பத்மாவத் – திரை விமர்சனம்

சித்தூர் ராணி பத்மினியின் சரித்திரக் கதை நாம் அறிந்ததே. அதை 3Dயில் பிரம்மாண்டமாக காணக் கிடைக்கிறது பத்மாவத் படத்தின் மூலம். நல்ல தயாரிப்பு. அரண்மனைகளும், ஆடை அலங்காரங்களும், சண்டைக் காட்சிகளும் 3Dயில் பிரமிப்பூட்டுகின்றன. இதில் திபிகா படுகோன் பத்மாவதியாகவே வாழ்ந்திருக்கிறார். ராணிக்குரிய கம்பீரம், அழகு, நடை உடை பாவனைகள் இவை அனைத்திலும் நாம் மதிக்கும் ஒரு சரித்திர நாயகியை நம் கண் முன் நிறுத்துகிறார். மேவாரின் ராஜபுத அரசன் ராவல் ரத்தன் சிங்காக ஷாஹித் கபூர் மிக அழகான, வீரமான ஆண்மகனாக அருமையாக நடித்திருக்கிறார். அல்லாவுதீன் கில்ஜியாக ரன்வீர் சிங். அத்தனை குரூரமான நடிப்பு. முதல் காட்சியிலேயே பால்ய நண்பனை அனாயாசமாக கொன்று பின் தன் திருமண விழாவில் மகிழ்ச்சியாக ஆடிப்பாடி இலகுவாக தான் எத்தனை பெரிய வில்லன் என்று நம் மனத்தில் சம்மணமிட்டு உட்கார்ந்து கொள்கிறார். வரிசையாக கில்ஜியின் கொடூர செயல்களால் அவன் எப்படிப்பட்டவன் என்று காட்டிவிடுகிறது திரைக்கதை.

ரத்தன் சிங் பத்மாவதியை காட்டில் சந்திக்கும் முறையும் அவளின் வீர தீரத்தைக் கண்டு மையல் கொள்வதும் அழகாக உள்ளன. அவன் அரசன், அவள் சிங்கள் தேசத்து அரச குமாரி. அதனால் திருமணம் எளிதாக முடிகிறது. ஆனால் மேவார் ராஜபுத அரசனுக்கு அவள் இளைய ராணியே. பத்மாவதியை மேவார் அழைத்து சென்றவுடன் இவள் அழகையும் அறிவையும் கண்டு அரண்மனையில் உள்ள அனைவரும் மயங்குகின்றனர் ஆனால் மூத்த அரசிக்கு மனம் வாடுகிறது.

பார்யாள் ரூபவதி சத்ரு என்பதற்கு ஏற்ப {மனைவி அழகி என்றால் அதுவே எதிர்வினையாற்றும், சீதைக்கு அவள் அழகே சத்ரு} அவள் அழகே பல பிரச்சினைகளுக்குக் காரணமாகிறது. ராஜ குருவே தீய எண்ணத்துடன் மாற பத்மாவதியின் அறிவுரையின் பேரில் ராஜ ராஜகுருவை நாடு கடத்துகிறான் அரசன். அதனால் அவனே எதிரியாக மாறி, நயவஞ்சகத்துடன் செயல்பட்டு மேவாருக்கே கில்ஜிக்கு வழி காட்டுகிறான். கிட்டத்தட்ட சூர்ப்பனகை செய்ததை இந்த ராஜகுரு செய்கிறான். இராவணன் இடத்தில் அல்லாவுதீன் கில்ஜி.

முதலில் விறுவிறுப்பாக ஆரம்பிக்கும் கதை பத்மாவதியும் ரத்தன் சிங்கும் மேவார் வந்த பிறகு தொய்வு ஏற்படுகிறது. கிட்டத்தட்ட இடைவேளை வரை சுமாராகவேப் போகும் படம் இடைவேளைக்குப் பிறகு வேகம் எடுக்கிறது. கணவனை கில்ஜியிடமிருந்து மீட்க பத்மாவதி போடும் கில்லியான யுக்தி, கில்ஜியின் மனைவி மேஹருனிஸ்ஸா செய்யும் உதவி, திருட்டுத்தனமா தில்லி கோட்டைக்குள் புகுந்த ராஜபுத வீரர்கள் அடையும் வெற்றி என்று சுவாரசியமாக போகிறது கதை. ஆனால் ஏமாற்றப்பட்ட கில்ஜி வெகுண்டெழுந்து பெரும் வேகத்தோடும் பெரும் படையோடும் வந்து அரசனை கொன்று கோட்டையை தகர்க்கிறான். ஜ்வாலையில் பத்மாவதி தீக்கு இரையாவதை கவிதையாய் வடித்திருக்கிறார் சஞ்சய் லீலா பன்சாலி.

ஒளிப்பதிவு பெரும்பாலும் நன்றாக உள்ளது. தில்லி சுல்தான் அரியணை இருக்கும் தர்பார் மட்டும் இருளோ என்றிருக்கிறது. அது இஸ்லாமிய அரசின் இருளடைந்த ஆட்சியை குறியீடாக காட்ட இருக்குமோ என்னமோ! இசை வெகு சுமார். நான் பத்மாவத் படத்தைத் தமிழில் பார்த்தேன். வசனங்கள் நன்றாக இருந்தன. ஆனால் சில இடங்களில் கவிதைகள் வருகின்றன. அவை வெகு மொக்கையான மொழிப்பெயர்ப்பாக அமைந்திருந்தன. {இந்தியிலும் மொக்கையா என்று தெரியாது}.

இந்தப் படம் வெளியாவதற்கு ஏன் இவ்வளவு எதிர்ப்பு என்று தெரியவில்லை. ராஜபுத்திரர்களையும் ராணி பத்மாவதியையும் எந்தத் தவறும் இல்லாமல் காட்டியுள்ளார்கள். கில்ஜியையும் கொடுங்கோலனாகத் தான் காட்டியிருக்கிறார்கள். எக்கச்சக்கப் பணம் செலவழித்து தயாரிக்கப்பட்டுள்ள படம் {இருநூறு கோடி ரூபாய்}. தயாரிப்பு நன்றாக இருந்தாலும் படத்தின் நீளத்தை குறைத்து இருக்கலாம். முதல் பாதி ரொம்ப இழுவையாக உள்ளது. அதை குறைத்திருந்தால் இன்னும் ரசித்துப் பார்க்கலாம். தெரிந்த முடிவாக இருந்தாலும் கடைசி காட்சியில் மனம் பதைபதைக்கிறது. அது இயக்குநரின் வெற்றியே!

 

Advertisements

தானா சேர்ந்த கூட்டம் – திரை விமர்சனம்

 

மும்பையில் ஓர் நகைக் கடையில் உண்மையில் நடந்த ஒரு துணிகர ஏமாற்று சம்பவத்தை {பொய்யான CBI ரெயிட்} மையமாக வைத்து Special 26 என்ற இந்திப் படத்தின் தழுவல் ‘தானா சேர்ந்த கூட்டம்’.

மோசடி செய்யும் ஒருவனின் சாமர்த்தியமான செயல்களைப் பற்றிய படம் இது. இதைச் செய்வது ஒரு ஹீரோ என்பதால் அவன் செய்யும் செயல்களை நியாயப் படுத்த ஒரு பின்னணிக் கதை உள்ளது. ஆரம்பம் ஜோராக உள்ளது. சொடக்கு மேல சொடக்கு போட்டு தூளாக குத்தாட்டம் போடுகிறார் சூர்யா. முதல் ஏமாற்று வேலைக்குப் பிறகு அந்த ஆச்சரியத் தன்மை குறைந்து விடுவதால் அடுத்து ஏமாற்றும் சம்பவத்தில் அவ்வளவு சுவாரசியம் இல்லை. திரைக்கதையின் கோளாறு அது. சூர்யா மாதிரி ஒரு ஹீரோவை வைத்துக் கொண்டு அவரை பிரமாதமாக பயன்படுத்திக் கொண்டிருக்க வேண்டாமா?  இன்னும் அழகாக விறுவிறுப்பாக திரைக் கதை அமைத்திருக்கவேண்டும். அதுவும் சிபிஐ ஆதிகாரிகள் இந்த ஏமாற்றும் கும்பல் யார் என்று கண்டுபிடித்தப் பிறகும் இடைவேளைக்குப் பிறகு அவர்களை பிடிக்காமல் திரைப்படம் தொடர்கிறது!

எண்பதுகளின் பிற்பகுதியில் நடக்கிறது கதை. ஆனால் அது தெளிவாகச் சொல்லப்படவில்லை. எண்பதுகளில் நடக்கிற கதை என்பதாக பொட்டிக் கடையில் தொலைபேசி, லாட்டரி டிக்கெட் விற்பனை முதலியன மூலம் காட்டப்படுகின்றன. செல் போன் இல்லை. வீட்டில், கடையில் இருக்கும் தொலைபேசி மூலம் எல்லா போன் உரையாடல்களும் நடப்பதால் செல் போன் வரும் முன் நடக்கும் கதை என்கிற அளவில் புரிந்து கொள்கிறோம் ஆனால் தெளிவாக சொல்ல மெனக்கெடல் இல்லை.

வேலையில்லா திண்டாட்டம் என்னும் காலகட்டம் என்றில்லாமல் வேலை கிடைக்க லஞ்சம் கொடுக்க வேண்டிய சூழல் என்று படம் தொடங்குவதாலும் கொஞ்சம் குழப்பம் ஏற்படுகிறது.அந்த மாதிரி சம்பவங்கள் இப்பொழுது தான் பெருகியுள்ளது. பணம் கொடுத்தும் நாளை வோட்டை வாங்குவார்கள் என்பது  போன்ற சில வசனங்கள் இடம் பெறுகின்றன. அவை மூலம் இந்தக் கதை அதற்கு முன்பு நடைபெற்றது என்றும் புரிந்து கொள்ள வேண்டும். தீரன் அதிகாரம் ஒன்று படத்தில் அந்தக் கதை தொண்ணூறு பிற்பாதியிலும் இராண்டாயிரத்தின் முற்பகுதியிலும் நடந்த கதை என்பதை நாம் தெளிவாகப் புரிந்து கொள்ள முடிந்தது. அந்தத் தெளிவு இந்தப் படத்தில் இல்லை.

சூர்யா படம் முழுவதும் எந்த இடத்திலும் சோடை போகாமல் நன்றாக செய்துள்ளார். அடுத்த பிளஸ் ரம்யா கிருஷ்ணன். அவர் இல்லை என்றால் படம் இந்த அளவு கூட சிறப்பாக இருந்திருக்காது. தேர்ந்த நடிகை! சிபிஐ உயர் அதிகாரியாக சுரேஷ் மேனன், நடிப்பு நன்று. கார்த்திக் ஸ்பெஷல் சிபிஐ அதிகாரியாக வந்து தன் அனாயசமான நடிப்பில் எல்லாரையும் தூக்கி சாப்பிட்டு விடுகிறார். சோகம் என்னவென்றால் அவரை அவ்வளவு கெத்தாக ஆரம்பத்தில் காட்டிவிட்டு கிளைமேக்சில் அவர் பாத்திரத்தை சொதப்பி விட்டார்கள். அதே போல சூர்யாவின் தந்தையாக வரும் தம்பி ராமையா பாத்திரமும் எடுபடவில்லை. படத்தில் ஒரு முக்கிய தாக்கத்தை ஏற்படுத்த வேண்டிய சூர்யாவின் நண்பரான கலையரசன் பாத்திரம் வலுவாகவே இல்லை. அவனின் முடிவு தான் சூர்யாவின் பாதையை தேர்ந்தெடுப்பதற்கான தூண்டுதல். கலையரசன் எதற்காக போலீசில் சேரவேண்டும் என்று அவ்வளவு முயற்சி எடுக்கிறான் என்பதற்கோ கடைசியில் எடுக்கும் முடிவுக்கான காரணமோ சரியாக கொடுக்கப்படவில்லை. சூர்யாவின் கூட்டாளிகள் செந்தில், சத்யன், கீர்த்தி ரெட்டி இவர்களின் பங்களிப்பு நன்றே. கீர்த்தி சுரேஷ் இருக்கும் இடமே தெரியவில்லை. டூயட்டுடன் சரி.

படத்தின் பெரிய பலம் அனிருத். பாடல்கள், பின்னணி இசை இரண்டுமே நன்றாக அமைத்திருக்கிறார். தினேஷ் கிருஷ்ணனின் ஒளிப்பதிவும் பாராட்டைப் பெறுகிறது.

க்ளைமேக்ஸ் நகைக் கடை சம்பவம் ரொம்ப குழப்பமாக சொல்லப்பட்டிருக்கு. ஒரு பரபரப்பும் இல்லாமல் ஒரு க்ளைமேக்ஸ் சம்பவம்! இந்திப் படத்தைப் பார்த்தவர்களுக்கு இந்தப் படம் பிடிக்காது. அது ரொம்ப சுவாரசியமான கலகலப்பான திரைப் படம். மாற்றங்கள் ஏதும் செய்யாமல் அப்படியே எடுத்திருக்கலாம் விக்னேஷ் சிவன். சூர்யாவிற்கும் நமக்கும் ஒரு நல்ல படம் கிடைத்திருக்கும். நானும் ரவுடி தான் படத்துக்குப் பிறகு இந்தப் படத்தில் விக்னேஷ் சிவன் ஏமாற்றி விட்டார்.

வேலைக்காரன் – திரை விமர்சனம்

 

சிவ கார்த்திகேயன் தமிழ் சினிமாவில் தனக்கான இடத்தைப் பிடித்து விட்டார். இதே போலக் கதைகளையும் இயக்குநர்களையும் தொடர்ந்து தேர்வு செய்தால் அவருக்கு இனி எல்லாம் ஏறுமுகமாக தான் இருக்கும். மாஸ் படங்களில் நடிப்பதே பிரபலம் ஆகும் வழி என்கிற நம்பிக்கைக்கு நடுவில் இம்மாதிரி ஒரு கதையைத் தேர்ந்தெடுத்து நடித்ததற்கு அவருக்குப் பாராட்டுகள்.

முழுக்க முழுக்க வசனங்களால் நிறைந்துள்ளது படம். மார்கெடிங் சம்பந்தமாக ஒரு MBA  வகுப்பில் தெரிந்துகொள்ளக் கூடிய அளவு நிறைய விஷயங்களை படம் பார்ப்பவர் முன் வைக்கிறார் இயக்குநர் மோகன் ராஜா. ஆனால் கொஞ்சமும் போரடிக்காமல் நகர்த்தியிருப்பதில் தெரிகிறது இயக்குனரின் திறமை.  குப்பத்து வாழ்க்கை முறையை காட்டுவதிலும், பெரிய நிறுவனங்களின் கட்டமைப்பையும், நிறுவனங்களுக்கிடையே நடக்கும் போட்டி,பொறாமையை காட்டுவதிலும் நன்கு ஆராய்ச்சி செய்து மிகைபடாமலும் உண்மையாகவும் காட்டியுள்ளார்.

முதலாளிகள் எப்படி நுகர்வோரை ஏமாற்றி, தரமில்லாதப் பொருட்களை அவர்களிடம் கொண்டு சேர்த்து, சிறிதும் குற்ற உணர்ச்சி இல்லாமல் உடற்கேட்டினை நுகர்வோருக்கு உண்டாக்கி கொள்ளை இலாபம் பார்க்கிறார்கள் என்பது இப்படத்தின் பகுதிக் கதை.  ஆனால் மட்டமானப் பொருட்களைத் தயாரிக்கும் நிறுவன ஊழியர்களும் நடுத்தர மக்களாக அப்பண்டங்களை நுகர்பவர்களும் அவர்களே என்கிற முக்கிய இழையைப் பிடித்துத் திறமையாகத் திரைக் கதையை உருவாக்கியுள்ளார் ராஜா. அடுத்ததாக, முதலாளிகள் ஏமாற்றினாலும் ஊழியர்கள் நிறுவனத்திற்கு விசுவாசத்துடன் செயல்படுவதால் தான் நுகர்வோர் பாதிக்கப்படுகிறார்கள் என்று முற்றிலும் புது கோணத்தில் திரைக் கதையை செலுத்துகிறார். தரக் குறைவான உடல் நலத்திற்கு கேடான பொருட்களை உருவாக்குவதில் ஏற்படும் இன்னல்களை ஊழியர்களுக்கு உணர்த்தி அவர்களின் மனங்களில் குற்ற உணர்ச்சியை உண்டாக்கி தரமான பொருட்களை தயாரிக்க வைத்து ஒரு மாற்றத்தை உருவாக்க முயல்கிறார் கதாநாயகன்.

சிவகார்த்திகேயன் அறிவு’ என்னும் துடிப்புள்ள ஒரு குப்பத்து இளைஞன். தன் பகுதி மக்கள் பொருளாதரத்தில், நாகரிகத்தில் அடுத்தக் கட்டத்துக்கு உயர வேண்டும் என்று அவர் விரும்புவது முதல் சில காட்சிகளிலேயே அழுத்தமாகப் படத்தில் பதிவாகிறது. ஒரு பெரிய உணவுப் பொருட்கள் தயாரிக்கும் நிறுவனத்தின் விற்பனைப் பிரிவில் விற்பனையாளராகப் பணிக்கு அமர்கிறார். அங்கு சந்திக்கிறார் ஃபஹத் பாசிலை. ஃபகத்தின் அறிமுகமே கலக்கல். ஒரு தேர்ந்த மார்கெடிங் மேலாளராக, சிகாவுக்கு நல்ல வழிகாட்டியாக, விற்பனைத் துறையில் விதிக்கப்பட்டுள்ள இலக்கை அடைய சாமர்த்தியமாக என்னென்ன செய்யவேண்டும் என்று கற்றுத் தருபவராக, சிகாவுக்கு நம்பிக்கைக்குப் பாத்திரமானவராக வருகிறார் . வெகு விரைவில் அவர் யார் என்கிற உண்மை முகம் நமக்குத் தெரிய வருகிறது. சிகாவுக்கு கிட்டத்தட்ட கடைசிக் காட்சி வரை அவர் யார் என்று தெரியாமலே அவருடன் பயணிக்கிறார். அதுவே நல்லதொரு திரைக் கதையாக அமையக் காரணமாக உள்ளது.

கடைசிக் காட்சி வரை வில்லன் வெகு சக்தி வாய்ந்தவராக இருப்பது இப்படத்தின் பலம். பலமுறை சொன்னது போல கதாநாயகனின் பராக்கிரமம் வில்லனின் சக்தியை வைத்தே நிரூபணமாகிறது. இதில் ஃபகத் பாசிலுக்கு மிகவும் புத்திசாலியான, சொடக்குப் போடுவதற்குள் வியுகம் அமைப்பவராக வரும் வில்லன் பாத்திரம். சிகாவும் ஃபகதுக்கும் இடையே சதுரங்க காய் நகர்த்தல்கள் பாணியில் தான் சூதும் வாதும் நடக்கின்றது.  முட்டி மோதும் ஹீரோயிச சண்டைக் காட்சிகள் இல்லை. ஃபகதின் நடிப்பு A1. சும்மா பின்னிப் பெடலெடுத்திருக்கிறார். எப்படி தனி ஒருவனில் அரவிந்த் சுவாமி பரிமளித்தாரோ அதே மாதிரி இப்படத்தில் ஃபகத் பாசில்.

சிவகார்த்திகேயன் பிரமாதமாக நடித்திருக்கிறார். குப்பத்திலே வளர்ந்து வெளி உலகம் பற்றி அதிகம் தெரியாத ஒரு வெகுளித்தனம், தன் குப்பத்து மக்களுக்கு நன்மை செய்ய வேண்டும் ஆனால் செய்ய முடியவில்லையே என்கிற போது வரும் ஆதங்கம், வெற்றி பெற வேண்டும் என்கிற வெறி, யோசித்து செயல்படும் நிதானம், ஏமாற்றப்பட்டு விட்டோம் என்கிற போது வரும் அயர்ச்சி, என்று பலவித உணர்ச்சிகளை அனாயசமாக காட்டியுள்ளார்.

நயன்தாராவுக்கு சின்ன பாத்திரம் தான். ஆறம் எல்லாம் பார்த்த பிறகு இதில் அவரை பார்க்கும்போது சின்ன வேடம் தான். நன்றாக செய்துள்ளார். ஆர்ஜேபாலாஜி ‘நானும் ரவுடி தான்’ படத்தில் இருந்த அளவு இந்தப் படத்திலும் நன்கு செய்திருக்கிறார். பிரகாஷ் ராஜ் குப்பத்து டானாக வருகிறார். இந்த மாதிரி பாத்திரம் எல்லாம் அவருக்குத் தண்ணிப் பட்ட பாடு. ஸ்னேகா முக்கிய வேடத்தில் ஆனா சின்ன வேடத்தில் வருகிறார். தேர்ந்த நடிகை அவர்.  சிவகார்த்திகேயனின் பெற்றோராக வரும் சார்லி, ரோகினி அருமையாக நடித்துள்ளனர். ஓரிடத்தில் ரோகினி சிகாவிடம் தான் வீட்டு வேலை செய்யுமிடத்தில் முதலாளி தவறாக நடக்க முயன்றபோது தான் கோபத்தை வெளிப்படுத்திய விதத்தை சொல்லுவார். அந்த இடத்தில் சிகாவின் முகத்தில் தோன்றும் உணர்ச்சிகள் அருமை. தம்பி ராமையா, ரோபோ ஷங்கர், சதீஷ், வினோதினி, கற்பக விநாயகம், Y.G.மகேந்திரன், மன்சூர் அலி கான் என்று ஒரு பெரிய குழுவே படத்தில் உள்ளது. அனைவரின் பங்களிப்பும் நன்று. இயக்குநருக்குப் பாராட்டுகள்.  இப்படத்தில் நடித்தவர்கள் யாருமே மிகையில்லாமல் நடித்திருப்பது சிறப்பு.

நிறைய சம்பவங்கள் இருப்பினும் தெளிவாகக் கதையை எடிட் செய்த ரூபினும், பதிவு செய்த ஒளிப்பதிவாளர் ராம்ஜியும் வாழ்த்தைப் பெறுகிறார்கள். அனிருத் புகுந்து விளையாடியிருக்கார். பின்னணி இசை கச்சிதம். பாடல்களும் நன்று.

ஆரம்பத்தில் இருந்து நூல் பிடித்தார் போல் பயணிக்கிறது கதை. ஒரு குழப்பம் இல்லை, ஓர் இடத்திலும் தொய்வு இல்லை. ராஜா கையை வெச்சா அது ராங்கா போயிடாதுன்னு காட்டிவிட்டார் இயக்குநர் ஜெயம் ராஜா! தனி மனித ஒழுக்கம் வளரவேண்டும், நாம் ஒவ்வொருவரும் மாறாத வரை சமூகம் மாறாது என்பதை அழகாக சொல்லியுள்ளார்.

அருவி – திரை விமர்சனம்

ஒரே படத்தில் விழுந்து விழுந்து சிரிக்க வைத்து அதே சமயம் மனத்தை பிழிய வைக்கும் சோகத்தையும் தர முடியுமா என்றால் முடியும் என்று காட்டியுள்ளார் அறிமுக இயக்குநர் அருண் பிரபு புருஷோத்தமன். என்ன ஒரு வித்தியாசமணா கதைக் களம்! சிரிக்க, சிந்திக்க என்று முன்பு திரைப்படங்கள் வருவதுண்டு, சமீப காலங்களில் பெரும்பாலும் மாஸ் படங்கள் தான். ஒரே கதையை தினுசு தினுசா வெவ்வேறு நடிக நடிகைகளை வைத்து பெரிய பட்ஜெட் படங்கள் எடுத்து முதல் நாளே நூறு கோடி ரூபாய் வசூல் என்று சக்சஸ் மீட் வைத்து அடுத்த மாதத்தில் தயாரிப்பாளர் மனம் நொந்து நஷ்டத்தை ஈடு செய்வது எப்படி என்று புலம்புவதை தான் காண்கிறோம். ஆனால் அந்த நடத்தைக்கு நேர்மாறாக இப்படம் அமைந்துள்ளது.

அருவி புது முகங்களை வைத்துத் தயாரிக்கப்பட்ட சின்ன பட்ஜட் படம். என்றுமே கதைக்கு முக்கியத்துவம் கொடுத்து இயக்கப் படும் படங்கள் சோடை போனதில்லை. இந்தப் படமும் அவ்வரிசையில் வருகிறது. ‘சொல்வதெல்லாம் உண்மை’ போன்ற தொலைக்காட்சி நிகழ்ச்சிகளை நையாண்டி செய்யும் விதமாக முற்பகுதியின் பின்பாதி உள்ளது.தொடக்கத்தில் அவ்வளவாக படம் போகும் பாதை புரிபடவில்லை. கொஞ்சம் பொறுமையாக இருந்தால் மூன்றாவது கியரில் வேகம் எடுத்து இடைவேளை பிளாக்கில் ரசிகனை உச்சத்தில் கொண்டு வைக்கிறது . படம்முடிந்த பிறகு கைத் தட்டுவதை திரை அரங்கத்தில் பார்த்திருக்கிறேன், இப்படத்தில் இடைவேளையிலும் அதைக் கண்டேன்.

கதை தெரியாமல் போய் பாருங்கள். அப்பொழுது தான் நீங்கள் நன்கு ரசிக்க முடியும். முகத்தில் அறையும் உண்மை பார்க்கும் எல்லாரையும் கொஞ்சமேனும் மாற்றும். லட்சுமி இராமகிருஷ்ணன் மாதிரி வரும் லட்சுமி கோபால்சுவாமி பிரமாதமாக நடித்துள்ளார். பிராமண ஸ்லேங்குடன் அவர் பேசி நடத்தும் தொலைக்காட்சி நாட்டாமை நிகழ்ச்சி, உண்மையில் அம்மாதிரியான நிகழ்ச்சிகளில் நடக்கும் அட்டூழியங்களை தோலுரித்துக் காட்டுகிறது. இலட்சுமி கோபால்சுவாமி 2000வது வருடம் மம்முட்டியுடன் நடித்த முதல் மலையாள படத்திலேயே மாநில அளவில் விருதினைப் பெற்றிருக்கிறார்.

அருவி பாத்திரத்தில் நடிக்கும் அதிதி பாலன் அட்டகாசமான நடிப்பை வெளிப்படுத்தியுள்ளார். இடைவேளைக்கு சற்று முன்னே அருவி “சொல்லுவதெல்லாம் சத்தியம்” தொலைகாட்சி நிகழ்ச்சி படமாக்கப்படும் தளத்தில் லட்சுமி கொபால்சுவாமிக்குப் பதில் சொல்லும் விதமாக ஒரு நீண்ட உரை ஆற்றுவார். அருவிக் கொட்டுவது போலப் பேச்சு. கைத் தட்டாமல் இருக்க முடியவில்லை.  அனைத்துப் பாத்திரங்களில் நடித்தவர்களும் வெகு நன்றாக நடித்துள்ளனர். நடிக்க வைத்த இயக்குநருக்கு பாராட்டுகள்.

தனக்கு நேர்ந்த அநீதிக்கு வெறும் மன்னிப்பைப் பெற அருவி எடுக்கும் முயற்சி எப்படி தீவிரவாதமாக மீடியாவினாலும், காவல் துறையினாலும் பெரிது படுத்தப் படுகிறது என்பது நகைச்சுவை கலந்த சோகம். அரவாணி பாத்திரம் நிறைவான சித்தரிப்பு. பொதுவில் அரவாணிகளை குடும்பம் தான் முதலில் நிராகரிக்கும், இதில் அரவாணி எமிலி {அஞ்சலி} குடும்பத்தால் நிராகரிக்கப்பட்ட அருவிக்கு அன்பும் அடைக்கலமுமாக இருக்கிறார். தாங்களாக செய்யாத பிழைக்கு சமூகத்தால், குடும்பத்தால் புறக்கணிக்கப் படும்போது ஏற்படும் வலியை அருவி, எமிலி பாத்திரங்கள் வெளிக்கொண்டு வருகின்றன. ஆதரவற்று இருக்கும் இவர்கள் போல் உள்ளவர்களிடம் சமூக அங்கத்தினர்கள் எடுத்துக் கொள்ளும் வரம்பு மீறிய உரிமைகளை வெளிச்சம் போட்டுக் காட்டுகிறார் இயக்குநர். முக்கியமாக யாரிடம் நாம் அதிக நம்பிக்கையும் எதிர்பார்ப்பையும் வைக்கிறோமோ அவர்களே ஏமாற்றுவது அதீத வலியும், நிதர்சனமும் ஆகும். உண்மையான பெண்ணியம் என்ன என்பதைத் துணிந்து போராடும் அருவியும், எமிலியும் உணர்த்துகிறார்கள்.

படத்துக்கு இசை அமைத்தவர்கள் பிந்து மாலினியும், வேதாந்த் பரத்வாஜும், படத்தோடு இழைகிறது இசை. பாடல்களும் பின்னணி இசையும் மாறுபட்ட பாணியில் மிகவும் அருமையாக உள்ளது.

முடிவில் கொஞ்சம் சோகம் தூக்கலாக உள்ளது ஒரு குறை என்று சொல்லலாம், கொஞ்சம் பிரச்சார நெடியும் உள்ளது. அதுவும் குறை தான். ஆனால் நிறைவான குடத்தில் இருந்து ஓரிரு துளிகள் கீழே சிந்தினாலும் அது நிறை குடம் தானே! படத்தைத் தயாரித்துள்ள எஸ்.ஆர்.பிரபு {ட்ரீம் வாரியர்ஸ்} அவர்களுக்குப் பாராட்டுகள். இயக்குநருக்கு மிகப் பெரிய பூங்கொத்து {தேசிய விருது ஒன்னு பார்ஸல்} உரித்தாகுக!

Tamil Tweeter of the Year 2017 @KirukkanJagu

 

2013ஆம் ஆண்டு Tamil Tweeter of the Year விருதினை முதலில் ஒரு விளையாட்டுப் போல கொடுத்தேன். இந்த வருடம் வரை தொடர்கிறது. தமிழ் ட்விட்டர் என்பது தமிழில் ட்வீட்டுபவர்களின் சமூக ஊடக சங்கமம். அதில் என் கண்ணிற்கும் அறிவிற்கும் எட்டியவரை இனிமையான, அனைவரும் விரும்பத் தகுந்த மாதிரியும், அனைவருக்கும் பயன் தரும் மாதிரியும் ட்வீட்டும் ஒருவரைத் தேர்ந்தெடுத்து அவருக்கு அந்த வருடத்தின் சிறந்த தமிழ் ட்வீட்டராக அறிமுகம் செய்யலாம் என்று தோன்றியது. முதல் வருடம் திரு @kanapraba அவர்கள் இவ்விருதினைப் பெற்று இவ்விருதுக்குப் பெருமை சேர்த்தார். அவரைப் பற்றிய கட்டுரை இங்கே.

2014 ஆம் ஆண்டு @RagavanG அவர்களுக்கு இவ்விருதினை அளித்து மகிழ்ந்தேன். அவரைப் பற்றிய தொகுப்பு இதோ

2015ஆம் ஆண்டு இவ்விருதினைப் பெற்ற பெருமைமிகு @iamVariable அவர்களைப் பற்றிய கட்டுரையை இங்கு படிக்கலாம்.

2016 ஆம் ஆண்டு @savidhasasi இவ்விருதிற்குப் பெருமை சேர்த்தார். அவரைப் பற்றிய தொகுப்பு இங்கே.

இவ்விருதுக்கான விதிகளை மறுபடியும் முன் வைக்கிறேன்.

  1. கீச்சுக்கள் யார் மனத்தையும் புண்படுத்தாமல் பொழுது போக்கு அம்சத்தோடு இருத்தல்.
  2. கீச்சுபவர் பொது அறிவுத் திறனுடன் இருத்தல்.
  3. இனிமையானத் தன்மையை உடையவராக இருத்தல்.
  4. ட்விட்டரில் தன் இருப்பை நிலை நாட்டிக் கொள்பவர்.

இந்த வருட Tamil Tweeter Of The Year விருதினை @kirukkanjagu  அவர்களுக்கு அளிப்பதில் மிகவும் பெருமைக் கொள்கிறேன். இவர் ஒரு தீராத விளையாட்டுப் பிள்ளை. இவர் நேரக் கோட்டில் இருக்கும் நேரத்தில் கலகலவென்று யாரையாவது வம்பிழுத்துக் கொண்டிருப்பார். இவரிடம் இரண்டு நிமிடங்கள் உரையாடினாலே அவரின் உற்சாகம் நமக்கும் தொற்றிக் கொள்ளும். இவரை தெரிந்தவர்கள் இவருள் அடங்கியிருக்கும் திறமையைக் கண்டு வியப்பதில் ஆச்சரியமே இல்லை. இருபத்தியாறு வயது இளைஞர், தொடர் படிப்பாளி, பிளாக்கில் எழுதுபவர், புத்தகங்களும் வெளியிட்டுள்ளார், அதற்கும் மேல் அவர் ஒரு சமூகப் போராளி. அவர் வசிக்கும் கோவையின் சுற்றுப்புற நகரங்களில், கிராமங்களில், சாலை விதிகளைப் பின்பற்றுவது,  உடல் உறுப்பு தானம், இரத்த தானம், நூலகத்தின் முக்கியத்துவம் குறித்துப் பல விழிப்புணர்வு முகாம்கள் நடத்தி தன் பேச்சினால் மாற்றத்தை உண்டு பண்ணியுள்ளார். குழந்தைகளுக்கு இள வயதிலேயே நல்லவற்றைச் சொல்லிக் கொடுத்தால் சமுதாய மாற்றம் எளிதில் நிகழும் என்பதை உணர்ந்து அவர்களை நல்வழிப்படுத்துவதை தன் இலக்காக வைத்துப் பயணப் படுகிறார். 2015 ஆம் ஆண்டு மேரத்தானில் பங்கு பெற்றுள்ளார்.

அவர் முதலில் ஒரு கோவிலில் நடக்கும் வகுப்பிற்கு உட்கார நாற்காலிகள் தேவை என்று அறிந்து ட்விட்டரில் அதைப் பற்றி அறிவித்துத் தமிழ்  ட்வீட்டர்கள் கொடுத்தப் பணம் மூலம் அத்தேவையினைப் பூர்த்திச் செய்தார். அது ஒரு சிறு ஆரம்பம். தொடர்ந்து கோவையில் ஒரு நூலகம் ஆரம்பிப்பது பற்றி டிவிட்டரில் ட்வீட் செய்ததின் பலனாக ஜக்குவை ட்விட்டரில் தொடரும் சென்னைவாசி ஒருவர் அவருக்கு வேண்டிய நிதியினை அளித்து ஒரு நூலகத்தைக் கோவையில் தொடங்க உதவியுள்ளார். சமீபத்தில் ஒரு மாற்றுத் திறனாளிக்கு ஒரு சக்கர நாற்காலியை இதே மாதிரி முயற்சியால் வாங்கிக் கொடுத்திருக்கிறார்.

ட்விட்டரிலும் பிளாக்கிலும் அவரின் அடைமொழி “கிறுக்கன்”. அது அவரின் நகைச்சுவை உணர்வை காட்டுகிறது. உண்மையில் கிறுக்கனுக்கு நேர் எதிரான குணம் அவருடையது. தீர்க்கமான எண்ணங்களை உடையவர், அவற்றை செயல்படுத்த ஆக்கப் பூர்வமான செயல்களை மேற்கொள்கிறார். தற்போது வீட்டில் இருந்தபடியே வெப் டிசைனராகப் பணியாற்றுகிறார். அவர் வாழ்க்கையில் இணையமும் கணினியும் அறிமுகம் ஆன பிறகு எட்டடி தாண்டிக் கொண்டிருந்த அவர் பதினாறு அடி, அறுபத்தி நாலு அடி என்று வேகம் எடுத்துத் தாண்டி வருகிறார். பதினாறு பதினேழு வயதில் வீடியோ கேம் விளையாட்டுடன் முடங்கிக் கிடந்த அவர் உலகத்தில் உள்ள அனைவருடனும் சமூக வலைத்தளங்கள் மூலம் இணையத்தால் இணையத் தொடங்கினார். உலகத் தொடர்புடைய விஷயங்களைக் கற்றுக் கொள்ள ஆரம்பித்தார். சொந்த முயற்சியில் இணையத்தில் வெப் டிசைனிங் பயின்று இருபத்தியோரு வயதில் தானே சம்பாதித்தப் பணத்தில் மடிக் கணினி ஒன்றை வாங்கினார். இதே வேகத்தில் சென்றால் அவரின் உலகம் சுற்றும் ஆசையும் விரைவில் ஈடேறும் என்பது உறுதி.

“இணையமும் இவனும்” என்று இவர் எழுதிய புத்தகத்தின் அட்டைப் படத்தை வடிவமைத்ததும் இவரே. வேறு சில புத்தகங்களுக்கும் அட்டைப் பக்கத்தை வடிவமைத்துக் கொடுத்திருக்கார். பேட்டரி பொருத்திய சக்கர நாற்காலி கிடைத்தப் பிறகு இவரால் இன்னும் இலகுவாக செயல்பட முடிகிறது.

 

ட்விட்டரில் தினமும் ஏதாவது ஒரு தலைப்பில் யார் மேலாவது தாக்குதல் நடந்து கொண்டிருக்கும். அந்த போர்க்கள சூழ்நிலையில் ட்வீட் செய்ய வருபவர்கள் அந்தச் சுழலில் எதிர்க் கருத்தை வைத்து சிக்கி சின்னாபின்னமாவது பெரும்பாலானோர் நிலை. அதில் கிட்னியை பறிகொடுக்காது வளைந்து நெளிந்து நகர்ந்து செல்பவர்கள் வெகு சிலரே. அதில் கிறுக்கன் ஜகுவும் ஒருவர். கருத்தைக் கூறுவார். விதண்டாவாதத்தில் இறங்க மாட்டார்.

Walking with a friend in the dark is better than walking alone in the light.”- Helen Keller

இவரை இந்நிலைக்கு உயர்த்தியது தன்னம்பிக்கையும் விடா முயற்சியும் தான் என்றாலும் இவருக்குப் பள்ளியில் கிடைத்த நல்லாசிரியர் செல்விக்கும் இப்பொழுது நிழலாக அவரைத் தொடர்ந்து உதவி புரியும் சுப்புலட்சுமி பாட்டிக்கும் அவர் நன்றி கடன் பட்டுள்ளார். எப்படி கிரேசி மோகன் சின்னப் பையனாக இருந்தபோது வீரபாண்டிய கட்டபொம்மன் வசனத்தை உரைத்த அழகைப் பார்த்து அவரின் பள்ளி ஆசிரியர் ஜானகி ஊக்கமளித்ததால் இன்று இவ்வளவு சிறந்த கதாசிரியராகத் திகழ்கிறாரோ, அதே மாதிரி ஜெகனும் வீரபாண்டிய கட்டபொம்மன் வசனத்தை உச்சரித்தத் திறனை வைத்து அவரின் மாற்றுத் திறனாளிகள் பள்ளி ஆசிரியர் செல்வி தந்த ஊக்கத்தினால் இன்று இந்த உயரத்தில் உள்ளார். சிறப்புக் குழந்தைகளும் சமூகத்தின் ஓர் அங்கம், சாதிக்கப் பிறந்தவர்கள் என்கிற பாடத்தை இளவயதில் மனத்தில் பதிய வைத்தார் ஆசிரியர் செல்வி.

ஹெலன் கெல்லருக்கு ஒரு ஆன் சல்லிவன் கிடைத்த மாதிரி ஜக்குவுக்கும் ஓரு சுப்புலட்சுமி பாட்டி கிடைத்துள்ளார். அவருக்குத் தேவையான உதவிகளை செய்து, நிழல் போலத் தொடர்ந்து அவரை ஊக்குவித்து வழிநடத்துகிறார். அவருக்கும், அவரின் பள்ளி ஆசிரியர் செல்விக்கும் என் மனமார்ந்த நன்றியும் வணக்கமும்.

இவரை சுற்றி ஒரு பெரிய நட்பு வட்டம் எப்பொழுதும் இருக்குமாம். அவர்களே இவரின் பலமும் கூட. அதை அவர் ட்விட்டரில் இருக்கும்போதும் காண்கிறோம். எதுவும் பிரசங்கம் செய்யத் தேவையில்லாமல்  சிலரின் வாழ்க்கையே எடுத்துக்காட்டாக அமையும். அதை @kirukkanjagu விடம் காணலாம்.

பல சமயங்களில் ட்விட்டரில் நேரம் செலவழித்து நேரத்தை விரயமாக்குகிறோமோ என்கிற சந்தேகம் நம் எல்லார் மனத்திலும் எழும். அதை ஜக்குவை பார்க்கும் போது இல்லை என்று உணர முடிகிறது. அவருக்கு ட்விட்டராலும் பயன், ட்விட்டரில் உள்ளோருக்கும் அவரால் பயனுண்டு.

இவர் தமிழ் ட்விட்டர் சந்தின் இவ்வருட பெருமைமிகு ட்விட்டராக தேர்ந்தெடுக்கப்படுவதில் ஆச்சரியம் ஒன்றும் இல்லை. விருதுகள் பெறுவதும் இவருக்குப் புதிதல்ல. பல விருதுகள் இதற்கு முன்பே இவரை வந்தடைந்துள்ளன. இது இன்னுமொன்று! உலகம் சுற்றும் வாலிபனாக, திரைக் கதைகள் பல எழுதி மேலும் தமிழ் ட்விட்டர் உலகுக்குப் பெருமை சேர்க்க மனமார்ந்த வாழ்த்துகள்.

ரிச்சி – திரை விமர்சனம்

நிவின் பாலியின் நேரடி தமிழ்ப் படம் ரிச்சி. தெற்குத் தமிழகத்தில் எதோ ஒரு மீனவர்கள் கிராமமே கதைக் களம். அங்கே ஒரு தலைவர் ஐசாக் அண்ணாச்சி, கடனில் வாழும் ஒரு மீனவத் தொழிலாளி காகா பீட்டர் {குமாரவேல்}, ஒரு சோக நிகழ்வுக்குப் பிறகு மதுரையில் இருந்து புலம் பெயர்ந்து அதே கிராமத்தில் வாழும் படகு எஞ்சின் பழுது பார்க்கும் செல்வம் {நடராஜன் சுப்பிரமணியம்}, ஒரு  சீர்திருத்தப் பள்ளியில் எட்டு வருட வாழ்க்கையை தொலைத்தப் பாதிரியாரின் {பிரகாஷ் ராஜ்} மகனாக நிவின் பாலி, சிறு வயதில் நிவினின் நண்பனாக இருந்து பின்னர் கொல்கத்தாவுக்கு ஓடிப்போய் அங்கு எதோ ஒரு தாதாவிடம்அடியாளாக இருக்கும் ரகு {ராஜ் பரத்} இவர்களை வாழ்க்கையில் நடக்கும் அசாதாரண சம்பவங்களைப் பற்றியது கதை.

சுருக்கமாக இதை உங்களுக்கு சொல்லிவிட்டேன். ஆனால் இதைத் திரையில் நீங்கள் பார்த்து இவர்களுக்குள் நடப்பதைத் தெரிந்து கொள்ள அதிகப் பொறுமை தேவை. மிகவும் குழப்பான திரைக்கதை. கதைச் சொல்வது ஒரு கலை. அதை இயக்குநர் அறிந்திருக்கவில்லை. கடைசி பத்து, பதினைந்து நிமிடங்களில் தான் கதையின் சாராம்சமே புரிகிறது. இரண்டு மணி நேரப் படத்தை நாலு மணி நேரப் படமாக தோன்ற வைக்க நன்கு மெனக்கிட்டுள்ளார் இயக்குநர் கௌதம் இராமச்சந்திரன். புது யுக்தியாக நினைத்து அந்தக் கிராமத்தில் நடந்த சமபவங்களை அறிந்த ஒரு பத்திரிகை நிருபர் அங்கு நடந்த ஒரு சம்பவத்தில் புதைந்திருக்கும் இரகசியத்தைக் கண்டுபிடிக்க பலரை பேட்டிக் கண்டு உண்மை கண்டறிவதாக நகர்கிறது கதை. இதில் சஸ்பென்ஸ் வெளிப்பட்டுவிடக் கூடாதென்று முதல் பாதியில் எதையும் தெளிவாகச் சொல்லாமல் கதையை நகர்த்துவதால் பாப் காரன் சாப்பிட்டு நாம் நேரத்தைக் கடத்த வேண்டியுள்ளது.

நல்ல நடிகரான பிரகாஷ்ராஜ் கூட தேமேன்னு வந்துவிட்டுப் போகிறார். தந்தையின் அன்புக்கு எங்கும் பாத்திரமாக நிவின் பாலி, கொபக்காரராக, இசாக்கிடம் வேலை செய்யும் முரட்டு உதவியாளராக வருகிறார். கடைசியில் தான் அந்தக் கோபத்துக்கான காரணம் தெரிகிறது. அடர்ந்த மலையாளத் தமிழ் பேசுகிறார். மோகன் லாலும் அப்படித் தான் பேசுவார், பழகிவிட்டது. நிவின் பாலிக்கும் தமிழ்ப் படங்களில் தொடர்ந்து வாய்ப்பு வந்தால் இவருடைய தமிழையும் இவ்வாறே கேட்டுப் பழகிக்கணும். ஆனால் வருமா என்பது சந்தேகம். மலையாளப் படங்களில் அவரைப் பிடித்த அளவுக்கு இந்தப் படத்தில் பிடிக்காததற்குக் காரணம் இயக்குநர் என்று கண்டிப்பாக சொல்லலாம். பாத்திரத் தன்மையை அவருக்கு சரியாக விளக்காததால் அவரின் நடிப்பு அவரிடமே கண்ணாமூச்சி ஆடுகிறது.

குறும்படப் புகழ் லட்சுமி இதில் குமாரவேல் தங்கை யாக மீன் விற்பவராக வருகிறார். அவருக்கும் நட்டிக்கும் காதல். படத்திலேயே உருப்படியாக நடித்திருப்பவர்கள் இவர்கள் இருவர் தான். இன்னொரு நல்ல விஷயம் நல்ல வசனங்கள். எழுதியவருக்குப் பாராட்டுகள். நிருபராக வரும் ஷ்ரத்தா ஸ்ரீநாத் வெகு சுமாராக நடித்துள்ளார். ரகுவின் அம்மா பாத்திரத்தில் வருபவரும் பொறுமையை சோதிக்கிறார். ஒருவருமே வட்டார மொழியைப் பேசவில்லை.

காதைப் பிளக்கும் பின்னணி இசை. அஜநீஷ் லோகநாத். அந்தக் கால எம்ஜிஆர், சிவாஜி படங்களில் மெலோடிராமா காட்சிகளில் பின்னணி இசை எப்படி இருக்குமோ அப்படியே படம் முழுவதும் ஒலிக்கிறது. பாடல்களும் உள்ளன. இதில் ஓரிடத்தில் புலி ஆட்டம் வருகிறது. நிம்மதியாக ராஜா சார் பாடல்களை போட்டுவிடுகிறார் இசை அமைப்பாளர். அனுமதி வாங்கினாரா என்று தெரியவில்லை.

நிவின் பாலிக்கு நடனமும் வரவில்லை. தளபதி படத்தின் காட்டுக் குயிலு மனசுக்குள்ளே பாடலுக்கு அவர் செய்யும் அசைவுகளை மம்முட்டியும், ரஜினியும் பார்க்காமல் இருந்தால் நல்லது.

Comedy of errors எப்பவும் கதை வடிவில், நாடக வடிவில் நன்றாக இருக்கும். இந்தப் படம் Tragedy of Errors. கன்னடப் படத்தின் தமிழாக்கம் இப்படம். கன்னடத்தில் இதைவிட மோசமாக இருந்ததா இல்லை நன்றாக இருந்ததா என்று கன்னடப் படத்தைப் பார்த்தவர்கள் தான் கூறவேண்டும்.

படத்தின் ஒரு வரி – நல்லவர்கள் என நினைப்பவர்கள் நல்லவர்களில்லை கெட்டவர்கள் என நினைப்பவர்கள் கெட்டவர்கள் இல்லை. எல்லாருமே சூழ்நிலைக் கைதிகள். {அப்படீன்னு நினைக்கிறேன்}

திருட்டுப்பயலே 2 – திரை விமர்சனம்

பாபி சிம்ஹா போலீசில் கண்காணிப்புத் துறையில் உள்ளார். சில தொலைபேசி எண்களை ஒட்டுக் கேட்க பாபி சிம்ஹாக்கு மேலதிகாரியிடம் இருந்து கட்டளை வருகிறது. இதில் தொடங்குகிறது படம். பாபி சிம்ஹா எடை கூடியுள்ளார் ஆனால் நடிப்பில் சோடை போகவில்லை. படத்தின் தொடக்கத்திலேயே பாபி சிம்ஹா திருட்டுத்தனம் செய்கிற போலிஸ் என்று தெரிகிறது. இந்தப் படத்தில் ஹீரோ என்பவனும் சற்றே வில்லத்தனத்துடன் இருப்பதால் வில்லன் பாத்திரம் இன்னும் பயங்கர கெட்ட வில்லனாகக் காட்ட வேண்டிய அவசியம் ஏற்படுகிறது இயக்குநருக்கு.

பிரசன்னா படு குயுக்தியான சிந்தனைகளையுடைய வில்லனாக வருகிறார். கதாநாயகன், வில்லன் இரண்டு பாத்திரங்களிலும் பிரமாதமாக வேறுபாடு காட்டி நடிக்கும் திறன் அவருக்குள்ளது. அருமையாக செய்திருக்கிறார். உடம்பை மிகவும் பிட்டாக வைத்துள்ளார். அவரின் இருபத்தி ஐந்தாம் படம் இது. வாழ்த்துகள்! அமலா பால் இவரிடம் பேஸ்புக்கில் நட்புப் பாராட்டி பெரும் சிக்கலில் மாட்டிக் கொள்கிறார். நடிக்க நல்ல வாய்ப்புக் கொடுத்திருக்கும் பாத்திரம். நன்றாகப் பயன்படுத்திக் கொண்டுள்ளார். திரைக்கதையைவிட பாபி சிம்ஹா, பிரசன்னா, அமலா பாலின் நடிப்பே படத்தைப் பரபரப்பாக்கி நம்மை ஆவலுடன் பார்க்க வைக்கிறது.

ஆளை சரியாகத் தெரியாமல் அவர் இணையத்தில் காட்டும் முகத்தை வைத்து எத்தனை பேர் இந்த மாதிரி ஏமாந்துள்ளார்களோ என்று தான் படம் பார்க்கும்போது தோன்றுகிறது. அந்த அளவுக்கு உண்மைக்கு வெகு அருகில் பயணிக்கிறது கதை.

பாடல்கள் FMல் ரொம்ப் பிரபலம் அடைந்துவிட்டன. இரண்டு டூயட்கள் இனிமையாக உள்ளன. இசையமைப்பாளர் வித்யாசாகருக்குப் பாராட்டுகள். திருட்டுப் பயலே 2 முதல் பாகத்துக்குத் தொடர்பு இல்லாவிட்டாலும் நவீனத்தனமாக களவாணித்தனம் செய்கிறவர்கள் பற்றிய கதை தான் இதுவும்.

கூட்டுக் குடும்பத்தில் வாழ்ந்தாலும் பெண் சமூக ஊடகத்தில் மயிரிழையில் தடம் புரண்டு மாட்டிக் கொள்ளும் வாய்ப்புள்ளது என்பதை சொல்லும் விதம் நன்று.  பிரமாதமான வசனங்கள் ஒன்றும் இல்லை. ஆனால் கதை நகர்த்தப்படும் விதம் சுவாரசியமாக உள்ளது. முக்கியமாக கணவன் மனைவி உறவில் ஏற்படும் சிக்கல் இதில் வித்தியாசமானது.

இயக்குநர் சுசி கணேசன் ஒரு துப்பறிவாளர் பாத்திரத்திலலும் வருகிறார். சின்ன பாத்திரம் தான் எனினும் முக்கியப் பாத்திரம். அவருக்கு சுத்தமாக நடிக்க வரவில்லை. வேறு யாராவது நடித்திருந்தால் திரைக் கதை/படம் மெருகேறியிருக்கும். திரைக் கதையில் சில இடங்களில் தெளிவு இல்லை. குழப்பத்தைத் தவிர்த்து இருக்கலாம்.

தன் வினை தன்னைச் சுடும் என்பதாக க்ளைமேக்ஸ் அமைக்கப்பட்டுள்ளது. அவரவர்க்கேத்த தண்டனை கிடைக்கிறது. பிரசன்னா க்மேளைக்ஸ் பகுதி சற்றே நம்பகத் தன்மை குறைவாக உள்ளது. இன்னும் நன்றாக முடித்திருக்க கொஞ்சம் யோசித்திருக்கலாம்.

Previous Older Entries Next Newer Entries