கோலமாவு கோகிலா – திரை விமர்சனம்

நயன் இப்போ சூப்பர் ஸ்டார் லெவல். நயன் தேர்ந்தெடுக்கற கதைகளும் அந்த லெவல் தான். சமீபத்தில் அவர் நடிப்பில் வந்த படங்கள் அனைத்தும் ஒவ்வொன்றும் ஒரு விதம், மேலும் அவர் அப்படங்களில் ஹீரோ அளவுக்கு முக்கிய வேடத்தில் வருகிறார் அல்லது ஹீரோவுக்கு ஜோடி என்றாலும் நடிக்க நல்ல வாய்ப்புள்ள பாத்திரங்களில் நடித்து வருகிறார். இந்தப் படமும் மிகவும் வித்தியாசனமான படம் தான்.

பேய் படங்கள் சீசன் மாதிரி இப்போ டார்க் க்ரைம் காமெடி சீசன். கோலமாவு கோகிலா அத்தகைய கதையே! பொருளாதரத்தில் நடுத்தரக் குடும்பத்துக்கும் கீழுள்ள ஒரு குடும்பத்தின் மூத்த மகளாக பொறுப்புள்ள அழகிய பெண் கோகிலாவாக வருகிறார் நயன்தாரா. அவர் வேலையில் சந்திக்கும் செக்ஸுவல் ஹேரஸ்மென்டை எதிர்த்து வெளியேறும் விதம், பின் அடுத்த வேலையை விரைவில் சேரும் சாமர்த்தியம் இவை மூலம் அவர் பாத்திரத் தன்மையை ஏழை குடும்பப் பெண் என்றாலும் கெத்தும், சாமர்த்தியமும் உடையவர் என்று முதல் காட்சிகளிலேயே புரிய வைத்து விடுகிறார் இயக்குநர் நெல்சன். அதன் பின் அம்மாவின் நோயின் மருத்துவ செலவுக்காக சந்தர்ப்பவசத்தால் ஒரு குறுக்கு வழி தெரியும்போது அதைப் பற்றிக் கொண்டு பணம் ஈட்ட ஆரம்பிக்கும் வரை நன்றாகவே யதார்த்தத்துடன் நகர்கிறது கதை. அடுத்து அந்த ஹெராயின் கடத்தும் கும்பலுடன் சேர்ந்து கொலை செய்வதையும் சகஜமாக பார்க்கும் போது (அசால்டாக இன்னொரு கொலை செய்யத் தூண்டுவது எல்லாம்!!!!) அந்தப் பாத்திரத்தின் தன்மை இயல்புக்கு எதிராக மாறுகிறது. அம்மாவுக்காக என்று செய்யும் சில செயல்கள் தவறாக இருந்தாலும் பயந்து பயந்து செய்யும் நேர்த்தி நன்றாக இருக்கிறது ஆனால் தீடீரென்று தேர்ந்த கடத்தல்காரியாக மாறும்போது நெருடல் ஏற்படுத்துகிறது.

அந்த நெருடலை பொருட்படுத்தாவிட்டால் அதற்குப் பின் திரைக்கதை கொஞ்ச நேரத்துக்கு நன்றாக நகர்கிறது. யோகி பாபு நயன் மேல் ஒரு தலைக் காதலுடன் அவர் வீட்டின் எதிர் பக்கத்தில் பொட்டிக் கடை வைத்திருக்கிறார். அவருக்கு மக்களிடையே நல்ல வரவேற்பு, திரையில் தோன்றியவுடனே ஆர்பரிக்கிறது திரையரங்கம். அவரின் நகைச்சுவை பங்களிப்பினால் கொஞ்சம் இழுவையாக இருக்கும் படத்தைத் தூக்கி நிறுத்துகிறது. நயனின் தங்கையாக வரும் ஜெக்குலினின் ஒரு ரெண்டாங்கெட்டான் காதலனாக வரும் அன்புதாசனும் கலக்கலாக நடித்திருக்கிறார். அவர் பத்திரமும் நகைச்சுவைக்கு நன்றாக உள்ளது. ஆனால் நயனும் குடும்பத்தாரும் ஹெராயின் கடத்தலுடன் நிறைய பேரை கொலை செய்வதையும் எந்தவொரு குற்ற உணர்வும் இல்லாமல் செய்வது அவர்களின் பாத்திரப் படைப்புக்கு சரியாக ஒத்து வரவில்லை. ஒரு சாதாரண குடும்பத்துப் பெண்கள் ஒரு டான் குடும்பத்து ஆண்கள் போல செயல்படுவது கதையோடு ஒன்றமுடியாமல் செய்துவிடுகிறது.

கொலைகள் இல்லாமல் சாமர்த்தியத்துடன் நயன் செயல்பட்டு எதிரிகளை வீழ்த்துவதாக காட்டியிருக்கலாம். பின் பாதியில் நூறு கிலோ ஹீரோயினுடன் அந்தக் குடும்பம் ஒரு வேனில் சுத்துவது எல்லாம் காதில் பூ. போலிஸ் அதிகாரியாக சரவணன் வருகிறார். அம்மாவாக சரண்யா பொன்வண்ணன். ஒரு ஹெராயின் விநியோகஸ்தராக மொட்டை ராஜேந்திரன். இவர்கள் எல்லாம் கதைக்கு நல்ல பலம். அனிருத்தின் இசையில் சில பாடல்கள் படம் வரும்முன்னே பிரபலம் ஆகிவிட்டன. பின்னணி இசையும் நன்றாக உள்ளது. சிவகுமார் விஜயனின் ஒளிப்பதிவும் நன்றே.

சில இடங்களில் வாய் விட்டு சிரிக்க வைக்கிறது படம். ஆனால் எதிர்பார்த்த அளவு சுவாரசியமாக இல்லை. எதிர்பார்த்தது நம் தவறோ? ஹாலிவுட்டில் 2013ம் ஆண்டு வெளிவந்த We’re the Millers படத்தின் காப்பி இந்த படம், அதில் ஹீரோ பிரச்சனையில் மாட்டிக்கொள்வார், அதை மாற்றி இப்படத்தில் ஹீரோயின். அனால் படத்தை முழுவதுமாக தாங்கி நிற்கிறார் நயன்தாரா, அதில் ஒரு சந்தேகமும் இல்லை. (சாவித்திரி மாதிரி ஒரு கண்ணில் மட்டும் அழுகிறார்). அவருக்கு இது ஒரு வெற்றிப் படம்!

விஸ்வரூபம் -2 திரை விமர்சனம்

படம் தொடங்கியவுடன் அக்ரஹாரத்துக்குள்ள நுழைந்து விட்டோமான்னு ஒரு சந்தேகம். அத்தனை பிராமண பாத்திரங்கள், அலுக்க சலிக்க பிராமண மொழி. இடைவேளைக்குப் பிறகு இந்தத் தொந்தரவு இல்லை. ஈஸ்வர ஐயர் செத்து விடுகிறார். இல்லையென்றால் வீட்டுக்குப் போவதற்குள் பார்க்க வந்த ரசிகர்கள் எல்லாரும் பிராமண மொழியில் பேச ஆரம்பித்திருப்பார்கள். ஆனாலும் பூஜா குமார் கடைசி வரை உயிரோடு இருப்பதால் படம் பார்த்துவிட்டு செல்லும் சிலர் இரவு தயிர் சாதம் மாவடுவுடன் சாப்பிட்டாலும் ஆச்சரியப் படுவதற்கில்லை.

விஸ்வரூபம் 1 வெளிவந்து ஐந்து வருடங்கள் கழித்து இரண்டாம் பாகம் வெளிவருகிறது. அந்தப் படத்தை பார்த்தவர்களுக்கு ஓரளவு இந்தப் படம் புரியும். முதல் பாகத்தின் பல காட்சிகள் படத்தின் ஊடாலே நிறைய முறை வருகிறது. ஆனாலும் இப்படத்தை மட்டும் பார்க்கிறவர்களுக்குப் படம் கொஞ்சம் fizz போன சோடா மாதிரி தான் இருக்கும். (முதல் படத்தைப் பார்த்தவர்களுக்கும் இதே தான் என்பது வேற விஷயம்).

கமல் மிக அருமையாக நடித்திருக்கிறார். இது சர்க்கரை இனிக்கும் என்று சொல்வதற்கு ஒப்பானது. ஆனாலும் சொல்லியாக வேண்டும் அல்லவா? உணர்சிகளை காட்டுவதில் அவருக்கு நிகர் அவர் தான். பூஜா குமார், ஆண்ட்ரியா, ராகுல் போஸ், சேகர் கபூர் அனைவரின் பங்களிப்பும் நன்று. இதில் பூஜா குமாரும் ஆண்ட்ரியாவும் பேசும் வசனங்கள் ரொம்பப் பொறுமையை சோதிக்கின்றன. ஒவ்வொரு வசனத்துக்கு நடுவிலும் ஓர் இடைவெளி. இருவருக்கும் கமலுடன் காதல் காட்சிகள் இந்தப் படத்தில் போனஸ். முதல் படத்தில் அவை இல்லை. அம்மா செண்டிமென்டுக்காக வஹீதா ரஹ்மான் கமலின் அம்மாவாக அல்சைமர் நோயாளியாகத் தோன்றுகிறார்.

விஸ்வரூபம் முதல் பாகத்தின் கதைக் களம் அமெரிக்கா. இப்படத்தில் இங்கிலாந்து. கமல் RAW ஏஜன்ட், அதனால் ஜேம்ஸ் பான்ட் கதை மாதிரி எங்கு தீவிரவாதத் தாக்குதல் நடைபெறுப் போகிறது என்று தெரிந்தாலும் அங்கு சென்று அதனை முறியடித்து மக்களை காப்பாற்றுவது தான் இரண்டு படங்களின் அடிநாதமும். இதில் இங்கிலாந்தின் ஒரு துறைமுக நகரத்திலும் பின்பு தில்லியிலும் விசாமால் தீவிரவாதில்கள் திட்டமிட்ட குண்டு வெடிப்பு சதி தடுக்கப்படுகிறது. அதற்கான பல சாகச காட்சிகள் தாய்லாந்தில் படமாக்கப்பட்டுள்ளன. இப்படத்தில் வெடி குண்டை செயலிழக்க செய்ய கடல் நீருக்கடியில் சென்று செய்ய வேண்டிய காட்சிகளில் அதில் பங்கு பெற்ற கமல், பூஜா குமார், இதர நடிகர்கள் உண்மையிலேயே ஸ்குபா டைவிங் செய்து கடலுக்கடியில் சென்று அது படமாக்கப்பட்டுள்ளது. அதே போல கமலும் ஒரு தீவிரவாதியும் தண்ணீருக்கடியில் சண்டையிடும் ஸ்டன்ட் காட்சிகளும் அருமை. தொழில் நுட்ப திறனுக்கும் ஒளிப்பதிவுக்கும் பாராட்டுகள். ஜிப்ரான் இசையில் பாடல்களும் பின்னணி இசையும் நன்றாக வந்துள்ளன.

ஆனால் முதல் படத்தில் இருந்த திரைக் கதையின் தெளிவு இரண்டாம் படத்தில் இல்லை. முன்னும் பின்னும் கதை நகர்வதால் குழப்பமாக உள்ளது. மேலும் கதையே மெதுவாகத் தான் நகர்கிறது. இந்த மாதிரி த்ரில்லர் படங்களுக்கு வேகம் தான் முக்கியம். வசனங்களில் நகைச்சுவையோ  கூர்மையோ இல்லை. அதே போல முதல் படத்தில் இருந்த அல்குவைதா ஆப்கானிஸ்தான் காட்சிகள் இந்தப் படத்தில் காட்டப்படும்போது ஒட்டவில்லை. முதல் படத்தில் இருந்த டிரான்ஸ்பர்மேஷன் காட்சி போல இதிலும் ஒன்று படத்தின் இறுதியில் உள்ளது. ஆனால் ரொம்ப சப்பையாக உள்ளது. எம்ஜிஆர் கால கதை மாதிரி அம்மாவையும் மனைவியையும் வில்லன் பிடித்து வைத்திருப்பது தான் க்ளைமேக்ஸ் என்றால் என்ன சொல்வது?

மத நல்லிணக்கத்துக்கான வசனங்களும் வில்லனின் பிள்ளைகள் பற்றிய ஒரு நல்ல செய்தியும் மக்களுக்கான மெஸ்சேஜ்.

Vishwaroopam 2 will be on par with Hollywood films: Kamal Haasan

கஜினிகாந்த் – திரை விமர்சனம்

‘பலே பலே மகாதிவோய்’தெலுங்கு படத்தின் ரீமேக். எந்த காட்சியையும் மாத்தாமல் அப்படியே எடுத்திருப்பதாக தெரிகிறது. முழு நீள நகைச்சுவைப் படம். பெயரிலிருந்தே தெரிந்து கொள்ளலாம் ரஜினியின் அதி தீவிர ரசிகரா இருந்திருக்கணும் தாயோ தந்தையோ என்று (இதில் தந்தை) அதனால் ரஜினிகாந்த் என்று பெயர் ஆனால் தர்மத்தின் தலைவன் படத்தைப் பார்க்கும்போதே திரை அரங்கில் பிறந்ததால் அதிலுள்ள ஒரு ரஜினி மாதிரி மிகவும் ஞாபக மறதிப் பிரச்சினை ஹீரோவுக்கு. அதனால் காரணப் பெயர் கஜிநிகாந்த்.

சதீஷ் யார் கருணாகரன் யார் என்று எப்பவும் கன்பீஸ் ஆகும், இந்தப் படத்தில் இருவருமே ஆர்யாவின் நண்பர்களாக வருகிறார்கள். ஆர்யாவின் தந்தையாக ஆடுகளம் நரேன், தாயாக உமா பத்மநாபன். இதில் குறுக்கே மறுக்கே ஓடும் இன்னொரு பாத்திரம் மொட்டை ராஜேந்திரன், பாவத்த கல்யாண வயசுள்ள ஆர்யாவின் நண்பராக வருக்கிறார்!பெரிய கதையம்சமோ நடிப்பை வெளிக்காட்டும் ஆற்றலோ தேவையின்றி ஞாபக மறதியினால் (ஞாபக மறதி என்பதை விட Attention deficiency syndrome என்று சொல்லலாம்) விளையும் கஷ்டங்களை நகைச்சுவையாக காட்டும் படம் இது. நிறைய காட்சிகள் பல பழைய படங்களில் உருவின மாதிரி உள்ளது, உள்ளத்தை அள்ளித்தா படத்தில் கௌண்டமனியும் கார்த்திக்கும் மாப்பிள்ளையாக ஆள் மாறாட்டம் செய்வதை இந்தப் படத்தில் சதீஷும் ஆர்யாவும் நாயகி சாயிஷாவின் அப்பா சம்பத்திடம் செய்கிறார்கள். சின்ன வாத்தியார் படத்தில் பிரபு மறதி விஞ்ஞானியாக வருவார் அதே மாதிரி பாத்திரம் தான் ஆர்யாவுக்கும், வேளான் விஞ்ஞானி!

சாயிஷா சைகல் பாத்திரம் பத்தி எல்லாம் ரொம்ப மெனக்கெடலை இயக்குநர். முன்பெல்லாம் வரும் ஒரு மக்கு ஹீரோயின் பாத்திரம் சாயிஷாவுக்கு. ஜூங்கா படத்தில் இன்னும் அழகாகத் தெரிந்தார், சிறப்பாகவும் நடித்திருந்தார். அவரின் நடன அசைவுகள் இந்தப் படத்திலும் அருமை!

இசை பற்றியோ படத்தொகுப்போ பற்றியோ சொல்ல ஒன்றும் இல்லை. ஒளிப்பதிவு (பாலு) நன்றாக இருந்தது.

சில இடங்களில் வயிறு வலிக்க சிரிக்க முடிகிறது. மத்தபடி விசேஷமாக எதுவும் இல்லை. நகைச்சுவையாக நடிக்க ஆர்யாவும் எந்த சிரமும் எடுத்துக் கொள்ளவில்லை, முழுக்கவும் சிரிக்க வைக்க இயக்குனரும் கஷ்டப்பட்டுக் கொள்ளவில்லை. ஆர்யா படம் என்பதால் கடைசியில் சண்டைக் காட்சிகளையும் இடம் பெற செய்திருக்கிறார்கள். க்ளைமேக்ஸ் ட்விஸ்ட் எல்லாம் நம்பும்படியாக இல்லை. ஆனால் லாஜிக் பார்க்கும் படம் இல்லை இது. சும்மா டைம் பாஸ். ரொம்ப நாளாக அவரை காணாமல் இருந்த ஆர்யா ரசிகர்களுக்கு இது நல்ல படம். உடல் பிட்டாக இருக்கிறார்.

இயக்குநர் சந்தோஷ் P.ஜெயகுமாருக்கு குடும்பப் படம் எடுக்கத் தெரியும் என்பதை இப்படத்தின் மூலம் தெரிந்து கொள்ள முடிகிறது. ஆனாலும் ஒன்றிரெண்டு இடங்களில் இரட்டை அர்த்த வசனங்கள் உள்ளன. தெலுங்கில் மிகவும் நகைச்சுவையாக இருந்தது படம் என்று அந்தப் பட விமர்சனம் பார்த்துத் தெரிந்து கொண்டேன்.

 

 

கூடே – மலையாளப் படத் திரை விமர்சனம்

அது என்ன மாயமோ, பெரும்பாலான மலையாளப் படங்கள் மனசுடன் உறவாடும் படங்களாக அமைகின்றன! கூடே படத்துக்கு சப் டைட்டில் இருந்தாலும் அது தேவையே இல்லாத அளவு காட்சிகளே கதை சொல்கின்றன. அதிலும் படத் தொகுப்பு என்றால் என்ன என்பதை படத் தொகுப்பாளர்கள் இப்படத்தைப் பார்த்துக் கற்றுக் கொள்ளவேண்டும். கத்திரித்து ஒட்டியதே தெரியாத அளவுக்கு ஒரே இழையாக ஓடுகிறது படம். இத்தனைக்கும் ப்ளாஷ் பேக் நிறைந்த கதை! அஞ்சலி மேனன் பெங்களூர் டேஸ்க்குப் பிறகு அதை விட பிரமாதமாக ஒரு படத்தைத் தந்திருக்கிறார்.

பிரிதிவிராஜ், பார்வதி மற்றும் இதில் பங்கேற்ற அனைத்து நடிகர்களும் அருமையாக நடித்திருக்கிறார்கள். ப்ரித்விராஜ் இப்படத்தில் ஓவ்வொரு பிரேமிலும் இருக்கிறார், கதையை அவர் முகமே சொல்லிவிடுகிறது. அதிலும் பதின் பருவ ப்ரித்விராஜாக வருபவர் நடிப்பும் அற்புதம். அந்தப் பிள்ளை தனியாக உறவினருடன் செல்லும் காட்சியும் அவன் படப் போகும் (யாரும் கேட்க நாதியில்லாத நிலையில்) அதீத துன்பத்தை suggestiveஆக சொல்லியிருப்பது நேரடியாக காட்டியிருந்தால் உண்டாகும் தாக்கத்தை விட பகீரரென்று நமக்கு உரைத்து சோகத்தை அதிக அளவில் ஏற்படுத்துகிறது. இயக்குநருக்கு பாராட்டுகள். காக்கா தலையில் பனங்காயாக பெரும் பணச் சுமையை பதின்ம வயதில் இருந்தே தாங்கிய வெறுப்பு, யாருடைய உதவியும் இல்லாமல் பல துன்பங்களைக் கடந்து வந்த சோகம், சகோதரியின் மேல் அளவற்ற பாசம் அதுவே ஒரு நிலைக்குப் பின் ஒட்டுதலற்ற தன்மை, பெற்றோர்கள் மேல் எரிச்சல் கடுப்பு, தோழி/காதலியிடம் சிநேகமும் காதலும், கால் பந்தாட்ட பயிற்றுவிப்பாளரிடம் மரியாதையும் வாஞ்சையும் என்று பலதரப்பட்ட உணர்வுகளை காட்டி சிறப்பாக செய்திருக்கிறார் ப்ரித்விராஜ்.

நஸ்ரியாவிற்கு நாலு வருட இடைவேளைக்குப் பிறகு இது கம் பேக் படம். சும்மா லட்டு மாதிரி இருக்கிறார். சற்றே பூசினா மாதிரி உடல்வாகும் இப்பாத்திரத்திற்கு அழகாக உள்ளது. ப்ரித்விராஜ் பாத்திரத்துக்கு எதிரான குணாதிசயங்களுடன் வருகிறார். மருத்துவமனை-வீடு-பள்ளி/கல்லூரி -மருத்துவமனை என்று வாழ்க்கை அவருக்கு இருந்தாலும் எல்லாவற்றையும் மகிழ்ச்சியுடன் எதிர்கொள்ளும் ஒரு பக்குவத்தை யதார்த்தமாக பதிவு செய்திருக்கிறார். நிபந்தனையற்ற அன்பின் வெளிப்பாட்டை அழகாக காட்டியிருக்கிறார். அதிக வசனம் இவருக்கு தான் 🙂

கதைக் களம் நீலகிரி மழைத் தொடர் ஊட்டி அருகில். ஆனால் இவ்வளவு அழகான எரியும் இயற்கை வளங்களும் அமைதியான சூழலில் அமைந்திருக்கும் இடம் ஊட்டி அருகில் எங்கே இருக்கிறது என்று தெரியவில்லை. கேரளாவில் எடுத்ததோ என்று தோன்றுகிறது.  ஷார்ஜாவில் ஆரம்பித்து நீலகிரியில் பயணிக்கிறது கதை. அமானுஷ்ய சக்தி இருக்கிறதா என்கிற கேள்வியை விட ஒருவரின் நிறைவேறாத ஆசையின் தீவிரம் இறந்த பிறகும் அதை நிறைவேற்றிக் கொள்ள துடிக்கும் என்பதை நாம் ஒத்துக் கொள்ளும் வகையில் கதை அமைந்திருக்கிறது. சிரியன் கிறிஸ்டியன் குடும்பக் களம். ஆனாலும் மறுபிறவி நம்பிக்கையுடன் முடிகிறது கதை.

இது மராத்திப் படம் Happy Journeyயின் தழுவல். மராத்தியில் ரொம்ப dark. ஆனால் மலையாளத்தில் கூடே படம் உணர்ச்சிக் குவியிலின் collage. பின்னணி இசை ரகு திக்ஷித். மிகவும் நன்றாக உள்ளது. பாடல்களுக்கு இசை ஜெயச்சந்திரன், ரகு திக்ஷித். பரவாயில்லை ரகம். படத்தொகுப்பு லிட்டில் ஸ்வயம்ப், அற்புதம்! அவர் படத்தின் ஒரு தூண்.

அஞ்சலி மேனன் matriarchal societyயில் வளர்ந்ததால் கருத்துகளை சொல்வதில் இன்னும் அதிக சுதந்திரம் கிடைத்ததோ என்று தோன்றுகிறது.(கதையில் ஒரு பெண் பாத்திரம் விவாகரத்து செய்யக் கூட உரிமையில்லாமல் திண்டாடுவதும் அதே சமூகத்தில் தான் என்கிற அவலமும் உள்ளது). பாத்திரங்களுக்கு சரியான நடிகர் தேர்வு, சினிமா ஒரு விஷுவல் மீடியம் என்பதை மனத்தில் வைத்து இயக்கிய திறன், லிட்டில் மிஸ் சன்ஷைன் படத்தில் வரும் வண்டி போல வரும் ஒரு வண்டியும், அவர்கள் வீட்டு நாயும் மனிதப் பாத்திரங்களுக்கு இணையாக படத்தில் பங்கு பெற வைத்திருக்கும் நேர்த்தி, சிறுவர் பாலியல் வன்முறை, ஆணாதிக்க சமூகத்தில் பெண்கள் நிலை (பெண் பாலியல் வன்முறை கேள்வி கேட்கப்படாமல் அடக்கப்படும் மூர்க்கம்) ஆகிய முக்கிய சமூக அவலங்களை முகத்தில் அறைந்தார் போல சொல்லாமல் நெஞ்சில் பதியும்படி சொல்லியிருக்கும் நளினம் இவை அனைத்துக்கும் ஒரு பெரும் சபாஷைப் பெறுகிறார் இயக்குநர்!

வாழ்க்கையில் பணம் காசு இல்லாமல் வாழ முடியாது தான் ஆனால் அதில் உறவுகள் தரும் பலமும் பாசத்தின் பிணைப்பும் வாழ்வை இலகுவாக்குகிறது, மன தைரியத்தை அதிகப் படுத்துகிறது, படும் சிரமத்திற்கு அர்த்தமளிக்கிறது. இதெல்லாம் படத்தைப் பார்த்து எனக்குத் தோன்றியது. உங்களுக்கு வேறு ஏதாவது தோணலாம், பார்த்துத் தெரிந்து கொள்ளவும் 🙂