மகளிர் மட்டும் – திரை விமர்சனம்

இந்தப் படத்தைப் பார்க்க ஆரம்பித்தவுடன் எனக்கு தனிப்பட்ட முறையில் ஓர் ஈர்ப்பு ஏற்பட்டது. எந்த மணமான பெண்ணுக்கும் இந்தப் படத்தைப் பார்க்கும்போது இதில் எந்த ஒரு பகுதியாவது அவர்கள் வாழ்வில் அனுபவித்ததாக, சொல்ல நினைத்ததாக, செய்யத் துடித்ததாக இருக்கும் என்பது உறுதி. முற்றிலுமாக பெண்கள் கோணத்தில் எடுக்கப்பட்டுள்ள படம்.

1978ல் கல்லூரியில் படிக்கும்போது பாதியில் பிரிந்த மூன்று உயிர்த் தோழிகள் தங்கள் ஐம்பதுகளில் சந்திக்கும்போது ஏற்படும் நெகிழ்ச்சி, மகிழ்ச்சி, தவிப்பு என பல உணர்வுகளை அழகாக திரையில் கொண்டு வந்திருக்கிறார் இயக்குநர் பிரம்மா. குடும்ப பாரத்தில் உழலும் இவர்களை சந்திக்க வைப்பது காட்டாற்று வெள்ளம் போல் தங்கு தடையின்றி சுதந்திரமாக ஒரு ஆணைப் போல் தனக்குப் பிடித்தததை செய்யும் பாத்திரத்தில் வரும் ஜோதிகா. நாற்பது வருடங்கள் கழித்து சந்திக்கும் மூவராக ஊர்வசி, பானுப்ரியா, சரண்யா பொன்வண்ணன் கலக்குகிறார்கள். அருமையான தேர்வு. அதில் மற்றவர்களை ஊர்வசி தன் இயல்பான நடிப்பினால் சற்றே ஓவர்டேக் செய்துவிடுகிறார்.

இளம் வயது பாத்திரதிரங்களில் வரும் மூன்று பெண்களையும் அதே சாயலில் தேர்ந்தெடுத்திருப்பது கதையின் ஓட்டத்திற்கு பெரிதும் உதவுகிறது. ஒரு கண்டிப்பான கிருஸ்துவ பள்ளி, அதன் விடுதியில் தாங்கும் இம்மூவர் செய்யும் சேட்டைகள், கடைசியில் விளையாட்டு வினையாகி மூவரும் பிரிவது என கடந்த காலத்தில் நிகழ்ந்தவைகளை நிகழ் காலக் கதையோடு மாறி மாறி காட்டி சுவாரசியமாக எடுத்து செல்கிறார் இயக்குநர்.

குடியரசு ஆட்சியை மக்களால் மக்களுக்காக என்பார்கள். அது மாதிரி இந்தப் படம் பெண்களால் பெண்களுக்காக என்று இருந்தாலும் ஆண் மக்கள் இதைப் பார்த்தால் பெண்ணின் உணர்வுகள், அவர்கள் படும் சிரமம், செய்யும் தியாகம் அனைத்தும் கொஞ்சம் புரியலாம். இதில் ஒரு காட்சியில் பானுப்ரியாவின் மருமகளுக்கு இடுப்பு வலி எடுத்து மருத்துவமனைக்கு அழைத்துச் செல்லப்படும் போது அவரின் பின்புறம் இரத்தம் தோய்ந்திருக்கும். சாதாரணமாக அடி தடி சண்டையில் தான் நாம் படங்களில் இரத்தத்தைப் பார்க்கிறோம். அந்த வன்முறை இரத்தத்தை விட இந்த ஒரு காட்சி சொல்கிறது பொருள் ஆயிரம்.

எவ்வளவு தான் நல்ல குடும்பம் அமைந்தாலும் நட்புகளிடம் இருக்கும் நெருக்கும் உறவுகளில் கிடைப்பது அபூர்வமே. அதுவும் இளமையில் ஏற்படும் எந்த எதிர்பார்ப்பும் இல்லா நட்பு பெரும் வரமாகும். அதைத் திரையில் கொண்டு வந்திருக்கிறார் இயக்குநர். முக்கால்வாசி படம் ஆக்ரா, சட்டிஸ்கரில் நடக்கிறது. இயற்கை காட்சிகள் அழகு. ஜிப்ரானின் பாடல்களும் இசையும் அழகுக்கு அழகு சேர்க்கின்றன.

ஜோதிகா சொந்தக் குரலில் பேசியிருக்கிறார். அது ஒரு மைனசாக உள்ளது. முக உணர்சிகளை விட குரல் அதிகமாக ஓவர் ஏக்டிங் செய்கிறதோ எனத் தோன்றுகிறது. மாயாவியில் அந்தப் பாத்திரத்துக்கு அவர் சொந்தக் குரல் ரொம்ப சரியாக பொருந்தியது.  மற்றபடி அவரின் இந்தப் பாத்திரம் அவர் உண்மை வாழ்க்கையில் இருப்பதற்கு அருகில் இருக்கும் போலத் தோன்றுகிறது. சிரமிமில்லாமல் செய்திருக்கிறார். எடை குறைந்து மிகவும் பொலிவுடன் விளங்குகிறார்.

சரண்யாவின் கணவனாக வரும் லிவிங்க்ஸ்டன் சின்ன வேடத்தில் வந்தாலும் steals the show. குடிகாரக் கணவன், ஆனால் அவர் நடிப்பும், கடைசியில் அவர் தொலைபேசியில் ஜோதிகாவிடம் ஒரு முக்கியத் தகவல் சொல்லும்போது அவர் எடுக்கும் முடிவும் அவர் பாத்திரத்தை உயர்த்துகிறது, அவர் நடிப்பினாலும் அந்த இடம் அதிக வலுவைப் பெறுகிறது.  பானுப்ரியாவின் கணவராக நாசர். அவரும் வடக்கத்தி அரசியல்வாதியாக பக்காவாக உள்ளார்.

குறைகள் என்று பார்க்கும்போது எல்லா பெண்களும் சுதந்திரம் அற்றும், திருமணத்திற்குப் பிறகு சுய வாழ்க்கையைத் தொலைத்தது போலும் காட்டப் படுவது செயற்கையாக உள்ளது. மேலும் எல்லா ஆண்களும் {ஜோதிகாவின் ஜோடி தவிர} மோசமான கணவனாக இக்கதைக்காக சித்தரிக்கப்பட்டிருப்பதும் ஏற்றுக் கொள்ள முடியாததாக உள்ளது. பானுப்ரியாவின் மகன் சட்டென்று ஒரு சம்பவத்தால் மனம் மாறுவதும் சிநிமேடிக். நடுவில் ஒரு கீழ் சாதி, மேல் சாதி கலப்புத் திருமணம் வருகிறது. அதை சேர்த்ததால் ஜோதிகா பாத்திரம் துணிச்சலான பெண் என்பதைத் தவிர வேறு எந்த மேச்செஜும் தரவில்லை.

படம் நடிகர் சூரியாவின் தயாரிப்பு. மனைவிக்காக அவர் செய்திருக்கும் இத்தயாரிப்புப் பாராட்டுக்குரியது :-}

Advertisements

துப்பறிவாளன் – திரை விமர்சனம்

விஷால், பிரசன்னா, ஆண்ட்ரியா, பாக்கியராஜ், சிம்ரன் என பல பெரிய பெயர்களுடன் வெளி வந்துள்ளது மிஸ்கினின் புதிய படைப்பு துப்பறிவாளன். ஷெர்லக் ஹோமேஸ் கதைகளின் தழுவல் என்று முதலிலேயே டைட்டிலில் வந்துவிடுகிறது. அதனால் விஷால் தான் ஷெர்லக் ஹோம்ஸ், பிரசன்னா தான் வாட்சன் என்று நாம் தொடக்கத்திலேயே முடிவு பண்ணிக் கொண்டுவிடலாம்.  அதே மாதிரி ஒரு மர்மத்தை/கொலையைத் துப்புத் துலக்கப் போய் பெரிய மர்மத்தை வெளிக் கொண்டுவருவது தான் படத்தின் கதையும்.

விஷால் ரொம்ப ஃபிட்டாக இருக்கிறார். சுறுசுறுப்பு, விறுவிறுப்பு எல்லாம் சமவிகிதத்தில் அவர் உடல் மொழியில் உள்ளது. துப்பறிவாளராக செமையாகப் பாத்திரத்தில் பொருந்துகிறார். சண்டைக் காட்சிகளில் புகுந்து விளையாடுகிறார். ஆனால் கேசை கொண்டுவருபவரை பார்த்த மாத்திரத்தில் அது என்ன கேஸ், கொண்டுவருபவர் எப்படிப்பட்டவர் என்று சொல்லும்போது அவர் யூகிப்பதற்கான காரணங்களும் நமக்குத் தெரிய வேண்டும் அல்லவா? ஒரு சம்பவம் தவிர்த்து அது விளக்கப்படவில்லை. அவர் அதி புத்திசாலி என்பது எதனால் அவர் யூகிக்கிறார் என்பதை வைத்து தானே நாம் புரிந்து கொள்ள முடியும்? மிஸ்கின் அதற்கெல்லாம் மெனக்கெடவில்லை.

பிரசன்னா விஷாலுக்குத் துணை பாத்திரம். ரொம்ப அனாயாசமாக செய்திருக்கிறார். அவரும் உடம்பை நன்றாக வைத்திருக்கிறார். நடிப்பில் விஷாலுக்கு சீனியர் என்பது எளிதாக தெரிகிறது. ஆனால் ஒப்புக்குச் சப்பாணி பாத்திரத்தில் வருவது கொஞ்சம் வருத்தமாக உள்ளது. நல்ல நடிகர் அவர். வேறு நல்ல வாய்ப்புகள் வர வாழ்த்துவோம்.

பாகியராஜூக்கு ஒரு வில்லன் பாத்திரம். நன்றாக செய்திருக்கிறார்.  அனு இம்மானுவேல் விஷாலின் காதல் இன்ட்ரஸ்ட். சின்ன பாத்திரம். குற்றம் சொல்ல ஒன்றுமில்லை. ஆண்ட்ரியாவிற்கு ஈவிரக்கமில்லாத ஒரு வில்லி பாத்திரம். அவருக்கு அது அல்வா சாப்பிடுவது போல. வெளுத்து வாங்குகிறார். வில்லன் வினய் சுமார். அதற்குக் காரணம் திரைக் கதையாகவும் இருக்கலாம். சிம்ரன் குட்டி பாத்திரத்தில் வருகிறார். கொஞ்சம் ஓவர் ஏக்டிங் செய்கிறார். அதுவும் இயக்குநர் தவறே.

படத்தின் ஆரம்பம் நன்றாக உள்ளது. கலை அருமை. விஷாலின் வீடு வெகு நேர்த்தியாக ஷெர்லக் ஹோம்ஸ் போன்ற ஒரு துப்பறிவாளருடைய வீடு போல் அமைக்கப்பட்டிருப்பது அழகு. ஒரு சிறுவன் வந்து தன் சேமிப்பைக் கொடுத்து தன் நாயைக் கொன்றவனைத் தேடிக் கொடுக்குமாறு புது கேசை கொடுப்பதும் நல்ல திரைக்கதையின் தொடக்கம். ஆனால் அதன் பின் படம் ஒரு கொலையுதிர்காலமாக உள்ளது. மர்மக் கதையில் கொலைகள் இருக்கும் தான்.  ஆனால் இரண்டு சீனுக்கு ஒரு கொலை விகிதம் கொஞ்சம் அதிகம்.

இசை அரோல் கொரியோலி. பின்னணி இசை கதைக்குத் தகுந்தவாறு உள்ளது. பாடல்கள் இல்லை, சபாஷ். ஒளிப்பதிவும் எடிட்டிங்கும் நன்று. படம் இருட்டாக இல்லை, பெரிய பிளஸ் பாயின்ட்.  ஆனால் படத்தை ஒரு இருபது நிமிடமாவது குறைத்து இருந்தால் இன்னும் சுவாரசியமாக இருந்திருக்கும். இப்பொழுது படத்தின் நீளம் இரண்டு மணி முப்பது நிமிடங்கள்.

சீரியசான இடங்களில் அரங்கில் சிரிப்பொலி. உண்மையில் படத்தைப் பார்த்து விட்டு வெளியே வரும்போது மனம் காமெடி படம் பார்த்த உணர்வைத் தருகிறது. ஏனென்றால் ஒருவர் குத்துப் பட்டு செத்துக் கொண்டிருக்கும்போது காப்பாற்ற வேண்டியவர் முதலுதவியோ அல்லது ஆம்புலன்சையோ கூப்பிடாமல் நீண்ட வசனம் பேசுவதெல்லாம்…… யாராவது துணை இயக்குநர்களாவது மிச்கின்னிடம் எடுத்துரைத்து இருக்கலாம்.

ஒரு பழைய படத்தில் வில்லனிடம் மாட்டிக் கொண்ட சோ வண்ணான் கணக்கு சொல்வது போல மனோரமாவுக்கு வில்லனின் போன் நம்பரை சொல்லுவார். அந்த அளவில் இருக்கிறது கிளைமேக்சில் விஷால் சங்கேத மொழியில் பிரசன்னாவிற்குத் துப்புக் கொடுப்பது. வில்லன் தன் கூட இருந்தவர்களையே நொடியில் போட்டுத் தள்ளுகிறான், தன் எதிரியும், தான் மறைமுகமாக செய்து வந்த தில்லுமுல்லு சாம்ராஜ்ஜியத்தையே வெளிக் கொண்டுவந்த விரோதியுமான விஷாலை கொல்லாமல் அவ்வளவு நேரம் பேச விடுவது எல்லாம், ரொம்ப டூ மச்.

விஷால் பிரசன்னாவிற்காக படத்தைப் பார்க்கலாம்.

புரியாத புதிர் – திரை விமர்சனம்

ரஞ்சித் ஜெயகொடியின் முதல் படம், நீண்ட தாமதத்திற்குப் பிறகு வெளி வந்துள்ளது. லேட்டா வந்தாலும் லேட்டஸ்டா வந்திருப்பதால் பாராட்டுக்குரியதாகிறது. எழுதி இயக்கியிருக்கும் ரஞ்சித் ஒரு தேர்ந்த திரையுலக படைப்பாளியாக முதல் படத்திலேயே பெயர் வாங்குகிறார்.

விஜய் சேதுபதியின் நடிப்பு மிக மிக அருமை. அட்டகாசமாக செய்திருக்கிறார். தன் காதலிக்கு நேரும் துன்பத்தைக் கண்டு பத்தட்டப் படுவதும்,  அதிர்ச்சிக்கு உள்ளாகும்போதும் அனாயசமாக பாத்திரத் தன்மையை உள்வாங்கி வெளிக் கொண்டு வருகிறார். மேலும் மூன்று வருடங்களுக்கு முன் படப்பிடிப்பு நடந்திருப்பதால் குறைந்த எடையுடன் இருக்கும் விஜய் சேதுபதியைக் கண்டு களிக்க முடிகிறது.  பொதுவில் கதாநாயகிகளுக்குக் கிடைக்காத கனமான பாத்திரம் ‘நடுவில் கொஞ்சம் பக்கத்தைக் காணோம்’ காயத்திரிக்கு இந்தப் படத்தில் கிடைத்திருக்கிறது. நடிக்கிறார் என்பதே தெரியாத அளவு பாத்திரத்தில் ஒன்றி சிறப்பாக பங்களித்துள்ளார். இவர்கள் இருவரின் நடிப்பும் இப்படத்தைத் தூக்கி நிறுத்துகிறது.

லென்ஸ் சொல்ல வந்தக் கருத்தை இப்படமும் முன்னிறுத்துகிறது. ஆனால் சொல்ல வந்தப் பிரச்சினை ஒன்றாக இருப்பினும் முற்றிலும் வேறு கோணத்தில் திரைக்கதை அமைக்கப்பட்டுள்ளது. க்ளைமேக்ஸ் நெருங்கும் வரை யூகிக்க முடியாத கதையம்சத்துடன் விறுவிறுப்பாக படத்தை நகர்த்தியிருகிறார் இயக்குநர். படத்தின் ஒன் லைன் – நமக்கு ஏற்படும் வரை இழப்பின் வலி நமக்குத் தெரியாது என்பது தான். அதுவும் இன்றைய கால கட்டத்தில் பலான காணொளிகளை இணையம் மூலம் பலருக்கும் பகிர்வதை சகஜமாக நினைக்கும் இளைஞர்களுக்கு இப்படம் ஒரு நல்ல பாடமாக அமையும் என்று நம்புகிறேன். குற்ற உணர்வு வருமா, மக்கள் திருந்துவார்களா என்று தெரியாது ஆனால் மனத்தில் உரைக்கும் வண்ணம் கதை அமைந்துள்ளது.

ஒரு சஸ்பென்ஸ் த்ரில்லருக்குத் தேவையான பின்னணி இசையைத் தந்திருக்கிறார் சாம் C.S. பல இடங்களில் பின்னணி இசையே திரைக்கதையாகிறது. பாடல்களும் நன்றாக உள்ளன. இசையைப் பொறுத்த வரையில் சபாஷ் சாம்! ஒளிப்பதிவும், முக்கியமாக லைட்டிங்கும் திகிலை ஏற்படுத்தும் வண்ணம் கையாளப்பட்டுள்ளது. ஒளிப்பதிவாளர் தினேஷ் கிருஷ்ணனுக்கு ஒரு பூங்கொத்து!

படக்காட்சி இரண்டு மணி நேரம் தான். இடைவேளை வரை இருக்கும் சுவாரசியம் கொஞ்சமும் குறையாமல் இரண்டாவது பாதியும் நன்றாக அமைந்துள்ளது. அருவருப்போ, ஆபாசமோ இல்லாமல் கதை சொல்லத் தெரிந்திருக்கிறது இயக்குநருக்கு. அச்சு பிச்சு காமெடி இல்லை. காதலில் சொதப்புவது எப்படி அர்ஜுனனுக்கு பெரிய பாத்திரம், சிறப்பாக செய்திருக்கிறார். இந்தப் படத்திற்குப் பிறகு அவருக்கும் காயத்திரிக்கும் அதிக வாய்ப்புகள் வர வாழ்த்துகள்.

குறையில்லாமல் இருக்குமா? ரமேஷ் திலக் வரும் பகுதியில் சில விஷயங்கள் விளக்கப்படாமல் உள்ளது. அது தனிப்பட்ட ஒரு சம்பவம் எனில் நாயகியை வாயை கட்டி கையை கட்டி அவர் என்ன செய்வதாக இருந்தார்? அது ரசிகரை குழப்புவதற்காக போடப்பட்ட முடிச்சா என்று புரியாத புதிராக உள்ளது. அந்த உதிரி பகுதியையும் சரியாக விளக்கியிருக்கலாம் இயக்குநர்.

மற்ற இணை பத்திரங்களில் வந்த அனைவருமே நன்றாக செய்திருக்கிறார்கள்.  சோனியா தீப்தி சின்ன பாத்திரத்தில் வந்தாலும் மனத்தில் நிற்கிறார். நிறைவைத் தருகிற குறைந்த செலவில் எடுக்கப்பட்டிருக்கும் படம் இது. புரியாத புதிர் டீமுக்கு வாழ்த்துகள்.

விவேகம் – திரை விமர்சனம்

 

ஆங்கிலப் படங்களில் வரும் ஜேம்ஸ் பான்ட், ஜேசன் போர்ன் போல் ஒற்றை ஆள் ராணுவமாக ஒரு உளவுத் துறையைச் சேர்ந்த/ தீவிரவாதிகளின் சதியை முறியடிக்கும் அஜய் குமார் என்னும் கதாபாத்திரமாக அஜித் அதகளம் செய்திருக்கும் படம் விவேகம். இந்த மாதிரி படங்களில் கதாநாயகர்கள் புரியும் சாகசங்களும், அவர்கள் பயன்படுத்தும் தொழிநுட்பக் கருவிகளும் உண்மைத் தன்மைக்கு அதிகப்படியாகத் தான் இருக்கும்.  படம் பார்க்கப் போகிறவர்கள் அவைகளை எதிர்பார்த்தே போகவேண்டும்.

படம் ஆரம்பம் முதல் முடிவு வரை அஜித்தின் தோள்களிலேயே பயணிக்கிறது. அஜித் நல்லவராக வல்லவராக காட்சிப் படுத்தப் படுகிறார். அது அவருக்கு சரியாகப் பொருந்துகிறது. நல்ல கணவராக, தீவிரவாதிகளின் சதியை முறியடிக்கும் சாகசக்காரராக வலம் வருகிறார். இடைவேளை சமீபத்தில் படம் சூடு பிடிக்கிறது. விவேக் ஓபிராய் நல்லவரா கெட்டவரா என்று படம் பார்த்துத் தெரிந்து கொள்ளுங்கள். அஜித்துக்கு ஈடாக சக பத்திரத்தில் வந்து நன்றாக செய்துள்ளார். இந்தப் படத்தில் அஜித் அடித்துத் துவம்சம் செய்யும் பெரும்பாலானவர்களும் ஐரோப்பா நாடுகளை சேர்ந்தவர்கள். ஆள்கள் எல்லாம் படு முரடாக அகலுமும் உயருமாமாக இருக்கிறார்கள். அவர்களை எல்லாம் பந்தாடுகிறார் அஜித். அக்ஷரா ஒரு சிறிய பாத்திரத்தில் வருகிறார். ஆனால் வெகு அழகாகப் பொருந்துகிறார். முகத்தை மறைக்கும் பனிக் குல்லாவுடன் வருவதினால் முகத்தில் உணர்ச்சிகள் காட்டவேண்டிய வேலையில் இருந்து எளிதாக தப்பித்து விடுகிறார். முகத்தைக் காட்டும் சில இடங்களிலும் பெரிய பச்சைக் கண்களும் குழந்தை முகமும் பாஸ் செய்ய வைத்து விடுகிறது. உதாரண மனைவியாக காஜல் ஜொலிக்கிறார். அவருக்கு நடிக்க வாய்ப்புள்ளது, பயன் படுத்திக் கொண்டிருக்கிறார். ஐஸ்வர்யா ராய்க்கு குரல் கொடுப்பவரே இவருக்கும் கொடுத்திருப்பதால் பல சமயங்களில் ஐஸ்வர்யா ராய் முகம் தான் மனத்தில் தோன்றுகிறது.

மிகவும் கடுப்படிப்பவர்கள் லொள்ளு சபா சுவாமிநாதனும், கருணாகரனும். காமெடி என்னும் பெயரில் ரொம்ப இம்சை படுத்துகிறார்கள். அனிருத் இசையில் பாடல்கள் நன்றாக உள்ளன. பின்னணி இசை கதையின் வேகத்துக்கு ஈடு கொடுக்கிறது. செர்பியா நாட்டின் நகரப்பகுதிகளையும், அழகிய பனி படர்ந்த காடுகளையும் ஒளிப்பதிவாளர் வெற்றி நூறு ரூபாய் டிக்கெட் கட்டணத்தில் நமக்குக் காண கொடுத்துவிடுகிறார். ஆனால் எடிடிங் கண்ணை வலிக்க வைத்து விடுகிறது, காட்சிகள் வேகமாக நகர நகர சில சமயம் கண்ணை மூடிக் கொண்டு சுதாரித்துக் கொள்ள வேண்டியிருக்கு. தேர்ந்த எடிடர் ரூபன் தான் எடிட் செய்துள்ளார். தவறு இயக்குனருடையதா இல்லை ஒளிப்பதிவாருடையதா இல்லை எடிட்டருடையதா என்று தெரியவில்லை.

இந்த மாதிரி படங்களில் பெரிதாக கதையை எதிர்பார்க்க முடியாது. ஆனால் திரைக் கதை நன்றாக இருக்க வேண்டும். அதில் இயக்குநர் சிவா இன்னும் கவனம் செலுத்தியிருக்க வேண்டும். எல்லாருடைய உழைப்பும் விழலுக்கு இறைத்த நீராக இருக்கக் கூடாது, ரசிகர்களின் எதிர்பார்ப்பையும் நிறைவு செய்ய வேண்டியது இயக்குநரின் கடமை. எதற்காக அக்ஷராவை தேடுகிறார்கள் என்று புரியவே இல்லை. சரி ஏதோ தேடுகிறார்கள் பார்ப்போம் என்று பார்க்க வேண்டியுள்ளது. ஒரு பெரிய fan base இருக்கும் நடிகரை வைத்துப் படம் இயக்கம் போது பொறுப்பு அதிகமாகிறது. அதை உணரும் இயக்குநர்களே வெற்றி பெறுகிறார்கள். வசனம் இன்னும் சிறப்பாக இருந்திருக்கலாம். அஜித் எல்லா வசனகளையும் மிகவும் நிறுத்தி நிதானமாகப் பேசுகிறார். அதையெல்லாம் சரி படுத்தி சில இடங்களில் மட்டும் அவ்வாறு பேச வைத்து மற்ற இடங்களில் மாடுலேஷனை மாற்ற சொல்லியிருக்க வேண்டும் இயக்குநர்.

அடுத்தப் படம் இந்தக் குறைகள் எல்லாம் இல்லாமல் நிறைவாக வர வாழ்த்துகள்.

 

விக்ரம் வேதா – திரை விமர்சனம்

 

புஷ்கர்-காயத்ரி இருவரும் இணைந்து இயக்கி இருக்கும் இருவர் பற்றிய படம் விக்ரம்-வேதா! அம்புலிமாமாவின் விக்ரமாதித்தன் வேதாளம் கதையின் நீட்சியாக திருடன் போலிஸ் கதை இது.  வேதாளம் கேட்ட கேள்விக்குப் பதில் சொல்லாவிட்டால் விக்கிரமாதித்தனின் தலை சுக்கு நூறாக உடைந்து விடும் அதனால் இக்கதையிலும் கேங்க்ஸ்டர் வேதாவின் கேள்விகளுக்குப் பதில் தேடி முடிச்சை அவிழ்க்கிறார் என்கவுண்டர் ஸ்பெஷலிஸ்ட் விக்ரம். அருமையான திரைக்கதை மற்ற போலிஸ் கேங்க்ஸ்டர் கதைகளிலிருந்து இதனை மாறுபடுத்திக் காட்டுகிறது. முதல் பாதி முடிவுக்கு சற்று முன்பேயிருந்து சதுரங்க விளையாட்டைப் போல போலிஸ் மாதவனும் தாதா விஜய் சேதுபதியும் ஒருவரை ஒருவர் எதிராளியை அசர அடிக்கும் காய் நகர்த்தல்கள் மூலம் வெற்றிக் கொள்ள பார்க்கின்றனர். கடைசியில் இருவருமே செக்மேட் என்கிறார்களா இல்லை ஒருவர் வெற்றி பெறுகிறாரா என்பாதை வெள்ளித் திரையில் பார்க்கவேண்டும்.

மிகவும் அனுபவுமள்ள நடிகர் மாதவன். அவருக்கு ஈடு கொடுத்து மட்டுமல்லாமல் அசால்டாக {சென்னை தமிழ்} அவரை நடிப்பில் மிஞ்சப் பார்க்கிறார் விஜய் சேதுபதி. இப்படத்தின் வெற்றிக்குப் பெரும் பங்கு இவர்கள் இருவரின் நடிப்பு தான் என்றால் மிகையாகாது. மாதவன் ஒரு நல்ல போலிசாக வருகிறார். அவருக்கு எந்தக் கிரிமினலும் குற்றவாளி தான். ஆனால் குற்றவாளிகள் வேறு வடிவத்திலும் இருப்பார்கள் என்று அறியும்போது அவர் வெள்ளை கருப்பு என்று பகுதிபடுத்தி இருந்த பிம்பம் உடைகிறது. கெட்டவனான விஜய் சேதுபதியிடம் அவர் கதை கேட்பதும் அதன் மூலம் விடை தேடப் போவதும் நல்ல யுக்தி.

மாதவன் மனைவியாக வக்கீலாக வரும் ஷ்ரத்தா பாத்திரத்துக்கு கன பொருத்தம். குற்றவாளி வேதாவுக்கு அவரே வக்கீலாக வருவதும் அதனால் கணவன் மனைவிக்குள் ஏற்படும் சண்டைகளும் அழகு. டைட்டிலில் வரலட்சுமி பெயர் வருகிறதே எங்கே காணோம் என்று இடைவேளையின் போது யோசித்ததற்கு இடைவேளைக்குப் பின் சந்திரா என்னும் பாத்திரத்தில் வந்து நடிப்பில் அசத்துகிறார் வரு சரத்குமார். தாதா கதை என்பதால் வரும் பெரும்பாலான  அடியாள் பாத்திரங்கள் ஜடா முடியுடன் அழுக்கு உடைகளுடன் வலம் வருகின்றனர். விஜய் சேதுபதியின் தம்பி பாத்திரத்தில் வரும் கதிர், இன்னொரு ரவுடி பாத்திரத்தில் சேட்டா என்று வரும் ஹரீஷ், போலிஸ் சக அதிகாரி சைமனாக வரும் பிரேம் நடிப்பினால் மனத்தில் நிற்கின்றனர். எல்லா பாத்திரங்களின் தன்மையையும் முதலில் இருந்து கடைசி வரை மாறாமல் வைத்திருப்பது இயக்குநர்களின் வெற்றி.

ஒவ்வொரு முறையும் மாதவன் கையில் அகப்பட்டு பின் தப்பிக்கும் விஜய் சேதுபதி, அதற்கான காரணம், கடைசியில் க்ளைமேக்ஸ் அனைத்தும் விறுவிறுப்பாக, சுவாரசியமாக அமைக்கப்பட்டிருக்கு. ஆனால் க்ளைமேக்ஸ் நெருங்கும் சமயத்தில் நமக்கே பல விஷயங்கள் யூகிக்க முடிகிறது. அந்த வகையில் பெரிய சஸ்பென்ஸ் உள்ளதா என்று தெரியவில்லை. ஆனால் திரைக்கதையில் எங்கும் தொய்வில்லை.

இசை சாம். ஒரு பாடல் நன்றாக உள்ளது. பின்னணி இசை காட்சி நிகழும்போதே, அதற்கு சற்று முன்பேயே அதன் தன்மையை நமக்கு உணர்த்திவிடுகிறது.  எடிடிங் & ஒளிப்பதிவு பக்கா! நல்ல ஒரு த்ரில்லர் படம். கதையைப் பொறுத்த வரையில் ஆங்கிலப் படங்களின் சாயல் உள்ளது. ஆனால் தமிழில் வந்திருக்கும் நல்லதொரு படைப்பு. டீம் விக்ரம் வேதாவுக்குப் பாராட

Post Formats Standard
 Aside

லென்ஸ் – திரை விமர்சனம்

செய்வதைத் தவறாகவே நினைக்காமல் இயல்பாக நாம் அனைவரும் செய்யும் ஒரு குற்றத்தை இனி செய்யத் தயங்கும் வகையில் முகத்தில் அடித்தாற்போல் ஒரு அறிமுக இயக்குநர் படம் எடுத்திருப்பது மிகவும் பாராட்டுக்குரியது. படம் பார்க்க ஆரம்பிக்கும்போது சற்றே நெளிய வைக்கிறது படம் ஏனெனில் கதையின் கருவே இணையத்தில் காணக் கிடைக்கும் தனிப்பட்டவர்கள் அந்தரங்க செக்ஸ் காணொளிகள் பற்றியது.  இயக்குநர் தமிழிலும் மலையாளத்திலும் எடுத்துள்ளார். இம்மாதிரி நல்ல படங்களுக்கு நம் ஆதரவை பெருமளவில் தர வேண்டும். ஜெயபிரகாஷ் ராதாகிருஷ்ணன் எழுதி இயக்கி, நடித்து, தயாரித்துள்ளார். நிறைய அவார்ட்கள் கிடைக்க வாழ்த்துகள்.

இது ஒரு டாகுமெண்டரியாகவும் மாறியிருக்கலாம் அல்லது காமப் படமாகவும் மாறியிருக்கலாம். இரண்டும் இல்லாமல் ஒரு த்ரில்லர் வகையில் படம் தொடக்கம் முதல் இறுதி வரை  திரைக்கதையை அருமையாக நகர்த்தியிருக்கும் விதம் இக்கதையை உருவாக்குவதில் ஜெயபிரகாஷ் ராதாகிருஷ்ணன் எடுத்துக் கொண்ட உழைப்பைக் காட்டுகிறது. இதுவரை தமிழ் திரையுலகில் சொல்லப்படாதப் புதிய கதை. ஏனென்றால் இணைய உலகமும் இருபதாம் நூற்றாண்டின் இறுதியில் இருந்து தான் அதிக தாக்கத்தை ஏற்படுத்தி வருகிறது. அதனால் அவை சம்பந்தப்பட்ட குற்றங்களும் புதிது. அதனால் கதைக் களமும் புதிது.

இதில் செக்ஸ் காணொளி பகிரப்பட்டதால் பாதிக்கப்பட்டப் பெண் பேச இயலாதவராக வருகிறார். அது இம்மாதிரி பாதிக்கப்பட்டப் பெண்களின் நிலையைக் குறியீடாக இயக்குனர் காட்டியுள்ளார் என்று தோன்றுகிறது. தன் மேல் தவறு சிறிதும் இல்லாத நிலையில் அப்பெண்ணின் அந்தரங்க காணொளி எல்லார் பார்வைக்கும் வந்துவிடும்போது அப்பெண்ணின் நிலை வாயில்லாப் பூச்சியின் நிலை தான். அப்பதிவை நீக்கவே முடியாத நிலையில் அப்பெண் படும் வேதனை எழுத்தில் வடிக்க முடியாதது. அதனால் பாதிக்கப்பட்ட கணவன் எவ்வாறு மாறுகிறான், என்ன செய்கிறான், இக்குற்றத்தை செய்தவர்கள் பிடிபடுகிறார்களா, தண்டிக்கப்படுகிறார்களா என்பதே கதை. இது ஒரு கனமான மனத்தை இறுக்கும் உண்மை நிலையை பிரதிபலிக்கும் கதை. இதை பார்க்க தயாரான மன நிலையில் செல்ல வேண்டும்.

ஆனந்த்சாமி இதில் முக்கிய வேடத்தில் வருகிறார். அந்தப் பாத்திரமாகவே வாழ்ந்திருக்கார். அவர் தான் பாதிக்கப்பட்டப் பெண்ணின் கணவர். அவரின் உணர்வுகள் ஒரு கோடியில் இருந்து மறு கோடிக்கு ஊசலாடுவதை நன்றாக காட்டியுள்ளார்.  செக்ஸ் விடியோக்களைப் பார்க்கும் ஒருவராக, எதையும் நியாயப் படுத்துபவராக ஜெயபிரகாஷ் வருகிறார். இவருக்கு மனைவியும் மகளும் இருக்கின்றனர். படத்தின் பெரும் பாதி இருவருக்கும் நடக்கும் ஸ்கைப் உரையாடல்களே எனினும் தொய்வில்லாமல் நகர்கிறது படம். யார் நல்லவர் யார் கெட்டவர் என்று கருப்பு வெள்ளை கதாப்பாத்திரங்களாக இல்லாமல் கிரே நிறத்திலும் முக்கியமான பாத்திரங்களைக் காட்டியிருப்பது இயக்குநரின் இன்னொரு வெற்றி. மற்ற பாத்திரங்களில் வருபவர்களும் போலிசாக, நண்பனாக, மனைவியாக நன்றாக செய்திருக்கிறார்கள்.

பல பலான விடியோக்களை நாம் பார்த்து அனைவருக்கும் பகிர்வது தவறாகவே தோன்றாமல் செய்யப்படும் செயலாக உள்ளது. ஆனால் அதில் பாதிக்கப்படுபவர்கள் நிலையை நல்ல திரைக் கதை, வசனம், க்ரிஸ்ப் எடிடிங், ஜிவி பிரகாஷின் இசை மூலம் அருமையாக வெளிக் கொண்டு வந்திருக்கிறார் இயக்குநர்.  அனுமதியுடன் எடுக்கப்படும் உடலுறவு காணொளிகளுக்கும் அனுமதியில்லாமல் திருட்டுத்தனமாக எடுக்கப்படும் அந்தரங்கக்  காணொளிகளுக்கும், அதைப் பதிவேற்றி பகிரும் தன்மையில் மிகப் பெரிய வேறுபாடு உள்ளது. பின்னது கடைந்தெடுத்த அயோக்கியத்தனம். சுசி லீக்ஸ் போன்றவை இவ்வகைப் படும். அந்த வித்தியாசத்தை இப்படம் உரித்தெடுத்து காட்டுகிறது.

லென்ஸ் இன்றைய இணைய addicts அனைவரும் பார்க்க வேண்டிய ஒரு படம். இதில் காட்டப்படும் சகலமும் உண்மை.  படம் பார்த்து முடிந்த பிறகும் கதை நம்மை கலங்கடிக்கிறது. இணையத்தில் இருக்கும் பதின் பருவத்தினரும் அவர்களின் பெற்றோரும் கண்டிப்பாக பார்க்க வேண்டிய படமிது.

பாகுபலி 2 – திரை விமர்சனம்

பாகுபலி முதல் பாகத்தை விட பாகுபலி இரண்டாம் பாகம் நன்றாக உள்ளது. கதை சொல்வதில் அதிக நேர்த்தித் தெரிகிறது. ராஜ மௌலிக்கு முதல் பாகம் தந்த அனுபவம் எனக் கொள்ளலாம். தர்மத்துக்கும் அதர்மத்துக்கும் இடையே நடக்கும் போட்டி தான் இந்தப் படத்தின் மையக் கரு. அமரேந்திர பாகுபலியின் கொலையின் போது தர்மத்தைச் சூது கவ்வியது. அவரின் மகன் மகேந்திர பாகுபலி வில்லனை வீழ்த்தி இறுதியில் தர்மத்தை வெல்ல வைக்கிறார். ஜெய் மகிழ்மதி!

அந்தக் காலத்து மாயா பஜாரை இப்பொழுது எடுத்தால் எப்படி இருக்கும் என்பதை இரண்டாம் பகுதி பாகுபலியின் முதல் பாதி தோற்றுவிக்கிறது. குந்தள தேசம், அழகு தேவதை அனுஷ்கா {அது என்ன CG வித்தையான்னு தெரியவில்லை பல இடங்களில் அவர் அனுஷ்கா சாயலிலேயே இல்லை} அவரின் முறை மாமன் கேரக்டர், அமரேந்திர பாகுபலியாக பிரபாஸ், அவரின் துணைப் பாத்திரமாக கட்டப்பா {சத்தியராஜ்}, அந்தக் கால காமெடி நெடியுடனும் கதை அம்சத்துடனும் அம்புலிமாமா சித்திரக் கதை + fairy tale கலவையாக இடைவெளி வரை சிரமமில்லாமல் கதை நகருகிறது. முதலில் கண்ணை உறுத்தும் CG போகப் போக அழகான காட்சிகளாக விரிகிறது. பிரம்மாண்டமான படைப்பு. பல குழுக்களின் ஒத்துழைப்புடனும் கடும் உழைப்புடனும் அழகிய படைப்பாக வெளிவந்துள்ளது.

அனுஷ்கா பிரபாஸ் காதல் காட்சிகள், ஆடல் பாடல் எல்லாமே விரசமில்லாமல் அழகாகப் படமாக்கப்பட்டிருக்கிறது. ஆடை அலங்காரம் வெகு அழகு! வீர மங்கையாக முதலில் இருந்தே அனுஷ்காவை சித்தரித்து இருப்பது அவர் பாத்திரத்துக்கும் கதையின் ஓட்டத்துக்கும் வலு சேர்க்கிறது. அனுஷ்கா, ரம்யா கிருஷ்ணன் இரு பெண் பாத்திரங்களும் பலமானவர்களாகவும், மிகவும் சக்தி வாய்ந்த பாகுபலி, கட்டப்பா, பல்வாள் தேவன் பாத்திரங்களுக்கு இணையாகவும் படைத்திருப்பது இந்தப் படத்தில் போற்றப் பட வேண்டிய விஷயம்.

வல்லவனுக்குப் புல்லும் ஆயுதம். பாகுபலிக்கு பனையும் ஏவுகணை! போர் வியுகங்களை முதல் பாகத்தை விட இரண்டாம் பாகத்தில் சிந்தித்து அமைத்திருக்கிறார் ராஜ மௌலி. பெரும் படையை எப்படி சிறு படை அல்லது பயிற்சி இல்லாத மக்கள் எதிர்க்க முடியும் என்பதை நம்ப முடியாவிட்டாலும் நடக்கும்படியான உக்திகளுடன் கதையை நகர்த்திச் செலுத்துகிறார். படத்தில் எந்த இடத்திலும் தொய்வு இல்லை. ஆனால் கடைசியில் பாகுபலி எப்ப தான் பல்வாள் தேவனை கொன்று முடிப்பார் என்று நினைக்கும் அளவுக்கு சண்டைக் காட்சிகள் நீள்கின்றன! படையப்பாவில் ரஜினியிடம் லட்சுமி ரொம்ப நேரம் ஆக்காமல் வந்துவிடு என்று சொல்லிவிட்டு செல்வது போல் இங்கு அனுஷ்காவும் பிரபாசிடம் சொல்லி விட மாட்டாரா என்று தோன்றுகிறது!

அனைத்து நடிகர்களும் மிகவும் நன்றாக நடித்திருக்கிறார்கள். பிரபாசுக்கு இந்தப் படம் ஒரு மாஸ்டர் பீஸ்! ராஜ மாதாவின் கணவனாகவும் பலவாள் தேவனின் தந்தையாகவும் வரும் நாசருக்கும் பெரிய பாத்திரம். அவரும் பல்வாள் தேவனாக ராணா டக்குபாட்டியும் சிறப்பாக செய்திருக்கிறார்கள். துணை நடிகர்கள் எப்பொழுதும் ஒரு அதிர்ச்சிக் கலந்த முகத் தோற்றத்துடன் படம் முழுக்கக் கும்பலாக வருகின்றனர். கட்டப்பா ஏன் பாகுபலியைக் கொன்றார் என்கிற கேள்வி ரொம்ப ஹைப் தான். அதன் காரணத்தில் எதிர்பாராத ட்விஸ்ட் எல்லாம் இல்லை. ஆனால் கதைக்குத் தகுந்தபடி காரணம் அமைத்திருக்கிறது. இசை மரகத மணி. பாடல்களில் அவர் சோபிக்கவில்லை. ஆனால் பின்னணி இசையை பிரம்மாண்டமாக அமைத்திருக்கிறார்.

இப்படத்தில் பணி புரிந்த எல்லா தொழில் நுட்பக் கலைஞர்களும் பிராமதமாக பங்களித்திருக்கிறார்கள். கதைச் சொல்லியாக ராஜ மௌலி பிரகாசிக்கிறார். குடும்பத்துடன் பார்க்க வேண்டிய நல்ல ஒரு படைப்பு பாகுபலி2.

Previous Older Entries