்த ஒருவரை இவ்வாறு சாதி வித்தியாசம் பார்த்து நடத்திய தன் மனைவியின் மேல் கோபம் கொண்டு இன்னும் தனிமையை நாட ஆரம்பித்தார்.

இன்னொரு சமயம் பிராமணர் அல்லாத ஒருவர் வந்து உண்ண உணவு கேட்ட பொழுது வீட்டில் இன்னும் சமைக்கவில்லை என்று சொல்லி அனுப்பி விட்டார் தஞ்சம்மாள். ஆனால் இராமானுஜர் சமையல் அறையில் சென்று பார்த்த பொழுது நிறைய உணவு இருந்தது கண்டு அதை எடுத்து வந்து கேட்டவருக்கு இவரே கொடுத்தார். மனைவியின் இச்செயல் இவருக்கு ஏற்புடையதாக இல்லை.

ஆளவந்தார் இறைவனடி சேர்ந்த பின் மடாதிபதியாக திருவரங்கர் என்பவர் நியமிக்கப் பட்டார். அவரும் மிகவும் நல்ல முறையில் எல்லாராலும் மதிக்கப் பட்டவர். அவர் தன் சீடர்கள் அனைவரையும் அழைத்து, ஆளவந்தார் விருப்பபடி இராமானுஜரை அழைத்து வரவேண்டும் என்ற முடிவை எடுத்து, மறுபடியும் பெரிய நம்பியை காஞ்சிக்கு அனுப்பினார்.

ஆனால் இராமானுஜர் திருக்கச்சி நம்பிகளுடனேயே இருப்பதை தான் விரும்புகிறார் என்பதை உணர்ந்து திருவரங்கர், பெரிய நம்பியை, காஞ்சியிலே இருந்து அவருக்குத் தமிழ் வேதத்தை ஓதுவித்து மேதை ஆக்குங்கள், பின்னர் அவர் திருவரங்கத்திற்கு வருவதற்கு சிறிது காலமாகலாம். வற்புறுத்த வேண்டாம், தானே மனது மாறி வரட்டும் என்று அறிவுறுத்தி அனுப்பினார்.

பெரிய நம்பியைத் தஞ்சம் அடைதல்

இதே நேரத்தில் இராமானுஜரும் வரதராஜப் பெருமாளிடம் இருந்து திருக்கச்சி நம்பிகள் மூலம் சில சந்தேகங்களுக்கு விடை கிடைத்தபடியால்,

(அவை-

  1. திருமாலே முழு முதற் கடவுள்.
  2. ஜீவாத்மக்களில் இருந்து பரமாத்மா வேறுபட்டவன். உயிர்களிலும் ஜடப் பொருள்களிலும் ஸ்தூல/சூட்சும சரீரமாக பரமனே விரவி நிற்கிறான்.
  3. ஆண்டவனை அடையும் முக்தி நெறி சரணாகதியாகும்.
  4. அந்திம காலத்தில் பரமனை சிந்தையில் நிறுத்த வேண்டும் என்பது அவசியமில்லை
  5. உடலில் வாழ்ந்த காலத்தில் (பரமன் திருவடிகளில்) பூரண சரணாகதியை கடைபிடித்த ஆன்மாவானது உடலை விட்டுப் பிரிந்த பின்னர் முக்தி அடைகிறது.
  6. பெரிய நம்பியை ஆச்சாரியனாக நினைத்து நடப்பாயாக.)

மிகவும் மகிழ்ந்து அந்நிலையில் திருவரங்கம் செல்ல முடிவு செய்து புறப்பட்டார். திருவரங்கத்தில் இருந்து புறப்பட்டு வந்த பெரிய நம்பியும், காஞ்சியில் இருந்து புறப்பட்ட இராமானுஜரும் மதுராந்தகம் ஏரி காத்த இராமன் கோவிலில் சந்தித்தனர். இருவர் உள்ளத்திலும் இந்த எதேச்சையான சந்திப்பில் பெரு மகிழ்ச்சி ஏற்பட்டது. அங்கேயே பெரிய நம்பியின் சீடனாக இராமானுஜர் தீட்சைப் பெற்றார். பின் அவரையும் அவர் உடன் வந்த அவர் மனைவியையும் காஞ்சிக்கு அழைத்துச் சென்று தன் வீட்டின் மாடியிலேயே தங்க வைத்து அவர்கள் வீட்டு நிர்வாக பொறுப்பு அனைத்தையும் அவரே ஏற்றுக் கொண்டார். இராமனுஜருக்கு பெரிய நம்பி பஞ்ச சம்ஸ்காரம் (சங்கு சக்கர இலச்சினை ஓமத்தீயின் மூலம் இடது தோளிலும் வலது தோளிலும் ஆச்சாரியன் பொருத்துவது) செய்வித்ததும், பெரிய திருமந்திரத்தை உபதேசித்ததும் அவரின் வாழ்க்கையில் மறக்க முடியாத ஒரு நிகழ்ச்சியாகும்.

நாள் தோறும் தமிழ் மறையாகிய திவ்ய பிரபந்தத்தையும் (ஆழ்வார்கள் அருளிச் செய்தல்களையும்), பிரம்ம சூத்திரங்களையும் பெரிய நம்பியிடம் கற்றுத் தேர்ந்தார் இராமானுஜர். ஆறு மாத காலம் இவ்வாறு ஓடியது. ஒரு நாள் தண்ணீர் பிடிக்கும் இடத்தில் குரு பத்தினியும் தஞ்சம்மாளும் ஒரே சமயத்தில் நீர் பிடிக்கச் செல்லுகையில் குரு பத்தினியின் குடத்தில் இருந்த நீர் தஞ்சம்மாளின் குடத்தில் சிந்தி விட்டது. அதனால் கோபம் கொண்ட தஞ்சம்மாள், உன் தந்தையை விட என் தந்தை உயர்ந்த குலம். உன்னால் என் ஆசாரம் கெட்டுவிட்டது என்று தகாத சொற்களினால் குரு பத்தினியை ஏசி விட்டார். இத்தனைக்கும் அவர் தஞ்சம்மாளிடம் மன்னிப்புக் கேட்டுக் கொண்டார். இதனால் இல்லம் திரும்பிய பின் வருத்தத்தில் குரு பத்தினி அழுது கொண்டிருப்பதைக் கண்டு, பெரிய நம்பி விஷயம் என்னவென்று அறிந்து, உடனே மனைவியை அழைத்துக் கொண்டு அவர்கள் வீட்டை விட்டகன்று திருவரங்கம் திரும்பினார்.

இவை ஒன்றும் அறியாத இராமானுஜர் இல்லம் வந்தபோது தன் குருவும் குரு பத்தினியும் இல்லாதது கண்டு திகைத்து மனைவியின் வாய் மூலம் நடந்ததை தெரிந்து கொள்கிறார். அதுவும் மனைவி தான் செய்தது சரி என்று பேசியது அவரின் ஆத்திரத்தைப் பன்மடங்காக்கியது. உன் முகத்தில் விழிப்பதே பாவம் என்று கூறி அவர் குருவுக்காக வாங்கி வந்த பழம் காய் இவைகளை எடுத்துக் கொண்டு கோவிலுக்குச் சென்று வரதனிடம் சமர்ப்பித்தார். திரும்பி வரும்போது பசியால் வாடும் ஓர் ஏழை பிராமணரைப் பார்த்தார். அவரிடம் என்னுடன் என் இல்லத்துக்கு வாருங்கள் உணவு தருகிறேன் என்று கூறினார். அதற்கு அவரோ உங்கள் இல்லத்தில் இருந்து தான் வருகிறேன், உங்கள் மனைவி ஏதோ கோபத்தில் இருக்கிறார் போலும் உணவில்லை என்று திட்டி அனுப்பிவிட்டார் என்றார்.

துறவு

உடனே இராமானுஜர் அவரை கடைத்தெருவுக்கு அழைத்துச் சென்று வெற்றிலை பாக்குப் பழம் இவற்றை வாங்கிக் கொடுத்துத் தன் கைப்பட ஒரு கடிதமும் எழுதிக் கொடுத்து இப்போ திரும்பவும் வீட்டிற்குச் சென்று மனைவியின் பிறந்த வீட்டில் இருந்து வருவதாகச் சொல்லி கொடுங்கள் என்றார்.

அவ்வாறே அந்தப் பிராமணரும் செய்ய அவருக்குப் பெரிய வரவேற்பும் உபசரிப்பும் தஞ்சம்மாளிடம் இருந்து கிடைத்தது. அப்போது ஒன்றும் தெரியாதது போல இராமானுஜரும் வீட்டிற்குள் நுழைய தஞ்சம்மாள் அந்தப் பிராமணர் கொண்டு வந்தக் கடிதத்தைக் காட்டுகிறார். அதில் தஞ்சம்மாளின் தந்தை தன் இளைய மகளுக்குத் திருமணம் நிச்சயம் ஆகியிருப்பதால் மகளை உதவிக்கு அனுப்புமாறு தன் மாப்பிள்ளைக்கு எழுதியது போல இருந்தது. தங்களால் வர முடியாவிட்டாலும் மகளை அனுப்புமாறு அக்கடிதத்தில் எழுதியிருந்ததைப் பார்த்துத் தஞ்சம்மாள் மிகவும் மகிழ்ச்சி அடைந்து உணவை உட்கொண்டு கணவனிடம் இருந்து விடை பெற்றுக் கொண்டு தன் தாய் வீடு புறப்பட்டாள்.

இராமானுஜர் நேராக வரதராஜன் சந்நிதிக்குச் சென்று நெடுஞ்சாண்கிடையாக அவர் முன் விழுந்து, எனக்குத் துணையாக இருக்க வேண்டியவள் என் கருத்துக்கு மாறாகவே இருக்கிறாள். எனவே என்னை ஆட்கொண்டு தங்கள் திருவடிக்கு ஆளாக்கிக் கொள்ள வேண்டும் என்று இறைஞ்சினார். பின் பெருமாளைப் பிரார்த்தித்துக் கொண்டு காஷாயத்தைத் தரித்துக் கொண்டார். திரி தண்டத்தைக் கையில் ஏந்திக் கொண்டார்.

இறைவனும் அசரீரியாக “சந்நியாசம் மேற்கொண்டு கீழண்டை கோபுர வாயில் மடத்தில் தங்குவாயாக” என்று அவர் காதில் ஒலித்து அருள் பாலித்தார். இளம் சூரியனைப் போல ஒளி திகழக் காட்சி அளித்த இராமானுஜரின் திருக்கோலத்தைக் குளக் கரையில் முதலில் கண்ட திருக்கச்சி நம்பிகள் அவரை, துறவியருள் சிறந்தவர் இவரே என்ற பொருளில் எதிராஜரே என்று அழைத்தார். அன்று முதல் அவர் இராமானுஜ முனி அல்லது எதிராஜர் என்று அழைக்கப் படலானார்.

இராமானுஜர் மனைவியை வஞ்சகமாகப் பிறந்தகம் அனுப்பிவிட்டு துறவறம் மேற்கொண்ட முறை சரியென்றும் சரி அல்ல என்றும் பல கருத்துகள் உள்ளன. அதற்குள் நாம் இப்பொழுது போகவில்லை. ஞானம் முதிர்ந்த நிலையில் அவர் துறவறம் மேற்கொண்டது அவரின் பிறவிப் பயனே.

அவர் துறவறம் மேற்கொண்டதும் திருவரங்க மடாதிபதி பொறுப்பை ஏற்றுக் கொண்டார்.  அவரின் முதல் சீடரானது அவருக்கு மருமகன் முறையாகும் தாசரதி எனப்படும் முதலியாண்டான். அவருடைய சீடர்களில் சிறப்பாக குறிப்பிட வேண்டியவர்கள் கூரத்தாழ்வார் ஆவார்.

காஞ்சிக்கு அருகில் கூரம் என்றொரு கிராமம். அதன் அதிபதி கூரத்தாழ்வார். மிகப் பெரிய செல்வந்தர். அவரது மனைவி ஆண்டாளும் கூரத்தாழ்வாரும் மிகவும் நன்கு படித்தவர்கள். மேதைகள், வள்ளல் தன்மை மிக்கவர்கள். சிறந்த பக்திமான்கள். கூரேசன் நுண்ணிய நினைவாற்றல் கொண்டவர். அவர்கள் காஞ்சிக்கு வரதராஜப் பெருமாளை சேவிக்க வந்தபொழுது இராமானுஜர் துறவியானது கேள்விப்பட்டு அவரின் மடத்துக்குச் சென்று வணங்கினார்கள். அவரால் ஆட்கொள்ளப் பட்டு தங்கள் செல்வம் அனைத்தையும் தான தர்மம் செய்து விட்டு அவரின் இரண்டாவது சீடரானார் கூரத்தாழ்வார். இவ்விரு சீடர்களையும் தனது திரி தண்டமாகவும், பவித்திரமாகவும் இறுதிவரை பாவித்து வந்தார் ஸ்ரீ இராமானுஜர்.

நமது திண்ணை – ஜூலை மாத இணைய இதழில் வெளியானது இக்கட்டுரை.

பகுதி 2

பகுதி 1

Advertisements

10 Comments (+add yours?)

  1. Kannabiran Ravi Shankar (KRS)
    Jul 22, 2015 @ 03:26:30

    வணக்கம் அம்மா..

    இது பகுதி 4ஆ? பகுதி 3ஆ?
    சென்ற முறை வாசித்தது பகுதி 2 என்று நினைவு..

    இராமானுசரின் “மிக முக்கியமான வாழ்க்கைக் கட்டத்தைத்” தொட்டுச் சென்றுள்ளீர்கள்; நன்றி!

    பொதுவா, சாதி உணர்வுகள் “குறைந்துவிட்டதாகச்” சொல்லப்படும் இந்த அறிவியல் காலத்திலேயே..
    (குறைந்துவிடவில்லை; பொதுவில் பேசக் கூச்சம் வந்துள்ளது, அவ்ளோ தான்! அதுவும் சில பல பெரியோர்-பெரியார்களால் ஆன நற்செயல்
    மற்றபடிக்கு, மனத்தளவில் இன்னும் ஒழிந்தபாடில்லை, நன்கு படித்தவர்களிடத்தேயும் கூட)

    அப்படியான இந்த அறிவியல் காலத்திலேயே, சாதி எதிர்புக்காகத் தன் தனிப்பட்ட சொந்த மண-வாழ்க்கையை எவரும் துறந்து விடுவதில்லை!
    ஆனால், அறிவியல் பரிணமிக்காத 1000 ஆண்டுகளுக்கு முன்னரே, தன் குடும்ப வாழ்வைத் தொலைத்து விட்ட நின்ற இராமானுசர்!:(

    இத்தனைக்கும் வைணவம், சன்னியாசம் பெற்றக் கொள்ளாமல், குடும்ப வாழ்வில் இருக்கும் ஜீயர்களையும் ஏற்கும்! (இன்றைக்கும் திருக்கோவிலூர் ஜீயர் போன்றவர்களே சான்று)
    ஆனால், அப்படிச் செய்யாமல்.. தன் மனைவியைத் துறந்த இராமானுசர்;

    “வஞ்சித்து” துறந்தார் என்று சொல்லி உள்ளீர்கள்:)
    சொல்லலாம்.. புனிதர்கள் கோபித்துக் கொள்வார்களோ? என்று பயந்து எழுதியதை மாற்றி விட வேண்டாம்:)
    தஞ்சம்மாள் என்ற அந்தப் பெண் செய்த செயல்கள் அப்படி:(
    “கூறாமல் சன்னியாசம் கொள்” என்று பின்னாள் ஒளவைப்பாட்டி அறிவுறுத்தியதும் அஃதே!

    அப்படி, “வஞ்சித்து”த் துறக்க வேண்டிய காரணங்கள்:
    1. நாலாம் வருணத்தாராகிய திருக்கச்சி நம்பிகள்: அவரை, அவள், “கோலால் எச்சில் இலை எடுத்து” நடத்திய விதம்
    2. குருவின் மனைவியிடம், சாதி சொல்லி, கிணற்றடியில் அள்ளி இறைத்த தகாத “வார்த்தைகள்”
    3. பசித்து வந்தவனிடம், உணவு இல்லை என்று பொய் சொல்லி, பின்பு தன் அப்பா வீட்டிலிருந்து வந்திருக்கிறான் என்பதற்காகவே, பஞ்ச பட்ச பரான்னம் விருந்து வைத்த *மனித நேயப்* பான்மை

    வாயால் புரட்சி (or) ஆன்மீகம் பேசுவோருக்கு, இதெல்லாம் ஒன்னுமில்லை..
    ஆனால், மெய்யாலுமே *உள்ளத்தால் சாதி பாராமை* – அதான் இராமானுசர், இளம் வயதில், வாழ்க்கை தொலைச்சிட்டு நின்றார்;(

    Reply

    • Kannabiran Ravi Shankar (KRS)
      Jul 22, 2015 @ 03:42:21

      போனவள் போனவள் தான்..

      பின்பு தன் *காதல் நாயகர்* விட்டு விட்டாரே என்று கலங்க-ல்லாம் இல்லை; தொடர்பு கொள்ள முயலவும் இல்லை..
      இராமானுசர், தன் குடும்பச் சொத்தில் அவளுக்கு வைத்து விட்டுப் போன செல்வத்தில் சுகமே, செளபாக்கியவதியாய் இருந்தாள்.

      இராகவேந்திரரின் மனைவி கதை வேறு.. அன்பை விடமுடியாது மாண்டு போனாள்;(
      காரைக்கால் அம்மை எனும் தோழி புனிதாவின் கதை வேறு.. இவ காத்துக் கெடக்க, வேறு ஒருத்தியைக் கட்டிக்கிட்டு, புதுசாப் பெத்துக்கிட்டு வந்து நிக்குறான் பாவி;(

      ஆனால் இங்கோ, மகராஜி.. ’ஜாதி’ செளபாக்கியமா வாழ்ந்து முடித்தாள்..

      Reply

  2. Kannabiran Ravi Shankar (KRS)
    Jul 22, 2015 @ 04:38:41

    இதற்குப் பின்னுள்ள.. வரலாற்றுப்படியான தகவல்களைப் பார்த்தால்.. இது ஏன்? என்பது விளங்கும்!
    சில *பிராமணத் தகவல்களைச்** சொல்ல, இசைவு தருவீர்கள் என்ற நம்பிக்கையில் சொல்கிறேன்..

    இராமானுசர் பிறப்பால் பிராமணர்; ’வடமா’ என்னும் பிரிவினர்;
    சைவ நெறியே மிகுதி; அத்வைதிகளே பெரும்பாலும்..

    மற்ற எந்தப் பிராமண வகுப்பைக் காட்டிலும், ’வடமா’ ஆகிய தாங்களே கலப்படமில்லாத வைதீகர்கள்; ‘வட’க்கில் இருந்து வந்த வடமாக்கள் என்ற நினைப்பு;
    ராஜராஜ சோழன் முதலான மன்னர்களால், இவர்கள் குடிப்பெயர்வும், கல்வியால் அரசவை அதிகாரப் பரவலும் நிரம்ப இவர்கட்கு!

    பிற பிராமண வகுப்பினரான பிரஹசரணம், அஷ்ட சகஸ்ரம், வாதிமா.. போன்றவர்களே இவர்களிடம் ஏச்சு வாங்கும் போது,
    பிற்படுத்தப்பட்ட மக்கள் பற்றிச் சொல்லவா வேண்டும்?:(

    நீங்கள் பதிவில் குறிப்பிட்ட கிணற்றடிக் காட்சி..
    *இராமானுசரின் குரு, பெரிய நம்பிகளின் மனைவி= பிரஹசரணம்
    *இராமானுசரின் மனைவி, தஞ்சம்மா= வடமா
    அதான், அந்தப் பெண்மணியைப் பார்த்து, இராமானுசரின் மனைவி “வார்த்தை” இறைத்தாள்:(

    இராமானுசரால் மட்டும் எப்படி, இந்தச் “சாதி மனோநிலை”யைக் கடக்க முடிந்தது? = ஏன்னா.. ஆழ்வார் பாசுரங்கள்!

    பிறந்தது முதலே அக்ரஹாரத்தில் வளர்ந்தவருக்கு, யாதவப் பிரகாசரிடம் வேதம் பயின்றவருக்கு..
    அப்போது, ஆழ்வார் அருளிச் செயல்கள் “பரிச்சயம்” இல்லை!

    ஆனால் வந்தது “தமிழ்-வினை”, திருக்கச்சி நம்பிகள் மூலமாக; நாலாம் வருணத்துத் திருமால் அடியார்!
    அப்போது தான் தலையெடுக்கத் துவங்கி இருந்த நாதமுனிகளின் “தமிழ் சார்ந்த” வைணவ நெறி;
    சமூகத்தின் கடைநிலை மக்களை/ பிற்படுத்தப்பட்டவர்களையும் தம்மோடே அரவணைத்துக் கொண்டது;

    (திருமணங்கொல்லை, திருவாலி, திருநகரி போன்ற ஊர்களிலுள்ள பெருமாள் கோயில்களில், இன்றும் அவர்கள் அர்ச்சகராக உள்ளார்கள்.
    ஆனால் அவர்களைக், “கருப்புப் பார்ப்பான்” என்று சில வைதீக பிராமணர்கள் ஒதுக்குவதைக் காணலாம்:(((

    இப்படி, “ஈரத்தமிழான” ஆழ்வார் அருளிச் செயல் பரவத் துவங்கிய காலத்தில் தான், இராமானுசர், கால வெள்ளத்தில் மாட்டிக் கொண்டார்..
    அவரின் அப்பழுக்கில்லாத மனசு, “போலி ஆத்திகத்தை” விடுத்து, “ஆத்மார்த்தமான ஆத்திகம்” பால் நிற்கத் துவங்கியது!

    “அரங்க மா நகருளானே” – பச்சை மா மலை போல் மேனிப் பாசுரம் தான் பலருக்கும் தெரியும்!
    ஆனா, அதுவொரு “சாதிப் புரட்சிப் பாசுரம்” என்பதே பலருக்குத் தெரியாது..

    அமர ஓர் அங்கம் ஆறும்
    வேதம் ஓர் நான்கும் ஓதி
    தமர்களில் தலைவராய
    சாதி அந்தணர்கள்
    அவர்கள் தாம் புலையர் போலும்
    அரங்க மா நகருளானே..

    இப்படிப் பாட, பெருந்துணிவு வேண்டும், அந்தக் காலக் கட்டத்தில்!
    ஜாதிப் பிரஷ்டம் பண்ணி, ஒதுக்கியே வச்சிருவாங்க!
    அதையெல்லாம் மீறி எழுந்த, ஈரத் தமிழ்ப் பாசுரங்கள்!

    நம்மாழ்வார் எ. மாறன் ; வெறுமனே 32 வயசு நாயகி பாவப் பையன்..
    அதுவும் நாலாம் வருணம்!
    எனினும் அவனையே “குல முதல்வன்” என்று வைக்கும் பெரும் துணிவு!
    அவனை முன்னிட்டு, நாதமுனிகள் துவங்கி வைத்த மரபிலே.. கொஞ்சம் கொஞ்சமாய் ஆள் சேர்ந்த போது..
    திருக்கச்சி நம்பிகளும் சேர்ந்து.. இராமானுசர் எனும் வைதீக பிராமணரையும், ஈரத் தமிழுக்கு உள்ளே இழுக்க முடிந்தது!

    *இராமானுசர் = உள்ளத் தூய்மை; இழுக்கப்பட்டார்
    *அவர் மனைவி, தஞ்சம்மாள் = “வைதீகச் செல்வி”; இழுக்கப்படவில்லை..
    விளைவு: இல்லற வாழ்க்கை முறிந்து போனது:(

    (மேலும், வரலாற்றுத் தகவல்களுக்கு.. தமிழறிஞர் தொ.பரமசிவம் நூலினைக் காண்க)

    Reply

  3. Kannabiran Ravi Shankar (KRS)
    Jul 22, 2015 @ 05:25:11

    பதிவில், சிற்சில திருத்தங்கள்.. சொல்ல அனுமதி தாருங்கள்:)

    //நீங்களே எனக்குக் குருவாகத் தகுந்தவர், என்னை ஏற்றுக் கொள்ளுங்கள்” என்று பணிவுடன் கூறி அவரை விழுந்து வணங்கினார்//

    இராமானுசரின் முதல் “குரு” = so called தாழ்த்தப்பட்ட குலத்தினரான, திருக்கச்சி நம்பிகளே!
    அவர் இல்லையேல்.. இன்று இராமானுசரே இல்லை!

    இராமானுசரை ஏற்றுக் கொண்டார் என்று மட்டும் சொல்லி நிறுத்தி விட்டீர்கள்..
    ஆனால், “வேதப் படிப்பை” விட, “தொண்டே” சிறப்பு -ன்னு உணர்த்தி..
    தினமும், பெருமாள் திருமஞ்சனத்துக்கு, தண்ணீர் கொண்டாந்து ஊத்தும் பொறுப்பை, இராமானுசர் மேல் இட்டார் -என்ற செய்தி மிகவும் முக்கியம் அம்மா:)

    சென்னை, கந்த கோட்டம், முருகன் கோயிலில்… திருக்கச்சி நம்பிகளின் சிலையை, இன்றும் காணலாம்!
    குளக்கரை (சரவணப் பொய்கை ஓரம்) ; அவரின் பிற்படுத்தப்பட்ட வகுப்பினர், பின்னாளில் வைத்தது;

    //ஆளவந்தாரின் மூன்று விரல்கள் மடங்கியிருப்பதை இராமானுஜர் கவனித்தார்//

    இதிலும் ஒரு சிறு திருத்தம்;
    இராமானுசர் சொன்ன அந்த 3 உறுதிமொழிகள்.. ரொம்பவும் பொதுப்படையாச் சொல்லிட்டீக:)
    ஆனால், மிகத் தெளிவான Project Goals!

    1. திராவிட வேதமான, நம்மாழ்வாரின் திருவாய்மொழிக்கு, உரை செய்ய வைப்பேன்
    2. வடமொழி வேத விளக்கமான, பிரம்ம சூத்ரங்களுக்கு, பாஷ்யம் (உரை) செய்குவேன்
    3. “குல முதல்வன்” நம்மாழ்வார் பேரும், பராசர முனிவர் பேரும், வரும் சந்ததிக்கு வைத்து, உலகறியச் செய்வேன்.

    //ஆளவந்தார் இறைவனடி சேர்ந்த பின் மடாதிபதியாக திருவரங்கர் என்பவர் நியமிக்கப் பட்டார்//

    அப்படியெல்லாம் யாரும் நியமிக்கப்படலை:)
    இராமானுசர் வரும் வரைக்கும், குருபீடம் காத்துக் கொண்டே தான் இருந்தது!

    Dunno what is your source reference material, ma;
    But the following are authentic
    1. ஆறாயிரப் படி – குரு பரம்பரைப் பிரபாவம்
    2. வடுக நம்பி எழுதிய யதிராச வைபவம்
    3. அனந்தாழ்வான் எழுதிய வேங்கடாசல இதிகாச மாலை
    4.PB Anna (பிரதிவாதி பயங்கரம்) எழுதிய இராமானுச வைபவம்

    நீங்கள் சொல்ல வந்தவர்: “திருவரங்கர்” அல்லர்:) அவர் பேரு=திருவரங்கப் பெருமாள் அரையர்

    ஆளவந்தாருக்கு ஆறு சீடர்கள்:
    1. திருக்கச்சி நம்பிகள்
    2. பெரிய நம்பிகள்
    3. திருக்கோட்டியூர் நம்பிகள்
    4.பெரிய திருமலை நம்பிகள்
    5. திருமாலை ஆண்டான்
    6. திருவரங்கப் பெருமாள் அரையர்
    உங்களுக்குக்கு அப்பறம் எங்களில் ஒருவரையே நியமிக்கலாமே? யாரோ ஒரு இராமானுசரைத் தேடி ஏன் ஓடுறீங்க? -ன்னு வாரிசு உரிமைச் சண்டை போடாத நல்லவர்கள்:)

    மற்றபடி, பதிவு வெகு நன்று!

    டேய் கந்த கோட்டத்து முருகா,
    திருக்கச்சி நம்பிக்கும் + இராமானுசருக்கும் வணக்கம் சொல்லு!
    அப்படியே அவர்களை எழுதிய அமாஸ் அம்மாவுக்கும் வணக்கஞ் சொல்லு; ஒன்னும் கொறைஞ்சிப் போயீற மாட்ட!:)

    சைவம்/வைணவம்-ல்லாம் ஒனக்கும் இல்ல, எனக்கும் இல்ல; நீ, “மதம்” கடந்த ஆதித் தமிழ்!
    தமிழ்த் தொண்டு.. பிராமணரே செய்தாலும், சமணர்களே செஞ்சாலும், முருகா நீ தலை வணங்கு!
    இராமானுசர் திருவடிகளே தஞ்சம்..

    Reply

  4. amas32
    Jul 22, 2015 @ 11:23:56

    ரொம்ப நன்றி KRS 🙂 Noted all the points. பிழை பொறுத்தருள்வீர். நீங்கள் இங்குக் குறிப்பிட்டு உள்ளவை சில அடுத்தத் தொடர் பதிவில் வருகிறது. ஆளவந்தாரின் ஆறு சீடர்களே இராமானுஜரின் ஆறு ஆசிரியர்களும் கூட.

    நீங்கள் பிராமண வகுப்பின் உட்பிரிவுகளை எல்லாம் குறிப்பிட்டு விளக்கம் அளித்துள்ளீர்கள். நான் எழுதியதிலேயே தஞ்சம்மாளின் குணம் தெரிந்து விடுகிறது. இவ்வளவு விளக்கம் தேவை இல்லை என்றெண்ணி தான் அவைகளை நான் எழுதவில்லை.

    இராமானுஜர் தன மனைவியை வஞ்சித்துத் துறந்தார் என்று நான் எங்கும் குறிப்பிடவில்லை. அவர்களுக்குள் மனத்தால் ஒற்றுமை இல்லை. அதனால் சொல்லாமல் துறவறம் மேற்கொண்டார் என்றே குறிப்பிட்டுள்ளேன். கணவனின் கடமை மனைவியை காப்பது. துறவு வாழ்க்கையை மேற்கொள்ளும்போது தவிப்பது மனைவி தான், அது இராகவேந்திரரின் மனைவியாக இருந்தாலும், அரசன் சித்தார்த்தனின் மனைவியாக இருந்தாலும், இராமானுஜரின் மனைவியாக இருந்தாலும் ஒதுக்கப்பட்ட பெண்ணின் வலி ஒன்றே!

    இராமானுஜர் சொன்ன உறுதி மொழிகளை வேறு மாதிரி சொல்லியிருக்கிறீர்கள். நான் படித்தப் புத்தகங்களில் இருந்து எடுத்தவையை நான் பகிர்ந்துள்ளேன். நீங்கள் கொடுத்திருக்கும் referenceஐயும் பார்க்கிறேன்.

    ரொம்ப நன்றி KRS 🙂

    Reply

  5. Sukanya
    Jul 22, 2015 @ 12:46:46

    Romba nandraga irukku. Niraiya vishayam arindhu konden. Melum padikka migundha aaval. Vazhga nee.

    Reply

  6. Kannabiran Ravi Shankar (KRS)
    Jul 22, 2015 @ 12:53:34

    //இராமானுஜர் மனைவியை வஞ்சகமாகப் பிறந்தகம் அனுப்பிவிட்டு//

    இந்த வரியைத் தான் சொன்னேன்-ம்மா..

    புத்தரின் மனைவி யசோதரை..
    இராகவேந்திரர் மனைவி சரஸ்வதி
    .. இவர்கள் விடயத்திலெல்லாம் நீங்கள் சொன்னது தான் சரி; அபலைப் பெண்கள். வலி:(

    நான் என்றும் யசோதரை & காரைக்கால் அம்மையின் பக்கமே!
    http://madhavipanthal.blogspot.com/2008/11/icon-poetry.html?m=1

    ஆனால், தஞ்சம்மாள் விடயத்தில், அவள் கொடுத்தது தான் “பெரிய வலி”;
    அவளுக்கு வலியேதுமின்றி, ஜாதியைப் பிடிச்சித் தொங்கிக்கிட்டு, பரம செளக்கியமாகத் தான் வாழ்ந்து முடித்தாள்..

    //பிழை பொறுத்தருள்வீர். //

    அய்யோ.. பிழை-ல்லாம் ஒன்னுமில்லை..சிற்சில தகவல்கள், அவ்வளவே..
    எ.கா.. திருவரங்கர் என்றொரு இடைக்கால மடாதிபதி etc etc..

    அதான் எடுத்துக்காட்ட நாங்கள் உள்ளோமே.. கவலையுறாது, வெற்றியுடன் தொடர்க! வாழ்த்துக்கள்..

    மேற்சொன்ன சில நூல்கள், இராமானுசர் காலத்திலேயே எழுதப்பட்டவை, அதுவும் உடன் இருந்து நேரடியாகப் பார்த்தவர்களால்..
    அதில் சிலர், தனி மனித வழிபாடு செய்யாது, இராமானுசர் பேச்சையே சில சமயம் மீறும் “துணிவு” உடையவர்களும் கூட:)

    Reply

  7. Trackback: இராமானுஜர் பகுதி -6 நிறைவு பகுதி! | amas32
  8. தாயன் (@ThayanTalks)
    Oct 17, 2015 @ 07:47:18

    மிக அருமையான பதிவுகள். மிகவும் பிடித்தது

    Reply

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: